ოზურგეთის მუნიციპალიტეტის სოფელ მერიაში მცხოვრები ორი შვილის დედა _ თეონა ლომთათიძე საზოგადოებას დახმარებით მიმართავს.
"მრცხვენია უკვე, იმდენჯერ მივმართე ადგილობრივ ხელისუფლებას. 12 წლის ბიჭი მყავს და აუცილებლად სჭირდება სამედიცინო გამოკვლევები, რომელიც შეიძლება, ლანჩხუთში ჩაუტარდეს. ბავშვი ძალიან აგრესიულად არის განწყობილი ყველას მიმართა და ღამით არ ძინავს. ამისთვის 150 ლარამდე გვჭირდება", _ გვითხრა თეონა ლომთათიძემ.
თეონა ლომთათიძეს და მის მეუღლე პაატა ბილიხოძეს სოფელ მერიაში ყოფილ სამხედრო ქალაქში სამოთახიანი ბინა გადაეცა.
"სოციალურად დაუცველები ვართ. სახლში არავინ ვმუშაობთ. ჯანმრთელი მხოლოდ ჩემი ქალიშვილია _ მეც წამლები მჭირდება და ჩემი მეუღლესაც. შემოქმედელი მიტროპოლიტი და მონაზვნები მეხმარებიან.
ოზურგეთის მუნიციპალიტეტის გამგეობამ საცხოვრებელ ბინაში მოგვცა ოთახები თუმცა, სოციალური დახმარება შემიჩერდა, რადგან ახალ სახლში გადავედით საცხოვრებლად. 204 ლარს ვიღებდით და იქიდან 185 ლარის წამალი ერთ თვეს არ გვყოფნიდა.
ჩემი მეუღლე ხანდახან მუშაობს, დროებით სამუშაოები თუ გამოჩნდება, მიდის, მაგრამ ხშირად იქაც ვერ ახერხებს მისვლას, რადგან ფიზიკურად არ შეუძლია დიდი ხნით მუშაობა. აღარ ვიცი, რა გავაკეთო, ძალიან მიმძიმს. უფრო მეტად წამლები გვჭირდება _ წამლებში უფრო მეტ თანხას ვხარჯავთ, ვიდრე _ საჭმელში", _ ამბობს ჩვენთან საუბრისას თეონა ლომთათიძე.
მისი თქმით, მას ხშირად დაუწერია სოციალურ ქსელში განცხადება საზოგადოების დახმარების იმედზე:
"2014-15 წლებში ოჯახმა, განცხადების საფუძველზე, გამგებლის სარეზერვო ფონდიდან მიიღო 200-200 ლარის დახმარება მედიკამენტებისა და სხვა დანიშნულებისათვის, ასევე, ოჯახს გადაეცა სხვადასხვა საყოფაცხოვრებო ნივთი", _ გვითხრა ოზურგეთის მუნიციპალიტეტის გამგეობის განათლების, ახალგაზრდობის საქმეთა და სოციალური დაცვის სამსახურის უფროსმა მაიზერ ცელაძემ.
ცელაძის თქმით, "2016 წლის გაზაფხულზე, აღნიშნულმა ოჯახმა, როგორც სოციალურად შეჭირვებულმა, ოზურგეთის მუნიციპალიტეტის გამგეობიდან მიიღო 135 ლარის ღირებულების პროდუქტები, ხოლო აპრილში ოზურგეთის მუნიციპალიტეტის საკრებულოს 2015 წლის 20 ნოემბრის #39 დადგენილების _ "ოზურგეთის მუნიციპალიტეტის ტერიტორიაზე მცხოვრებ პირთა (ოჯახთა) საცხოვრისით უზრუნველყოფის შესახებ", შესაბამისად, როგორც უსახლკარო ოჯახს, სოფელ მერიაში, დროებით სარგებლობაში გადაეცა 3-ოთახიანი ბინა".
