“ოქროს ფონდშია შესული ჩემი ჩანაწერები” _ მომღერალი, რომელმაც “ოცნების” ყრილობაზე ჰიმნი შეასრულა

პარტია "ქართული ოცნება-დემოკრატიული საქართველოს" ახალგაზრდული ფრთის ყრილობაზე შესრულებული საქართველოს ჰიმნი განხილვის თემად იქცა.

მომღერალი, რომელმაც ჰიმნი შეასრულა ირმა ბერძენიშვილია, რომელიც ჩოხატაურის მუნიციპალიტეტიდანაა.

მას წლების განმავლობაში მსოფლიოს არაერთ საოპერო სცენაზე მაყურებელი ოვაციებით ხვდებოდა და დამსახურებულ აპლოდისმენტებსაც იღებდა.

გერმანია, იტალია _ გასული ათი წლის განმავლობაში სწორედ ამ ქვეყნებში მოღვაწეობდა ირმა ბერძენიშვილი.

როგორც ambebi.ge-სთან საუბრისას ბერძენიშვილმა აღნიშნა იმის გამო, ხელისუფლებაში ნაცნობები არ ჰყავდა, "ნაციონალებისგან" განდევნილი ოპერის თეატრში დღემდე არავის დაუბრუნებია:

_ მე ჯანსუღ კახიძემ მიმიღო თეატრში, ოქროს ფონდშია შესული ჩემი ჩანაწერები. პროტეჟე ნამდვილად არ მჭირდებოდა, _ აღნიშნა სააგენტოსთან საუბრისას ბერძნიშვილმა.

მისივე განმარტებით, დარბაზში "ხმა მოდიოდა ძალიან შორიდან და დაგვიანებით": 

_  ხმას ვერ ვაკონტროლებდი, დიდი სტრესი მივიღე სცენაზე. სამწუხაროდ, არ მქონია რეპეტიციის გავლის საშუალება. პირდაპირ შევედი სცენაზე. ამის გამო მოხდა ყველაფერი, სხვა თემაა, ჰიმნის შესრულების დროს რასაც გრძნობს მომღერალი.

 ხმის რეჟისორმა თქვა, რომ აპარატურის ადგილს ვერ შეუცვლიდნენ, რადგან პროტოკოლით იყო გათვალისწინებული, სად იქნებოდა აპარატურა.

სამი ვარიანტი მქონდა, ან უნდა მემღერა ცოცხლად, ან პლიუსზე ან საერთოდ არ უნდა მემღერა. ვიფიქრე ამ პირობებში სიმღერაზე უარს თუ ვიტყვი, ამას პირად კაპრიზად ჩამითვლიან-თქო და საბოლოოდ ასეთი ცუდი გამოვიდა ყველაფერი.

საოპერო მომღერალი ვარ და ფონოგრამაზე პირველად ვიმღერე, ამას სხვა სპეციფიკა სჭირდება, ვერ გავთვალე რისკ-ფაქტორები და მივიღე დიდი სტრესი, _ აღნიშნა ბერძენიშვილმა.

მისივე თქმით, ყრილობაზე ჰიმნის შესასრულებლად ოპერიდან დაუკავშირდნენ:

_ოპერიდან დამიკავშირდნენ და დავთანხმდი. როცა ავიღე ჩანაწერი, ვთქვი, რომ ეს ჰიმნი მამაკაცის ხმაზე არის მორგებული. სახლში კი გავდიოდი რეპეტიციებს, მაგრამ დარბაზში რეპეტიციების გავლის საშუალება არ მომეცა. ყურის მიკროფონიც კი არ მქონდა, მე პირველად არ მიმღერია, ვინც არ მიცნობს, მისთვის საქილიკოა რაც მოხდა, მაგრამ რას ვიზამთ, ასეც ხდება. ჩემი პიროვნული ღირსებები დაზარალდა, მაგრამ რაც შემეძლო მაქსიმალური გავაკეთე. ამით არც იწყება და არც მთავრდება ყველაფერი. რაც მოხდა, მოხდა, _ აცხადებს მომღერალი.

"გურია ნიუსი" გთავაზობთ ირმა ბერძენიშვილის შესრულებით სხვადასხვა არიებს.