საიდან მოვედი პოლიტიკაში სამი შვილისა და ორი შვილიშვილის პატრონი? ჩემი ოჯახის წევრების, განსაკუთრებით კი დედმამიშვილების ცხოვრების ისტორიიდან გამომდინარე, ბუნებრივია, რომ პოლიტიკაში ვარ. მათი ხსოვნის პატივისცემა მავალდებულებს, გავაგრძელო საქმე, რომელსაც შეეწირნენ ისინი. დაწყებული გასული საუკუნის 90-იანი წლებიდან მიწევს პოლიტიკური აქტიურობა… ზოგჯერ წარმატებული იყო ჩემი ბრძოლა, ზოგჯერ კი წარუმატებლობა ახლდა თან… ვიყავი იქ, სადაც ჩემი პარტია იყო… ძირითადად, ოპოზიციაში მთელი თავისი "მომხიბვლელობით". მხოლოდ 2012 წლის არჩევნების შემდეგ მომიწია მმართველ გუნდში ყოფნა, რაც არანაკლებ რთული და საპასუხისმგებლოა, რადგან უკვე შენი გადაწყვეტილება უშუალოდ ახდენს გავლენას ამომრჩევლის ცხოვრებაზე.
ორშაბათი, 13 ივნისი, 2016 წელი
ორშაბათი ყოველთვის მძიმე დღეა, ახალი სამუშაო კვირის დასაწყისი, თუმცა ეს ორშაბათი მიუხედავად კალენდრისა, გასული წლის შემდეგ გაცილებით მძიმეა ყველასათვის _ 13 ივნისი 2015 წლის შემდეგ, ვერეს კატასტროფის შემდეგ, მუდამ ტკივილთან იქნება დაკავშირებული. მომხდარმა ტრაგედიამ თითქოს განმიახლა 27 წლის წინანდელი იარა. მძიმეა ტრაგედია, განსაკუთრებით თუ ეს შენი რაიონის მკვიდრს შეეხება, და შენთვის ახლობელი და პატივსაცემი ოჯახი განიცდის ამ დიდ ადამიანურ დანაკლისს.
ასეთი მძიმე განცდით დაიწყო ეს სამუშაო კვირა. შეხვედრა თანამშრომლებთან, მათთან ერთად გასული ტრაგედიის გახსენება და შემდეგ იწყება ჩვეული სამუშაო დღე: შეხვედრა მოქალაქეებთან და მათი პრობლემების გაცნობა, გაზიარება და მოგვარებაზე ფიქრი.
მოქალაქე ბ. ძ.-ს დედის ჯამრთელობის გაუარესების გამო სჭირდება დახმარება, გამგეობის სოციალური დახმარების სამსახურის თანამშრომლებთან ერთად გამოინახა გზა პრობლემის მოსაგვარებლად.
მოქალაქეებმა მ. ხ.-მ და ზ. ლ.-მ საკუთრების უფლების აღიარების კომისიას მოგვმართა სასოფლო-სამეურნეო მიწაზე საკუთრები უფლების აღიარებისათვის, თითოეულ მათგანს გავუწიე კონსულტაცია დოკუმენტაციის სრულყოფილად მომზადებისათვის.
აღიარების კომისიის წევრებთან ერთად, მომავალ კვირაში ჩანიშნული კომისიის სხდომის მოსამზადებელი სამუშაოები დავგეგმეთ. შემოსული განცხადებების, სოფლების მიხედვით შევადგინეთ მოთხოვილი ნაკვეთების ადგილზე შესწავლის გეგმა. როგორც ყოველთვის, საკმაოდ ბევრ სოფელში მოგვიწევს გასვლა.
უკვე მოსაღამოვდა და როგორც კონსერვატიული პარტიის რაიონული ორგანიზაციის თავმჯდომარე, 18:30 წუთზე ვხვდები პარტიის წევრებს; ნელ-ნელა საარჩევნო ციებ-ცხელებაც თავის ტემპს იღებს, შესარჩევია საუბნო კომისიის წევრები.
უკვე შებინდებისას ვბრუნდები სახლში და მხვდება ჩვეული სოფლის საქმეები….
სამშაბათი, 14 ივნისი, 2016 წელი
ახალი დღის დასაწყისი. მცირე ხნით საოჯახო საქმეები, შემდეგ კი სამსახური. დილით თანამშრომლებთან შეხვედრა, მოკითხვა და დახმარების მომლოდინე მოქალაქეებთან შეხვედრა.
მოქალაქეებმა ბ. ჩ.-მ და ლ. ჩ.-მ კომისიაში შემოიტანეს განცხადება კურორტ ბახმაროში მიწის ნაკვეთზე საკუთრების უფლების აღიარებისათვის.
მოქალაქე ნ. ა.-ს, რომელსაც კომისიაში შემოტანილი აქვს კურორტ ბახმაროში მიწის ნაკვეთის აღიარებისათვის განცხადება, გამოვლენილი ხარვეზის აღმოსაფხვრელად გაეწია კონსულტაცია.
მოქალაქე რ. ძ.-მ მოგვმართა კონსულტაციისთვის სოფელში წარმოქმნილი სადაო სიტუაციის დასარეგულირებლად. აღნიშნული ადმინისტრაციულ ერთეულში გამგებლის წარმომადგენელთან ერთად, ჩვენი კომპეტენციისა და შესაძლებლობის ფარგლებში, რ. ძ.- მივეცით რეკომენდაცია კონფლიქტის მშვიდობიანად მოსაგვარებლად.
მოქალაქე ა.ჭ-მ მოგვმართა დახმარებისათვის, რადგან პრობლემა შეექმნა მის სარგებლობაში არსებული მიწის ნაკვეთის საჯარო რეესტრში რეგისტრირების დროს _ 1992 წელს პირველადი აქტის მიხედვით მის საკუთრებაში გადაცემული მიწის ნაკვეთი აღმოჩნდა სატყეო ზოლში. შესაბამის ადმინისტრაციულ ერთეულში გამგებლის წარმომადგენელთან და გამგეობის შესაბამის სამსახურთან კონსულტაციის შემდეგ, დაიგეგმა პრობლემის მოგვარების გზები. როგორც მოგვიანებით გახდა ცნობილი, აღნიშნული პრობლემა მოქალაქის სასარგებლოდ გადაწყდა.
მიუხედავად დატვირთული სამუშაო დღისა, გამოვნახე დრო რომ დავსწრებოდი არასამთავრობო ორგანიზაციის "გზა იმედისაკენ" და ჩოხატაურის ა(ა)იპ კულტურის ცენტრის ორგანიზებით ჩვენს მუნიციპალიტეტში შეზღუდული შესაძლებლობების მქონე პირთა უფლებების დაცვის დღისადმი მიძღვნილ ღონისძიებას.
საღამოს, როგორც ყოველთვის, სასოფლო, საოჯახო საქმეები მელის.
ოთხშაბათი, 15 ივნისი, 2016 წელი
სამუშაო დღე დაიწყო ჩვეულებრივად…..
მოქალაქე ზ. ვ.-მ და ხ. ხ.-მ კომისიაში შემოიტანა განცხადება კურორტ ბახმაროში მიწის ნაკვეთის საკუთრების უფლების აღიარებისათვის.
შემდგომ, დაგეგმილი გასვლა სოფლებში მიწის ნაკვეთების ადგილზე დათვალიერებისა და შესწავლის მიზნით.
კომისიის თავმჯდომარესთან და წევრებთან ერთდ ვიყავით სოფელ ხიდისთავში და დავათვალიერეთ მოქალაქეების ს. ჭ.-სა და რ. თ.-ს მიწის ნაკვეთები და ადგილზე შევისწავლეთ კანონთან შესაბამისობა.
სამუშაო საათების შემდეგ, პარტიის რაიონული კომიტეტის წევრებთან ერთად, წინასაარჩევნო სამუშაო გეგმა განვიხილეთ.
ხუთშაბათი, 16 ივნისი, 2016 წელი
წვიმს… ძლიერი სიცხის შემდეგ ცოტა კი გაგრილდა გარემო, მაგრამ მგონი ზედმეტი მოსდის წვიმას… არც ამდენია საჭირო.
დილით, სამსახურში ქოლგით ხელში… თანამშრომლების მოკითხვა და სტანდარტულად ფინჯანი ყავით ენერგიის აღდგენა…
ისევ აღიარების კომისიაში განცხადებების მიღება… მოგვმართა 2 მოქალაქემ.
ზაფხულის დადგომასთან ერთად, თანდათანობით იმატებს კურორტ ბახმაროში საკუთრების უფლების აღიარების მსურველთა რაოდენობა…
შესვენების შემდეგ, დავესწარი კინოთეატრ "გურიაში" ქუთაისის სახელმწიფო სიმფონიური ორკესტრისა და ჩოხატაურის მუსიკალური სკოლის აღსაზრდელების ერთობლივ კონცერტს… სასიამოვნოა სცენაზე ამდენი ნიჭიერი ახალგაზრდების ხილვა, რომლებმაც მშვენიერი საღამო გვაჩუქეს.
მუსიკალური ჰანგების შტაბეჭდილებით დამტკბარი გავუყევი ოჯახისაკენ წვიმიან გზას. დღის ბოლოს სიურპრიზი მელოდა _ სახლში შვილები და შვილიშვილები დამხვდნენ; და ჩემში ბებიისა და დედის გრძნობებმა გაიღვიძა.
პარასკევი, 17 ივნისი, 2016 წელი
წესითა და რიგით, კვირის ბოლო სამუშაო დღე….
აღიარების კომისიაში შემოვიდა 4 მოქალაქის განცხადება, ზოგი ბახმაროში ითხოვს საკუთრების უფლების აღიარებას, ზოგი კი სოფლებში სასოფლო-სამეურნეო დანიშნულების მიწის ნაკვეთებზე.
12 საათზე, საკრებულოს რიგგარეშე სხდომაზე განვიხილეთ და მივიღეთ საარჩევნო სააგიტაციო მასალის გასაკრავად გამოყოფილ ადგილთა ნუსხა თითოეული ადმინისტრაციული ერთეულის მიხედვით.
საკრებულოს სხდომის შემდეგ, კომისიის თავმჯდომარესთან ერთად, ადგილზე შევისწავლეთ სოფელ ქვაბღაში მოქალაქე ბ. შ.-სა და სოფელ ნაბეღლავში მოქალაქეების ა.კ-სა და ხ. ქ.-ს სარგებლობაში არსებული მიწის ნაკვეთების მართლზომიერება.
სოფელ ქვაბღაში მოვინახულეთ მშენებარე ეკლესია….
შაბათი, 18 ივნისი, 2016 წელი
დილიდან დასვენების დაგეგმვის ნაცვლად, ბახმაროში წასვლის სამზადისში ვარ _ შემოსული განცხადებების მიხედვით მიწის ნაკვეთების ადგილზე შესასწავლად.
დავათვალიერეთ ვაკიჯვრის, ამბულატორიის, ხიდისთავისა და ბაზრის დაღმართზე მდებარე მიწის ნაკვეთები… ბახმაროში მძიმე სურათი დაგვხვდა… ძალიან ბევრი სახლია დაზიანებული სტიქიური მოვლენების შედეგად…. უამრავი ხეა მოთხრილი… მიუხედავად იმისა, არსებობდა თუ არა კომისიაში შემოსული განცხადებები, შესაძლებლობის ფარგლებში დავასურათეთ დაზიანებული სახლები.
დღის ბოლოს სასიამოვნო შეხვედრაც შედგა… სასიხარულოა, როდესაც ხედავ შენი თანამემამულის წინსვლას და აღმშენებლობას… განსაკუთრებით თუ ის შენი პარტიული თანამებრძოლი და მეგობარია… ბახმაროში ჩემს დიდი ხნის მეგობარს კობა ძიძიგურს და ლევან სოსელიას შევხვდი, რომლებიც მათ მიერ ბახმაროში ახლადშეძენილი დასასვენებელი სახლის სანახავად იყვნენ ამოსულები…
ასე სასიამოვნოდ დასრულდა გამოსასვლელი დღეებიდან პირველი დღე.
კვირა, 19 ივნისი, 2016 წელი
სულთმოფენობის დღესასწაული მივულოცე ახლობლებსა და მეგობრებს…. შუადღით სოფელ ჭაჭიეთში დავათვალიერეთ მოქალაქე ე.კ-სარგებლობაში არსებული მიწის ნაკვეთი და საცხოვრებელი სახლი, რომელსაც კომისიაში შემოტანილი აქვს განცხადება.
კიდევ ერთხელ დავათვალიერე ხიდისთავის მშენებარე ბაღი.
დღის ბოლოს, კომისიის თავმჯდომარესთან ერთდ შევადგინეთ მომდევნო კვირაში დაგეგმილი აღიარების კომისიის სხდომაზე განსახილველი საკითხები.
მიუხედავად სამუშაოს სირთულისა, ჩემთვის მართლაც საინტერესო, სასიამოვნოა ამ კომისიის წევრად ყოფნა და მუშაობა, რადგან შენს თანამოქალაქეებს ემსახურები მათი სარგებლობაში არსებული სასოფლო თუ არასასოფლო დანიშნულების მიწის ნაკვეთებზე საკუთრების უფლების აღიარების მიზნით. ეს განსაკუთრებით სასიამოვნოა, როდესაც საქმე ბახმაროში საკუთრების უფლების აღიარებას ეხება _ მრავალი წლის მანძილზე აღნიშნული თემა ტაბუდადებული იყო; და მიუხედავად იმისა, რომ კანონმდებლობით არ არსებობდა არანაირი შემაფერხებელი ფაქტორი, მხოლოდ ჩვენი მოწვევის საკრებულოს პირობებში გახდა შესაძლებელი ამ ტაბუდადებული თემის მოქალაქეების სასარგებლოდ ახსნა…. ამისთვის მადლიერი ვარ კომისიის თითოეული წევრის, ვისთანაც ერთად მიწევს აღნიშნულ საკითხზე მუშაობა. კომისიის მუშაობის პერიოდში, მხოლოდ ბახმაროში 300-ზე მეტი მოქალაქის საკუთრების კანონიერი უფლება იქნა აღიარებული. ერთი მხრივ, ამ მოქალაქეების ოცნებაც ასრულდა და მუნიციპალიტეტის ბიუჯეტიც დაახლოებით 150 ათასამდე ლარით შეივსო. აღნიშნული თანხა კი კვლავ მუნიციპალიტეტის მოსახლეობის საკეთილდღეოდ დაიხარჯება.
ასეთი იყო ჩემი საქმიანი კვირა, რომელიც ფოტობლოგითაც შევავსე და მომდევნო კვირის "ბლოგ-პოსტს" ჩემს ლანჩხუთელ კოლეგას _ დარეჯან ბურჭულაძეს ვუთმობ!
მაია გიორგაძე,
ჩოხატაურის მუნიციპალიტეტის ფრაქცია _ "ქართული ოცნება _ კონსერვატორები",თავმჯდომარე
