"კითხვა მაქვს ბიძინა ივანიშვილთან, თუ მურუსიძე მსხვერპლი იყო, მე მსხვერპლის მსხვერპლი ვარ თუ მოძალადე? _ ამის შესახებ თბილისის საქალაქო სასამართლოს ყოფილმა თავმჯდომარემ მამუკა ახვლედიანმა "გურია ნიუსთან" ინტერვიუში ისაუბრა.
მისი თქმით, ყოფილ პრემიერ-მინისტრს, ბიძინა ივანიშვილს იუსტიციის უმაღლესი საბჭოს მდივნის, ლევან მურუსიძის შესახებ გადაჭარბებული და არასწორი შეხედულება აქვს.
"კითხვა მაქვს ბიძინა ივანიშვილთან, თუ მურუსიძე მსხვერპლი იყო, მე მსხვერპლის მსხვერპლი ვარ თუ მოძალადე? მე ვინ ვიყავი მაშინ? თუ მოგეცემათ საშუალება, ეს ჰკითხეთ ბიძინა ივანიშვილს. თავისუფალი ადამიანი ვარ და მე პირადადაც ვკითხავ ამას, მართლა მაინტერესებს ამაზე პასუხი. ვფიქრობ, რომ ეს ადამიანი ძალიან ბევრ საკითხში შეცდომაშია შეყვანილი. აბსოლუტურად სხვა შეხედულებებს ანახებს თავისი გარემოცვა ამ საკითხების მიმართ. მე არ ვიცი, მას ვინ ურჩევთ მურუსიძეზე კარგი ისაუბროს. ვთვლი, რომ ყველაზე ცუდი, რაზეც შეიძლება მან ისაუბროს, ეს საკითხია. მე ასე ვხედავ ამ თემას. განა იმიტომ, რომ მურუსიძე ცუდია, დღევანდელი შექმნილი სიტუაციიდან გამომდინარე, შეიძლება მისი გადმოსახედიდან გადასარევი კაციც იყოს, გადასარევი გადაწყვეტილებებიც ჰქონდეს, მაგრამ შექმნილი სიტუაციიდან გამომდინარე, როცა აქცენტი კეთდება მის წარმატებაზე, ვფიქრობ, ამ სიტუაციაში შეცდომაა. მით უმეტეს, ერთი კონკრეტული გვარის ირგვლივ ტრიალი. ბატონ ბიძინას მინდა ვთხოვო, რომ კიდევ ერთხელ კარგად გადახედოს ამ თემას და დეტალურად შეისწავლოს რა ხდება სასამართლო სისტემაში", _ აღნიშნა მამუკა ახვლედიანმა ინტერვიუში.
შეგახსენებთ, რომ ბიძინა ივანიშვილმა ჟურნლისტებთან შეხვედრისას არაერთხელ ახსენა, რომ ლევან მურუსიძე წინა ხელისუფლების და სისტემის მსხვერპლი იყო.
14 ივნისის შეხვედრაზე ბიძინა ივანიშვილმა განაცხადა, რომ "მურუსიძე და ნებისმიერი მოსამართლე ადეიშვილის ჩამოყალიბებულ სისტემაში კრიტიკას ვერ გაუძლებს".
თუმცა, მისივე განმარტებით, წინა ხელისუფლების დროს, ვერცერთი განსხვავებული აზრის მქონე ადამიანი სისტემაში ვერ იმუშავებდა.
"პროკურატურა, სასამართლო იყო ერთი ჯგუფის მიერ მართული. მაგრამ ჩვენი მოსვლის შემდეგ, სწორი არჩევანი გავაკეთეთ, წარმოუდგენელი იყო ამდენი მოსამართლე. მესმის, რომ საშინელი ტრაგედია დატრიალდა საქართველოში . გირგვლიანი მოკლეს პოლიციელებმა. 12 წელი იყო მისჯილი ამ ხალხზე და პარლამენტმა გაუნახევრა სასჯელი, ამის შემდეგ პრეზიდენტი კიდევ უნახევრებს მათ სასჯელს. კიდევ სასამართლომ მოუკლო 6 თვე, რასაც ახლა მურუსიძეს ედავებიან. ისე აცხადებენ, თითქოს მურუსიძემ მოკლა ის კაცი. ამის შემდეგ სასჯელაღსრულების საბჭოს წარდგინებით საერთოდ გაათავისუფლეს ეს ხალხი", _ განაცხადა ივანიშვილმა და დასძინა, რომ მურუსიძის თემა "ნაციონალური მოძრაობის" აგორებულია.
"როგორც ჩანს, მურუსიძემ თავი დააღწია მათ ზეწოლას და ეს არ მოსწონს "ნაციონალურ მოძრაობას", _განაცხადა ივანიშვილმა
ამავე თემაზე:
მურუსიძეს იმიტომ აგინებენ, რომ მათ აღარ ემორჩილება – ივანიშვილი
ისე აცხადებენ, თითქოს მურუსიძემ მოკლა ის კაცი – ივანიშვილი გვირგვლიანის საქმეზე
"ივანიშვილი ალყაში ჰყავთ" _ ვინ აწვდის ექს-პრემიერს არასწორ ინფორმაციას? (ვიდეო)
ბიძინა ივანიშვილი ლევან მურუსიძეზე: "ეს ადამიანი არის ამის გარანტი"
ივანიშვილის ნაქები "ახალგაზრდა ადამიანი" _ გირგვლიანისა და მოლაშვილის საქმეების მოსამართლე
