ეროსი კიწმარიშვილის საქმის პასუხგაუცემელი კითხვები – რას ითხოვს გარდაცვლილის ოჯახი

ტელეკომპანია "რუსთავი2"-ის ყოფილი მფლობელის, ეროსი კიწმარიშვილის ძმის, ზურაბ კიწმარიშვილის განცხადებით, პროკურატურის მიერ გუშინ გამოქვეყნებული ინფორმაცია, რომ ეროსი კიწმარიშვილმა თვითმკვლელობით დაასრულა სიცოცხლე,  არ სჯერა.

აღნიშნულის მიზეზებზე კიწმარიშვილმა ადვოკატებთან ერთად დღეს, "კვირას" პრესკლუბში გამართულ პრესკონფერენციაზე განაცხადა.

ზურაბ კიწმარიშვილი გამორიცხავს, თვითმკვლელობის მოტივი შეიძლება ყოფილიყო ფინანსური პრობლემები ყოფილიყო, ან პირადი შურისძიება. გარდა ამისა, ის დარწმუნებულია, რომ თავისი ძმა შეკვეთილი მკვლელობის მსხვერპლი გახდა, რაც შესაძლოა მის საქმიანობასთან იყოს დაკავშირებული.

"სიკვდილამდე ცოტა ხნით ადრე ჩემთვის ეროსის ჰქონდა ნათქვამი, რომ აპირებდა პროცესებში ჩართვას, აპირებდა ბევრ ადამიანთან სამომავლო თანამშრომლობაზე საუბარს. ჰქონდა სურვილი, ჰქონოდა საკუთარი ტელესტუდია. თავდაპირველად ის აპირებდა "რუსთავი 2"-თან თანამშრომლობას. ეს ფაქტია და ამის დამალვა საჭირო არაა. მას ნიკა გვარამიასთან ჰქონდა კომუნიკაცია ჩვენი მეგობრის, დუდუ კურდღელიას საშუალებით. ეს არის ფაქტი და ამას დიდ მნიშვნელობას ვანიჭებ. ამ ორი მიმართულებით მისი აქტიური მსვლელობა მაფიქრებინებს, რომ ეს შესაძლოა გამოდგეს მოტივად", _ აღნიშნა კიწმარიშვილმა.

ამასთან, ეროსი კიწმარიშვილის ძმა ზურა კიწმარიშვილი აცხადებს, რომ ავტომობილი გასროლის მომენტში სხვაგან იყო. არგუმენტად კი ზურა კიწმარიშვილს ავტომობილის გარეთ სისხლის კვალის არ არსებობა მოჰყავს.

გარდა ამისა, ზურაბ კიწმარიშვილი მიიჩნევს, რომ ეროსი კიწმარიშვილის "სკაიპისა" და "ფეისბუქის" ანგარიშების შესწავლა მნიშვნელოვანი შეიძლება ყოფილიყო სიმართლის დასადგენად. გამოძიებას ასევე არ აქვს დადგენილი, თუ რას აკეთებდა კიწმარიშვილი კომპიუტერში გარდაცვალებამდე რამდენიმე საათით ადრე. როგორც ცნობილია, ის სიკვდილამდე რამდენიმე საათი კომპიუტერზე მუშაობდა.

ზურაბ კიწმარიშვილი ასევე იმაზეც ამახვილებს ყურადღებას, რომ გამოძიებამ ამ დრომდე ვერ დაადგინა, ვის ეკუთვნოდა მკვლელობის იარაღზე არსებული დნმ.

როგორც აღნიშნულთან დაკავშირებით კიწმარიშვილების ოჯახის ადვოკატმა მერაბ ჩიქოვანმა განაცხადა, იარაღის სასხლეტზე ორი დნმ-ის კვალია აღმოჩენილი.

"იარაღზე აღმოჩენილია დნმ-ის კვალი. ეს დნმ იარაღის ლულაზე ეკუთვნის ეროსი კიწმარიშვილს, ხოლო სასხლეტზე აღმოჩენილია დნმ-ის ორი კვალი. პროკურატურა გადაჭრით ამტკიცებს, რომ ერთ-ერთი ეკუთვნის ეროსი კიწმარიშვილს, თუმცა, ექსპერტიზა ამ ფაქტთან რადიკალური არ არის და ამბობს, რომ შესაძლოა სასხლეტზე აღმოჩენილი კვალი ეკუთვნოდეს ეროსი კიწმარიშვილს. კითხვა ჩნდება, თუ რატომ არის პროკურატურა ასე დარწმუნებული აღნიშნულში", _ განაცხადა ჩიქოვანმა.

გარდა ამისა, ზურაბ კიწმარიშვილი ამბობს, გამომძიებლებმა განაცხადეს, რომ შეუძლებელი იყო იმის დადგენა, თუ ვის ეკუთვნოდა ფარეხში არსებულ სათვალთვალო კამერაზე არსებული ანაბეჭდები. როგორც ცნობილია, აღნიშნული კამერა ეროსის მანქანას უყურებდა მუდმივად, თუმცა, მკვლელობის დღეს სხვა მხარეს იყო მიტრიალებული.

ადვოკატ მერაბ ჩიქოვანის თქმით კი, მათი დაჟინებული თხოვნის მიუხედავად, პროკურატურამ დაუყონებლივ არ შეისწავლა იმ სატელეფონო ანძების ამონაწერები.

აღნიშნული პროკურატურამ თვეების მერე გააკეთა და პროცესი წელიწადზე მეტხანს გაგრძელდა. გარდა ამისა, ეროსი კიწმარიშვილის ოჯახი ითხოვდა ამ თემაზე პროკურატურის დასკვნის შესწავლას, რაზეც მათ უარი უთხრეს.

ადვოკატიც აღნიშნავს, რომ ასევე მნიშვნელოვანი დეტალი ეხება ეროსი კიწმარიშვილის კომპიუტერის შესწავლას.

"პროკურატურამ ასევე თვეების დაგვიანებით შეისწავლა ეროსი კიწმარიშვილის კომპიუტერი, რის შემდეგაც აღმოჩნდა, რომ 2015 წლის 8 იანვარს უცნობმა პირმა მის ფეისბუკში უკანონოდ შეაღწია. კიწმარიშვილის ოჯახი ეჭვობს, რომ ამ პირმა მნიშვნელოვანი ინფორმაცია წაშალა, რადგან იქ არ იყო ის მიმოწერები, რომლებიც ნამდვილად არსებობდა", _ აღნიშნა მერაბ ჩიქოვანმა პრესკონფერენციაზე.

ცნობისთვის, საქართველოს მთავარმა პროკურატურამ გუშინ განაცხადა, რომ ეროსი კიწმარიშვილის გარდაცვალების მიზეზი თვითმკვლელობა გახდა, რის გამოც საგამოძიებო უწყებამ საქმე შეწყვიტა.