_ ბატონო რამაზ, ინფორმაცია გვაქვს, რომ გურიის გუბერნატორს ვალერი ჩიტაიშვილს შეწყვეტილი აქვს უფლებამოსილება. წყარო ამბობს, ბრძანებებს უკვე ხელს აღარ აწერსო. ადასტურებთ ამ ინფორმაციას?
_არ ვიცი… ეგ მე უნდა ვთქვა? ოფიციალურად უნდა გავაკეთო განცხადება, რომ არანაირი უფლებამოსილება გურიის გუბერნატორს შეწყვეტილი არ აქვს და არც არაფერი გაუკეთებია ისეთი, რომ შეუწყდეს უფლებამოსილება? მოგწონთ ოზურგეთის ცენტრი? ხომ მაგარია? კეთების პროცესი ხომ სასიამოვნოა?
_ ბატონო რამაზ, როდის დაიწყება ურეკის პროექტის გახორციელება, კანალიზაციის, წყლის, გზის, ბულვარისა და ასე შემდეგ. ურეკს სიცოცხლის ნიშანწყალი არ ეტყობა.
_ ურეკში პროექტირება დაწყებული და დასრულებულია. ჩვენი ვარაუდით, მაქსიმუმ, ერთ კვირაში დაიწყება. მე წავიკითხე “გურია ნიუსში” ბახმაროზე და მინდა გითხრათ _ თქვენ ხომ ხართ აქაურები, ბახმარო ჩემზე მეტად უნდა გიყვარდეთ და უნდა გესმოდეთ, რომ მხოლოდ ერთი კვირის წინ გაიწმინდა გზა თოვლისგან. იქაც ყველაფერს გავაკეთებთ, მაგარ სასტუმროს, მაღაზიებს, დასასვენებელ ადგილებსაც ვაკეთებთ და ძალიან მაგარი დონის დოღი იქნება, ისეთი, რაც არასდროს ყოფილა. ამის გარდა, ვაკეთებთ ლანჩხუთის სტადიონს, ვაკეთებთ უამრავ წყლის და გზის პროექტს, ბულვარს და სადგურს. როცა მე ვიყავი გუბერნატორი, აქ ასფალტი არ იყო, მე მინდა ის ინფორმაციაც აიღოთ _ მას შემდეგ რამდენი გზა გაკეთდა და გაკეთდება…
_ ბატონო რამაზ, “გურია ნიუსი” თვეში, მინიმუმ, ორ სოფელს მაინც სტუმრობს, სადაც უკიდურეს გაჭირვებასთან ერთად, მოსახლეობას ყველაზე მეტად უგზოობა და უწყლობა აწუხებს…
_თქვენ გგონიათ, მე არ დავდივარ სოფლებში?
_ ალბათ, არ იცნობთ ოზურგეთის მუნიციპალიტეტის სოფლებს, თორემ ნამდვილად ვერ იტყოდით, რომ სოფლებში გზის და წყლის სისტემის პრობლემა გადაჭრილიაო…
_ ანუ, იმას მეკითხებით, რომ გურიაში არ გვაქვს წყლები და გზები?
_ დიახ. დაგვისახელეთ სოფლები, სადაც ეს პრობლემები გადაჭრილი და მოწესრიგებულია. არ ვგულისხმობ, ერთ სოფელს. .ოზურგეთის მუნიციპალიტეტში 25 სოფელია.
_ მაშინ მე მოგცემთ ინფორმაციას, რამდენ სოფელში, სად რა გავაკეთეთ. ყველაფერი ერთბაშად არ კეთდება. გვაქვს განვითარების გეგმა. ვიცით, სად რა უნდა გავაკეთოთ, რამდენ სოფელსა და ქალაქს უნდა წყალი, რასაც ვამბობთ, იმას ვაკეთებთ, ამაზე ვესაუბრეთ დღეს მუნიციპალიტეტის გამგებლებს _ გასაკეთებელი კიდევ ბევრია. რომ მეუბნებით სოფლების გზებსა და წყლებზე, უნდა ნახოთ დინამიკა თანხებისა და პროექტების, როგორ ვითარდება ყოველივე ეს ბოლო თვეების განმავლობაში გურიაში. ნახეთ ჰესების მშენებლობა. მთავარია, თქვენ დააფიქსიროთ, დინამიკა ხომ არ მცირდება. თუ მთავრობა და ჩინოვნიკები მოეშვნენ, ეს უნდა დააფიქსიროთ, თუ შრომობენ, ეს ძალიან მნიშვნელოვანია.
რაც შეეხება ჩემს ჩამოსვლებს, უფრო ხშირადაც ვივლი, რომ გავარკვიო, რა პრობლემა აქვთ გურულებს. გურულები კარგად მიცნობენ და იციან, რა მინდა მათთვის. ერთადერთი ესაა, მეტი საქმე გავაკეთო.
_ ბატონო რამაზ, მაჟორიტარად ხომ არ აპირებთ კენჭისყრას?
_ არა, რატომ უნდა ვიყარო? მე დანამდვილებით მინდა გითხრათ, რომ არასდროს არსად კენჭს არ ვიყრი, მაქვს უამრავი საქმე ქვეყანაში გასახორციელებელი. მე ვთვლი, რომ “გურია ნიუსთან” მაქვს საკმაოდ პრაგმატული ურთიერთობა და ვაღიარე თავის დროზე, როცა გუბერნატორი ვიყავი, “გურია ნიუსის” ინფორმაციით ვსარგებლობდი და შესაბამის გადაწყვეტილებებს ვიღებდი. აქედან გამომდინარე, ურთიერთობა უნდა იყოს ძალიან პრაგმატული. მე პირადად, მზად ვარ ნებისმიერი ურთიერთობისთვის. ერთხელ თქვენს ოფისშიც მოვედი, მაჩუქეს “გურია ნიუსის” მაისური. ასე რომ, ჩემგან კომენტარზე თქვენ არასდროს პრობლემა არ გექნებათ, მზად ვარ თანამშრომლობისთვის.
