შტაბის მუშაობას “ქართული ოცნების” ადგილობრივი თავკაცი, სოსო ბოლქვაძე უხელმძღვანელებს. დანარჩენი ფუნქციები ასე გადანაწილდა: “რესპუბლიკური პარტიის” რაიონული ორგანიზაციის ხელმძღვანელი, რომან ბიწაძე საარჩევნო კომისიებში მუშაობას გაუწევს კოორდინაციას _ მას დიდი გამოცდილება აქვს ამ სფეროში და კოალიცია ამ გამოცდილების სათანადოდ გამოყენებას შეეცდება; “თავისუფალი დემოკრატების” ხელმძღვანელი, ელგუჯა ჩხაიძე აქტივის კოორდინატორად იმუშავებს; მობილურ ჯგუფებს გია ბოლქვაძე უხელმძღვანელებს. ბოლქვაძე წარსულში შინაგან საქმეთა სამინისტროს თანამშრომელი იყო და “პოლიციის წმენდის” შემდეგ უმუშევარი დარჩა.
ოფისის იურისტად ავთო სარჯველაძე დაინიშნა. მისი ძირითადი მოვალეობაა მოქალაქეებისთვის იურიდიული კონსულტაციების გაწევა და საოფისე ხელშეკრულებების მომზადება. საორგანიზაციო საქმეებს ლადო ნანაძე უხელმძღვანელებს, ხოლო შეხვედრების ორგანიზება ნესტორ მგელაძეს დაევალა. შტაბის მდივნად ნანა ბზეკალავა დაინიშნა.
შეხვედრა შტაბის უფროსმა, სოსო ბოლქვაძემ გახსნა: “ადგილობრივი ხელისუფლება დაიტანჯა იმაზე მკითხაობით, რა ხდება, ვინ მუშაობს ჩვენთან, ვის რა ფუნქცია აქვს. რომ აღარ იწვალონ, გადავწყვიტეთ შტაბის პრეზენტაცია მოგვეწყო. მზად ვართ, ჩვენ ირგვლივ არსებულ ყველა კითხვას პასუხი გავცეთ და საზოგადოების ინტერესი დავაკმაყოფილოთ”.
შტაბის პრეზენტაციას ესწრებოდნენ კოალიცია “ქართულ ოცნებაში” შემავალი პარტიების აქტივისტები, სხვადასხვა სოფლების წარმომადგენლები. ერთ-ერთმა მათგანმა გაახმოვანა ინფორმაცია, რომელიც ორიგინალობით არ გამოირჩევა და ამაზე ადგილობრივი მედიაც ხშირად წერს. კერძოდ, საქმე ეხება გამგებლისა და მისი გუნდის წევრების გასაიდუმლოებულ შეხვედრებს სხვადასხვა სკოლების მასწავლებლებთან. ამჯერად საუბარი იყო ჩოჩხათის და შრომისუბნის სკოლებში ორგანიზებულ შეხვედრებზე. ჩოჩხათის წარმომადგენელმა გააჟღერა ინფორმაცია, რომ ამ შეხვედრაზე მასწავლებლებს მოსთხოვეს “ნაციონალური მოძრაობის” ხუთი მხარდამჭერის მოგროვება. ადრე მათ სთხოვდნენ ათი მხარდამჭერის მიყვანას, მაგრამ ეტყობა, ეს იმდენად რთულია, ახლა ხუთზეც თანახმა არიან.
სოსო ბოლქვაძემ ამასთან დაკავშირებით განმარტა, რომ ასეთი ფაქტები საზოგადოებისთვის ცნობილია: _ მიუხედავად იმისა, რომ ეს შეხვედრები მკაცრად კონფიდენციალურია, მაინც ხდება ინფორმაციის გაჟონვა, მაგრამ უფრო დიდი ზეწოლის ქვეშ ახლად დანიშნული საჯარო მოხელეები არიან, რომელთაც 150-ლარიანი ხელფასების სანაცვლოდ, მხარდამჭერთა მცირე ჯგუფების მოგროვებას თხოვენ, თანაც სრული გარანტიებით. მათ მოსახლეობიდან, საახლობლოდან, სანათესაოდან უნდა მოახერხონ პირადობის მოწმობების მონაცემთა შეგროვება და ეს მონაცემები გამგეობაში უნდა წარადგინონ, _ თქვა ბოლქვაძემ.
მსგავსი ფაქტის მოწმე “გურია ნიუსიც” გახდა. კერძოდ, გვიმბალაურის ტერიტორიული ორგანოს ნაციონალი აქტივისტი ახლობელ-მეგობართა წრეში ცდილობდა საკუთარი პარტიის მხარდამჭერთა შეგროვებას და პირად შეურაცხყოფად მიიღო ის ფაქტი, რომ უარი უთხრეს პირადობის მოწმობების მიცემაზე.
სოსო ბოლქვაძემ ისაუბრა იმაზეც, რომ გამგეობის შენობა ნაციონალების საარჩევნო შტაბადაა გადაქცეული და 12 საათის შემდეგ მოქალაქეთა მიღება პირად საკითხებზე იქ აღარ ხდება: “ჩვენ ბევრი მოქალაქე მოგვმართავს, რომ 12 საათის შემდეგ გამგეობაში არანაირ საქმეზე მისვლას აზრი აღარ აქვს. სოფლებიდან ჩამოსვლა ხშირად ტყუილად უწევს მოსახლეობას. დღის მეორე ნახევარში მთელი შენობა საარჩევნო შტაბადაა გადაქცეული და მოქალაქეთა მიღებაზე უარს აცხადებენ. ამ დროს ხდება სოფლებიდან რწმუნებულების მიერ ჩატანილი სიების განხილვა. მე მივმართე საკრებულოს წევრებს, თავი შეეკავებინათ ამ სიების გაკეთებისგან, მაგრამ გვაქვს ინფორმაცია, რომ მსგავსი საქმიანობა კვლავაც გრძელდება”, _ თქვა სოსო ბოლქვაძემ.
რესპუბლიკური პარტიის წევრმა, რომან ბიწაძემ სიტყვით გამოსვლისას აღნიშნა: “პირველ რიგში, ჩვენი მიზანი არ არის ვინმეს დამარცხება და განადგურება. ჩვენი მიზანია, მთელს საქართველოში გაიმარჯვოს და იზეიმოს თავისუფლებამ. ამ საკითხში განსაკუთრებული როლი მედიას ენიჭება. ჩვენ იმედი გვაქვს, რომ გაზეთები მაქსიმალურად ეცდებიან მიიტანონ ხალხამდე მართალი ინფორმაცია. მაგალითად, ამასწინათ მოხდა ასეთი ფაქტი _ ერთ-ერთ ოჯახში გაფენილი ჰქონდათ “ქართული ოცნების” მაისური. მათთან მივიდა სამი მაღალჩინოსანი და “აუხსნეს”, რომ ამ მაისურის გამოფენა სირცხვილი იყო. პირდაპირი მუქარა ოჯახზე არ ყოფილა, მაგრამ იყო მუქარაზე მინიშნება. სწორედ ასეთი ფაქტები უნდა გამოამზეუროს მედიამ, _ მუშაობა “გვასწავლა” ბიწაძემ, _ კიდევ ერთ საკითხს მინდა, შევეხო. წინა წლებში გახორციელებული ინფრასტრუქტურული პროექტების სამუშაოების გამო ბევრ ადამიანს დღემდე არ აქვს აღებული ხელფასი. მინდა, მივმართო გამგებელს, რომ დროზე აუნაზღაუროს ამ ხალხს კუთვნილი ხელფასები”.
ხალხში გავრცელდა ხმები, რომ “ქართული ოცნების” ოფისში სატელიტური ანტენების დამონტაჟების შემდეგ, შესაძლებელი იქნება უპროცენტო განვადების მიღება საყოფაცხოვრებო ტექნიკაზე, მაგრამ ამ ხმების ნამდვილობა შტაბის წარმომადგენლებმა არ დაადასტურეს: “თუ რომელიმე კერძო კომპანია გადაწყვეტს ასეთი აქცია მოაწყოს და სიურპრიზი გაუკეთოს გაჭირვებულ მოსახლეობას, სიამოვნებით დავუჭერთ მხარს”, _ გვითხრა ბიწაძემ.
ჟურნალისტების შეკითხვას, “ქართული ოცნების” საპარლამენტო კანდიდატის შესახებ, შტაბში კონკრეტული პასუხი ვერ გასცეს. სოსო ბოლქვაძემ განმარტა, რომ ეს საკითხი ბოლომდე გარკვეული არაა: _ ერთ კანდიდატზე შეთანხმება, ჯერჯერობით, არ შემდგარა. საუბარია რამდენიმე ვარიანტზე, კერძოდ, ირაკლი მენაღარიშვილზე, მერაბ ჟორდანიაზე, თემურ ჩხაიძეზე… ადგილზე შეთანხმების გარეშე ეს საკითხი არ გადაწყდება, _ აღნიშნეს შტაბის წევრებმა.
