ნათია და ლიზი თავაძეები, მარი და ნატო ლომჯარიები, მარიამ შავიშვილი, მარიამ რუსეიშვილი, ალეკო მჟავანაძე და თედო ლომჯარია ფესტივალის გამარჯვებული გახდნენ და მედლები და პირველი ხარისხის დიპლომები დაიმსახურეს.
_ ბავშვები, მართალია, ძალიან ღელავდნენ, მაგრამ სცენაზე გასვლის შემდეგ, ფანდურთან და სალამურთან თავი შინაურულად იგრძნეს, მათ ორი ნომერი, “პოპური” და “სულიკო” წარადგინეს და თითოეული ნომრის დასრულების შემდეგ, დარბაზში ტაში არ ცხრებოდა, საბოლოოდ რომ პირველი ხარისხის დიპლომები და მედლები მიიღეს, მათ სიხარულს საზღვარი არ ჰქონდა, ბავშვურად გაიხარეს _ ამბობს რეპეტიტორი მზია კვერღელიძე.
_ არ მოველოდი თუ სცენიდან ჩამოსვლის შემდეგ, გარეთ გამოსულს, მაყურებელთაგან ვინმე გვიცნობდა, როცა უცხო ადამიანები მოგვეფერნენ, მართლა ძალიან გამიხარდა, ავღელდი კიდეც, _ ამბობს ლიზი თავაძე.
“ჭანი” ერთი წლისაც არ არის. იგი რამდენიმე ათეული წლის წინ ჩამოყალიბებული და არსებული ფოლკლორული ანსამბლის თაობათა ცვლით განპირობებული ანსამბლია. პედაგოგები გიორგი ჩიხლაძე და მზია კვერღელიძე უფრო ენთუზიაზმით მუშაობენ. როგორც მშობლები ამბობენ, მათი დამსახურებაა ბავშვების “ოქროს დელფინის” ფესტივალზე გამარჯვება.
“სოფლის განვითარების ფონდი”, რომელიც ჭანიეთის რწმუნებულის, დათო მჟავანაძის ინიციატივით ჩამოყალიბდა, ნებაყოფლობითი ფინანსური შემოწირულობით, მიზერული თანხით ახერხებს ხელფასის გადახდას, მშობელთა გადასახადთან ერთად.
_ გულით და პატრიოტული მონდომებით ნაკეთებმა საქმემ შედეგი გამოიღო, ბავშვების გამარჯვებაა ამის დასტური, თან მათ დიდი სტიმული მიიღეს, მიხარია, როგორც დედას, _ ამბობს მშობელი თამუნა თავაძე.
