ქალაქ ოზურგეთის მუნიციპალიტეტის საკრებულოს სხდომაზე განიხილეს საკითხი, რომლის თანახმადაც ცნობილი გახდა, ქალაქ ოზურგეთის ტერიტორიაზე, სად შეიძლება განთავსდეს საარჩევნო სააგიტაციო მასალები (პლაკატები).
საკრებულოს დეპუტატის გოჩა ძიმისტარაშვილის თქმით, ამ ჩამონათვალში არ არის გაკეთებული ჩანაწერი, რომ პლაკატების გაკვრა არ შეიძლება მწვანე ნარგავებზე.
დეპუტატის ლევან მგელაძის თქმით, ჩამონათვალში არის სპორტის სასახლე, თუმცა, იქ არ შეიძლება პოლიტიკური პლაკატების გაკვრა, რადგან სპორტი სასახლეში საარჩევნო უბანია.
საკრებულომ მგელაძის შენიშვნა მიიღო და გადაწყვიტა, რომ პლაკატები გაიკვრება სპორტის სასახლის მიმდებარე ტერიტორიაზე არსებულ ელექტრობოძებზე.
ამავე სხდომაზე გაირკვა, რომ "ქართული ოცნების" დეპუტატი ვასილ ჩიგოგიძე, რომელმაც საკრებულოში შუალედურ არჩევნებში გაიმარჯვა, ორი კომისიის წევრი იქნება. მან ისურვა, რომ განათლების, კულტურის, სპორტის, ტურიზმის, ახალგაზრდულ საქმეთა, გენდერული, ჯანმრთელობისა და სოციალურ საკითხთა კომისიის და ქალაქ ოზურგეთის მუნიციპალიტეტის საკრებულოს სივრცით-ტერიტორიული დაგეგმარების და ინფრასტრუქტურის კომისიის წევრი ყოფილიყო.
გოჩა ძიმისტარაშვილმა ამ საკითხს მხარი არ დაუჭირა: "იმის გამო არ დავუჭირე ამ საკითხს მხარი, რომ სხვა კომისიებში 3 და 4 დეპუტატია გაწევრიანებული, მის დასახელებულ კომისიებში კი 6-6 დეპუტატია", _ აღნიშნა გოჩა ძიმისტარაშვილმა.
ვასილ ჩიგოგიძემ თქვა, რომ ის ხელოვანია და აქედან გამომდინარე, ითხოვა ყოფილიყო განათლების, კულტურის, სპორტის, ტურიზმის, ახალგაზრდულ საქმეთა, გენდერული, ჯამრთელობისა და სოციალურ საკითხთა კომისიის წევრი: "რაც შეეხება მეორე კომისიას, პირდაპირ გეტყვით, ვარ სულით და ხორცით ოზურგეთელი და ამის გამო ვითხოვე გავმხდარიყავი სივრცით-ტერიტორიული დაგეგმარების და ინფრასტრუქტურის კომისიის წევრი. რა პრობლემაა აქ?!" _ თქვა ჩიგოგიძემ.
"თქვენი წინააღმდეგი არ ვარ, მაგრამ სადაც უფრო ნაკლები დეპუტატია გაწევრიანებული, იმ კომისიაში უნდა შესულიყავით," _ უპასუხა ძიმისტარაშვილმა ჩიგოგიძეს.
საკრებულოს სხდომაზე მესამე საკითხად განიხილეს "ქალაქ ოზურგეთის მუნიციპალიტეტის ქონების პირდაპირი განკარგვის წესით სარგებლობის უფლებით (აღნაგობის უფლებით) გაცემის თაობაზე" _ ქალაქ ოზურგეთის მუნიციპალიტეტის მერისათვის თანხმობის მიცემის შესახებ.
ამ საკითხთან დაკავშირებით სიტყვით ქალაქ ოზურგეთის მუნიციპალიტეტის მერიის ინფრასტრუქტურისა და ქონების მართვის სამსახურის უფროსმა მერაბ წივწივაძე გამოვიდა.
ადგილობრივ ბიზნესმენს, დავით ღლონტს ქალაქ ოზურგეთში, მერაბ კოსტავას ქუჩაზე, პირდაპირი განკარგვის წესით, 30 წლის ვადით გადაეცეს 50 კვმ. მიწის ნაკვეთი, სადაც მოაწყობს და ააშენებს თანამედროვე ტიპის კვების ობიექტს.
ტერიტორიის პირდაპირი წესით გადაცემის წინააღმდეგია დეპუტატი ლევან მგელაძე: "წერილით მოგმართავთ უახლოეს დღეებში, რომ სკვერები, პარკები მივიღოთ რეკრეაციულ ზონად. ტერიტორიის ასეთ ფორმაში 30 წლის ვადით გაცემა არ მიმაჩნია მართებულად. კიდევ ერთხელ გამოვხატავ ჩემს აზრს, რომ ყველა მსგავსი მოთხოვნის შემთხვევაში, გაიცეს აუქციონის წესით", _ თქვა ლევან მგელაძემ.
მგელაძეს უპასუხა ქალაქ ოზურგეთის მუნიციპალიტეტის საკრებულოს თავმჯდომარემ, გელა კობალაძემ: "ვალდებული ვართ, ხელი შევუწყოთ ნებისმიერ მოქალაქეს, რომელსაც აქვს საქმიანი წინადადება და უნდა, რომ გამოაცოცხლოს ქალაქ ოზურგეთში მდებარე ადგილები, თუ ამას გააკეთებს სტანდარტების სრული დაცვით და მინიმუმ, 3-4 ადამიანს დაასაქმებს".
მგელაძის თქმით, 30 წელი დიდი დროა: "თუ ასე გინდათ, რომ პირდაპირი წესით გადასცეთ მიწის ნაკვეთი დავით ღლონტს, გადაეცით 5-6 წლით _ ამ დროში შეძლებს მოგების ამოღებას", _ თქვა ლევან მგელაძემ.
მერაბ წივწივაძე ფიქრობს, რომ დავით ღლონტმა 5-6 წელიწადში შეიძლება ვერ ამოიღოს ის თანხა, რომლის დახარჯვას აპირებს: "40 000 ათასი ლარს დებს ადამიანი და 5 წელიწადში არ მგონია, ამოიღოს. მე ვერ ვხედავ აქ პრობლემას", _ უთხრა მგელაძეს მერაბ წივწივაძემ.
მგელაძე ფიქრობს, რომ "როცა ერთ პირთან ხდება გარიგება, შეიძლება ითქვას, რომ კორუფციასთან გვაქვს საქმე", რასაც ეწინააღმდეგება კობალაძე: "ეს შეფასება ნამდვილად მოკლებულია რეალობას. აქ არაფერ შუაშია კორუფცია", _ თქვა კობალაძემ.
საკრებულოს სხდომის დასასრულს, სიტყვით გამოვიდა დეპუტატი გოჩა ძიმისტარაშვილი: "მოგეხსენებათ, მე კატეგორიული წინააღმდეგი ვიყავი ჭავჭავაძისა და კიდევ 5 ქუჩაზე გაკეთებულიყო გზამყოფები, მაგრამ მიუხედავად ამისა, საკრებულოს უმრავლესობამ მისცა თანხმობა ქალაქის მერს ამ მართლაც უგვანო და საფრთხის შემცველი პროექტების გახორციელებაზე. ჩემი ბრძოლის შედეგად მივაღწიე იმას, მერმა გადაიფიქრა ხუთ ქუჩაზე ამ სისულელის გაკეთება".
ძიმისტარაშვილმა ორი მოთხოვნა წამოაყენა: "დაუყოვნებლივ აღებულ უნდა იქნას ის ტყე, უფრო სწორედ, ბუჩქები, რომელიც ამ გზაგამყოფზე არის გაშენებული, რადგანაც იგი 100%-ით უზღუდავს მხედველობის არეალს, როგორც მძღოლებს, ასევე, ფეხით მოსიარულეებს და თეატრის მოედნიდან რკინიგზის მოედნამდე გაერთიანდეს გზაგამყოფი", _ თქვა ძიმისტარაშვილმა, რომელსაც საკრებულოს თავმჯდომარე გელა კობალაძემ ასე უპასუხა: "დარწმუნებული ხართ, მერს ხელი ააღებინეთ მაგ პროექტზე? როცა თქვენ მობრძანდებით ხელისუფლებაში, შეგიძლიათ, მაშინ გააკეთოთ ეს. მანამდე კი, ოზურგეთში ყველა ქუჩა გალამაზდება."
