როგორც გავიგეთ, ამ დაშენების დროს, აღნიშნული ბინის მეხუთე სართულზე მცხოვრები ლომაძეების ოჯახი დაზარალდა _ დაშენებამ სახურავი ჩაანგრია.
ბინის მეპატრონე, მაია ლომაძე ჩვენთან საუბრისას ამბობს, რომ ბინა საცხოვრებლად უვარგისია:
_ ამ ეტაპზე ჩემი ბინის თავზე მიდის დაშენება. საბედნიეროდ, როდესაც ჭერი ჩამოინგრა, სახლში არავინ იმყოფებოდა. ხელისუფლებამ პირობა მომცა, რომ როგორც კი დაშენებას დაამთავრებენ, ბინას გამირემონტებენ. მათ ყველანაირი დახმარება აღმითქვეს და იმედი მაქვს, რომ ყველაფერი გამოსწორდება. გამგებელმა ქირის გადახდა და სხვაგან გადასვლაც კი შემთავაზა, მათგან გვერდში დგომას ნამდვილად ვგრძნობ, _ გვითხრა ლომაძემ.
ოზურგეთის მუნიციპალიტეტის გამგებელი, ილია ვაშაყმაძე ჩვენთან საუბრისას ამბობს, რომ ბინა არ დანგრეულა:
_ დანგრევით არ დანგრეულა, დაზიანდა. ჩვენ მეპატრონეს დროებით სხვა ბინაში გადასვლა შევთავაზეთ და როგორც კი დაშენება დასრულდება, რემონტს ჩავუტარებთ.
_ ბატონო ილია, გაცემული თუ არა დაშენების ნებართვა?
_ როცა მშენებლობა მიმდინარეობს, ნებართვები არსებობს.
_ მე კონკრეტულ ბინაზე გეკითხებით. ჭავჭავაძის ქუჩაზე არსებულ მრავალბინიან საცხოვრებელ სახლზე მიმდინარე დაშენების ნებართვა გაცემულია?
_ რა თქმა უნდა.
_ ახლა თქვენთან რომ მოვიდე, შეგიძლიათ ეს ნებართვა მაჩვენოთ?
_ არა. ეს ყველაფერი ცენტრალიზებულად ხდება(?!).
_ ოზურგეთში მიმდინარე მშენებლობებზე, მშენებლობის ნებართვა მუნიციპალიტეტმა არ უნდა გასცეს?
_ ცენტრალიზებულად ხდება ეს ყველაფერი.
_ ნებართვა არსებობს თუ არა?
_ კარგით, ახლა არ მცალია, შეხვედრაზე ვარ, _ გვითხრა ვაშაყმაძემ.
ამ თემას “გურია ნიუსი” უახლოეს ნომერში დაუბრუნდება.
