ქალაქ ოზურგეთის მუნიციპალიტეტის საკრებულოს სხდომაზე 2016 წლის ბიუჯეტში ცვლილება გახორციელდა.
გაირკვა, რომ ქალაქ ოზურგეთის მუნიციპალიტეტის "გაერთიანებული სპორტის განვითარების ცენტრს" სუბსიდია შეუმცირდა 55 ლარით და გაიზარდა არაფინანსური აქტივების ზრდის მუხლი 55 ლარით; "ქართული ფეხბურთის განვითარების ფონდი" _ მიმდებარე დანიშნულების გრანტების მუხლი შემცირდა 165 300 ლარით. ამავე სხდომაზე გახდა ცნობილი, რომ ა(ა)იპ ქალაქ ოზურგეთის საფეხბურთო კლუბი "მერცხალის სუბსიდია გაიზარდა 165.300 ლარით.
თავდაპირველად, 2016 წლის ბიუჯეტში, ა(ა)იპ საფეხბურთო კლუბ "მერცხალისთვის" გამოიყო 427 500 ლარი. აქედან, სხვადასხვა საჭიროებისთვის დახარჯულია 82 200 ლარი. მოგვიანებით დაფუძნდა "ქართული ფეხბურთის განვითარების ფონდი" და ამ ფონდში180 000 ლარი გადაირიცხა.
ა(ა)იპ "ქალაქ ოზურგეთის მუნიციპალიტეტის საფეხბურთო კლუბი "მერცხალი", თავისი წესდებიდან გამომდინარე, ხუთი ძირითადი მიმართულებით საქმიანობს და, შესაბამისად, მისი ფუნქციური დანიშნულებაც ამ ხუთ მთავარ მიმართულებისკენაა მიმართული: საფეხბურთო კლუბის შექმნა; საფუძვლის მომზადება ბავშვთა საფეხბურთო გუნდების ფუნქციონირებისთვის; ცხოვრების ჯანსაღი წესის დანერგვა; სპორტულ-გამაჯანსაღებელი ღონისძიებების ორგანიზება და ჩატარება; თანამშრომლობა მუნიციპალიტეტის ტერიტორიაზე, ასევე, სხვა მუნიციპალიტეტებში არსებულ სპორტულ ორგანიზაციებთან ერთად ერთობლივი სპორტულ-გამაჯანსაღებელი ღონისძიებების ჩატარება.
"ამ ფუნქციების გასახორციელებლად, ქალაქ ოზურგეთის მუნიციპალიტეტის 2016 წლის ბიუჯეტიდან ა(ა)იპ "საფეხბურთო კლუბი "მერცხალის" დაფინანსება 427.500 ათ. ლარით იქნა დაგეგმილი", _ ამბობენ "საქართველოს დემოკრატიული განვითარების კავშირში".
"თუმცა, აქვე უნდა გაესვას ხაზი იმ გარემოებასაც, რომ 2016 წლის მარტიდან მოყოლებული, საქართველოში შეიცვალა, ზოგადად, საფეხბურთო კლუბების დაფინანსების წესი, რაც, თავის მხრივ, მთავრობის მიერ ქვეყანაში ფეხბურთის განვითარების ხუთწლიანი (2016-2020 წწ.) სახელმწიფო პროგრამის დამტკიცებასა და ა(ა)იპ "ქართული ფეხბურთის განვითარების ფონდის" დაფუძნებას უკავშირდება. საქმე ისაა, რომ ქვეყანაში ფეხბურთის განვითარების პროგრამის დაფინანსების მიზნით, საქართველოს მთავრობამ, 2016 წლის 26 თებერვლის №107 დადგენილების საფუძველზე, ადგილობრივ მუნიციპალიტეტებს "სთხოვა", რომ მათ მიერ თავიანთ ბიუჯეტებში ფეხბურთის მხარდაჭერისთვის გათვალისწინებული თანხებიდან, 2016 წლის 1 მარტის მდგომარეობით, დარჩენილი რესურსი ა(ა)იპ "ქართული ფეხბურთის განვითარების ფონდში" გადაერიცხათ. იგივე "თხოვნისა" და დადგენილების საფუძველზე, ამავე ფონდში უნდა გადაირიცხოს ის თანხაც, რაც ზემოაღნიშნულ სუბიექტებს 2017 წლისთვის ჰქონდათ (ან ექნებათ) გათვლილი ფეხბურთის მხარდაჭერისთვის. მართალია, საქართველოს მთავრობის №107 დადგენილება მუნიციპალიტეტებს არ ართმევდა საფეხბურთო კლუბების დამოუკიდებლად დაფინანსების გაგრძელების უფლებას, თუმცა, როგორც მოსალოდნელი იყო, უკლებლივ ყველა მუნიციპალიტეტმა, რომლებსაც თავიანთ კმაყოფაზე საფეხბურთო კლუბები ჰყავდათ, ამ უკანასკნელთათვის განკუთვნილი თანხების ის ნაწილი, რომელიც უკვე სუბსიდირებული იყო, მაგრამ ათვისებული არა, ავტომატურად ზემოხსენებულ "ფონდს" გადაულოცა. შესაბამისად, ქალაქ ოზურგეთის მუნიციპალიტეტის 2016 წლის ბიუჯეტით ა(ა)იპ "საფეხბურთო კლუბ "მერცხალის" დაფინანსებისთვის გათვალისწინებული 427.500 ლარიდან 2016 წლის 1 მარტისთვის დარჩენილი აუთვისებელი თანხის ნაწილი _ 345.300 ლარი, მექანიკურად იქნა მიმართული ა(ა)იპ "ქართული ფეხბურთის განვითარების ფონდში". ის, თუ რამდენად კანონიერი და მიზანშეწონილია, მინიმუმ, ორი წლის (2016-2017 წწ.) განმავლობაში ქალაქ ოზურგეთის მუნიციპალიტეტის ბიუჯეტის საკუთარი სახსრებიდან, გრანტის სახით, მის წინაშე არაანგარიშვალდებული, საქართველოს მთავრობის მიერ დაფუძნებული ა(ა)იპ "ქართული ფეხბურთის განვითარების ფონდის" დაფინანსება და ასეთ პირობებში საფეხბურთო კლუბ "მერცხალის" არსებობის შენარჩუნება ქალაქ ოზურგეთის მუნიციპალიტეტის ა(ა)იპ-ის ფორმით, ცალკე მსჯელობის საგანია, თუმცა, ერთი რამ ფაქტია _ ა(ა)იპ "საფეხბურთო კლუბ "მერცხალის" დაფინანსების მიმართულებით სუბსიდირებული 427.500 ლარი ქალაქ ოზურგეთის მუნიციპალიტეტის 2016 წლის ბიუჯეტიდან ყველა ვარიანტში ბოლომდე დაიხარჯება (პირდაპირ თუ მესამე პირის მეშვეობით).
საგულისხმოა, რომ, ქალაქ ოზურგეთის მუნიციპალიტეტის მერიისგან ოფიციალურად გამოთხოვილი ინფორმაციის თანახმად, ა(ა)იპ "ქალაქ ოზურგეთის მუნიციპალიტეტის საფეხბურთო კლუბ "მერცხალში", საერთო ჯამში, 54 ადამიანია დასაქმებული (რაც 1 ერთეულით ნაკლებია გასულ, 2015 წელთან შედარებით), მათ შორის ორი შტატიანი თანამშრომელია, 52 კი _ შტატგარეშე. ცნობისა და შედარებისათვის შეიძლება ითქვას, რომ გასულ, 2015 წელს ამ ა(ა)იპ-ში სულ 55 ადამიანი იყო დასაქმებული, საიდანაც სამი შტატიანი თანამშრომელი იყო, 52 კი _ შტატგარეშე", _ გვითხრეს "საქართველოს დემოკრატიული განვითარების კავშირში".
ბოლო პერიოდში "მერცხალში" სიტუაცია მძიმედ ვითარდება _ როგორც ცნობილია, გუნდი პირველ ლიგას ემშვიდობება. მოხდება თუ არა ბიუჯეტის ცვლილებასთან ერთად "მერცხალში" ცვლილებები, ამას დრო გვიჩვენებს.
