საქართველოს რეგიონული განვითარებისა და ინფრასტრუქტურის მინისტრის მოადგილის, თენგიზ შერგელაშვილის ქონებრივ დეკლარაციაში წლიური შემოსავლის თანხად ნახევარ მილიონ ლარზე მეტია მითითებული.
დეკლარაციის მიხედვით, რომელიც შერგელაშვილმა 22 ივნისს შეავსო აღნიშნულია, რომ მან გასულ, 2015 წელს, შემოსავლის სახით სამინისტროდან 745 540 ლარის შემოსავალი მიიღო. თუმცა, შერგელაშვილი "გურია ნიუსთან" საუბრისას განმარტავს, რომ დეკლარაციის შევსებისას შეცდომა დაუშვა და მასი შემოსავალი სამინისტროდან 74 554 ლარი იყო.
"მექანიკური შეცდომა მაქვს დაშვებული, ერთი ნულია ზედმეტი ბოლოში. უკვე დავურეკე და წერილითაც მივმართავ საჯარო სამსახურის ბიუროს. შემოსავალი უნდა იყოს 74 554 ლარი. მაგდენი რომ მქონდეს შემოსავალი… შეგიძლიათ გამოაქვეყნოთ, აქტივების სიმცირით და ვალდებულებების მოცულობით პირველ ადგილზე ვიქნები დეკლარანტებს შორის", _ აღნიშნავს შერგელაშვილი.
დეკლარაციის მიხედვით, შერგელაშვილი უძრავ-მოძრავ ქონებას არ ფლობს. რაც შეეხება მის ფინანსურ მდგომარეობას, დეკლარაციის შევსებისას რესპუბლიკა ბანკის საკრედიტო ანგარიშზე 5 411.78 ლარი (დებეტი(-) ჰქონდა,
"თი–ბი–სი ბანკის" სახელფასო (ოვერდრაფტი) ანგარიშზე – 3602.38 ლარი; "ბაზის ბანკის" საკრედიტო ანგარიშზე 5012.95 ლარი ხოლო "ლიბერთი ბანკის" საკრედიტო ანგარიშზე 4998.71 ლარი.
შერგელაშვილის სახელზე 5 სესხია, რომელთა პროცენტების დასაფარად საერთო ჯამში გასულ წელს 42 434.05 ლარი გადაუხდია.
გარდა ამისა, დეკლარაციაში არნიშნულია, რომ თენგიზ შერგელაშვილს შვილის სწავლის საფასურისთვის 1600 დოლარის გასავალი ჰქონდა, ხოლო დასვენებისთვის 3 200 დოლარი გადაუხდია.
რაც შეეხება მინისტრის მოადგილის წინა წლების შემოსავლებს, როგორც საჯარო სამსახურის ბიუროს ვებ-გვერდზე განთავსებული დეკლარაციებიდან ირკვევა, 2014 წელს შერგელაშვილის შემოსავალი – 72084 ლარი ყოფილა, 2013 წელს – 73750 ლარი; 2012 წელს კი – 73750 ლარი.
ამავე თემაზე:
დაარღვია თუ არა კანონი ოზურგეთის გამგებელმა
მოწმდება თუ არა თანამდებობის პირების ქონებრივი დეკლარაციის სიზუსტე
თანამდებობის პირთა ქონებრივი დეკლარაციების წარდგენასთან დაკავშირებული დარღვევები
