"არტ-გენი 2016"-მა ბოლნისიდან სტარტი აიღო. პირველი რეგიონული ტურნე ბოლნისში ჯგუფების "ფრანის" და "რეგიონის" კონცერტით დასრულდა. ფესტივალზე წარმოდგენილი იყო ქართული რეწვის და თანამედროვე ხელოვნების ნიმუშების გამოფენა, რეგიონული ანსამბლების ფოლკლორული კონცერტი და , "შავფაროსნების" ქართული საბრძოლო ხელოვნების შოუ.
1 ივლისს, ფესტივალი "ფრანთან" და "შავფაროსნებთან" ერთად შიდა ქართლში, სურამში გადაინაცვლებს.
3 ივლისს კი "არტგენი 2016"-ის რეგიონული ტურნე აჭარაში, ქობულეთის ამფითეატრში ჯგუფ "რეგიონის" კონცერტით დაიხურება.
ფესტივალის დასკვნითი ნაწილი, თბილისის ტური, ტრადიციულად გიორგი ჩიტაიას სახელობის ეთნოგრაფიულ მუზეუმში 10-17 ივლისს გაიმართება. რვა დღის განმავლობაში 12:00 საათიდან, ეთნოგრაფიულ მუზეუმში მთელი დღის განმავლობაში მოეწყობა ხალხური რეწვის და თანამედროვე ხელოვნების გამოფენები. 19:00-22:00 საათამდე სხვადასხვა რეგიონის მონაწილეობით ფოლკლორული კონცერტები გაიმართება. 22:00 საათიდან კი მაყურებელი ანსამბლ "სუხიშვილების", "ჩვენებურების", ჯგუფ "რეგიონის", "გამოუვალი მდგომარეობის" "ფრანის" რობი კუხიანიძის, "აუტსაიდერის", ნინო ქათამაძის, "ინსაითის" ნიაზ დიასამიძის და "33 ა"-ს კონცერტებზე დასწრებას შეძლებს. "ჩექინ ჯორჯიას" პროექტის ფარგლებში ფესტივალი საქართველოს კულტურისა და ძეგლთა დაცვის სამინისტროს და თბილისის მერიის კულტურული ღონისძიებების ცენტრის მხარდაჭერით ხორციელდება.
13 წლის მანძილზე "არტ-გენმა" მთელი საქართველოს მასშტაბით, უნიკალური ეთნოგრაფიული მასალები მოიკვლია და დააარქივა. მათ შორის დაკარგვის პირას მყოფი, ბევრი უნიკალური მასალა.
ორგანიზატორების ცნობით, "არტ-გენის" დამსახურებით ფოლკლორულ ანსამბლებს თავის წარმოჩენის და განვითარების კარგი შესაძლებლობა მიეცათ, განსაკუთრებით რეგიონებში. ფესტივალმა ხელი შეუწყო ასევე ქართული რეწვის და სხვა ტრადიციული ქართული ხელობის განვითარებას. სწორედ ამ ფესტივალის წყალობით გაიცნო საზოგადოებამ დღეს უკვე ძალიან ცნობილი ბევრი ახალგაზრდა მუსიკოსი, ჯგუფი და შემსრულებელი. ფოლკლორისა და თანამედროვე ხელოვნების გაერთიანებით "არტ-გენმა" წლების მანძილზე განსაკუთრებული წვლილი შეიტანა ქართული ფოლკლორის პოპულარიზაციასა და ცოცხალი მუსიკის განვითარებაში.
