ქალაქ ოზურგეთში მარჯანიშვილის თეატრის დასის 28 ივნისს ჩამოსვლის შესახებ ინფორმაციას არ ფლობს ოზურგეთის ალექსანდრე წუწუნავას სახელობის დრამატულ თეატრის ადმინისტრაცია.
"პირველად მესმის თქვენგან ეს ინფორმაცია. შექსპირი ვიცი, ყველაფერი ვიცი, მაგრამ ჩემთვის კულტურის სამინისტროდან არავის არაფერი უთქვამს და არც მარჯანიშვილის თეატრის დასიდან მოუწოდებიათ ინფორმაცია. ნამდვილად არ ვიცი არაფერი." – გვითხრა თეატრის სამხატვრო ხელმძღვანელმა ვასილ ჩიგოგიძემ.
მისივე თქმით, მარჯანიშვილის თეატრის ხელმძღვანელობის დაპატიჟება მას 5 ივლისს ქალაქ ოზურგეთში დაგეგმილ საერთაშორისო თეატრალურ ფესტივალზე უნდა, მაგრამ რეჟისორ ლევან წულაძესთან დაკავშირება ამ დრომდე ვერ ხერხდება.
"ეს დღეებია ყველანაირად ვცდილობ ლევან წულაძეს დავუკავშირდე და დავპატიჟო თეატრალურ ფესტივალზე, მაგრამ მასთან დაკავშირება ვერ ხერხდება" – გვითხრა ვასილ ჩიგოგიძემ.
ინფორმაციისთვის, 2016 წელს შექსპირის გარდაცვალებიდან 400 წელი სრულდება. ამ თარიღთან დაკავშირებით მარჯანიშვილის თეატრი რეგიონებში გასტროლებს გეგმავს. "დილა მშვიდობისა, საქართველოს" მიერ გავრცელებული ინფორმაციით, პირველი გასვლა მესტიაში იგეგმება, რის შემდეგ მსახიობები ოზურგეთს ესტუმრებიან.
მარჯანიშვილის თეატრი სპექტაკლს "როგორც გენებოთ" წარმოადგენს, რომლის რეჟისორიც ლევან წულაძეა.
როგორც ცნობილი ხდება, ოზურგეთს მარჯანიშვილის თეატრის დასი 28 ივნისს ესტუმრება. თეატრის წარმომადგენლები რეგიონებს საქართველოს კულტურის სამინისტროს ეგიდით ესტუმრებიან.
