სამწუხაროდ, საქართველოში მედიაწიგნიერებას ნაკლები ყურადღება ეთმობა; ხშირია საუბარი, რომ ტექნოლოგიური საშუალებები და ინფორმაცია, რეგიონებში, განსაკუთრებით სოფლებში ჯერ კიდევ ხელმიუწვდომელი და დეფიციტურია.
სწორედ ამ მიზნით, ჯერ კიდევ მარტში, არასამთავრობო ორგანიზაციებმა “საქართველოს განვითარების კვლევითმა ინსტიტუტმა” და “Post-ალიონმა” ერთობლივი პროექტის გახორციელება დაიწყეს.
პროექტის ძირითადი მიზანია, საქართველოს სოფლებში შეიქმნას მედიაწიგნიერების ცენტრები, ერთგვარი ტექნოლოგიური ოაზისები, სადაც მოსახლეობისთვის შესაძლებელი იქნება ინფორმაციის წვდომა, როგორც ტრადიციული საშუალებებით, ისე უახლესი ტექნოლოგიებით. ამ ცენტრებში დაინტერესებული ადამიანები უახლეს ინფორმაციას მიიღებენ გაზეთების, ბროშურების, წიგნების, ინტერნეტის, სოციალური ქსელების, სატელიტური ანტენების საშუალებით.
პროექტის გახორციელება საქართველოში გურიიდან დაიწყო _ ჩოხატაურის, ლანჩხუთისა და ოზურგეთის რამდენიმე სოფელში უკვე ფუნქციონირებს მსგავსი ცენტრები. მათი მომსახურება ძალიან მნიშვნელოვანია სოფლის მოსახლეობისთვის, რადგან ქართული სოფლების მოსახლეობის 90%-ზე მეტს ხელი არ მიუწვდება ინტერნეტზე, მაუწყებლობს მხოლოდ ორი არხი (სამწუხაროდ, საზოგადოებრივი მაუწყებლის ჩვენებაც კი შეზღუდული და ხარვეზიანია), უსახსრობის გამო კი, მოსახლეობის დიდ ნაწილს არ შეუძლია ჟურნალ-გაზეთების, ახალი გამოცემების შეძენა.
მედიაწიგნიერების ცენტრები ის ადგილებია, სადაც მეზობლები, თანასოფლელები ერთმანეთს არაფორმალურ გარემოში შეხვდებიან, საშუალება ექნებათ წაიკითხონ სასურველი პრესა, უყურონ ნებისმიერ ტელეარხს, ისარგებლონ სოციალური ქსელებით, მოიძიონ მათთვის საჭირო ინფორმაცია, ამობეჭდონ, დაასკანერონ, გადაიღონ დოკუმენტების ასლები და, რაც მთავარია, ყველაფერი ეს უფასოდ გააკეთონ.
პროექტის ერთ-ერთი აუცილებელი პირობაა არ მოხდეს მედია წიგნიერების ცენტრების გამოყენება პოლიტიკური საქმიანობისთვის, რომელიმე პოლიტიკური სუბიექტის რეკლამის და მისი მხარდაჭერისკენ მოწოდებისთვის. ცენტრში თავშეყრილ ადამიანებს ექნებათ იმის საშუალება, რომ გამოხატონ საკუთარი პოლიტიკური შეხედულებები, პლურალისტურ გარემოში მოუსმინონ ერთმანეთს, იკამათონ, იმსჯელონ, მაგრამ რომელიმე პოლიტიკური პარტიის აქტივისტი ან წევრი მედია წიგნიერების ცენტრში ვერ განახორციელებს პარტიულ საქმიანობას, ვერ ჩაატარებს სააგიტაციო ხასიათის შეხვედრებს _ მედიაცენტრები თავისუფალი უნდა იყვნენ პოლიტიკური ზეგავლენიდან.
გასულ კვირაში, ჩოხატაურსა და ლანჩხუთში, ორი ასეთი ცენტრის პრეზენტაცია მოეწყო. ჩოხატაურის მუნიციპალიტეტის სოფელ წიფნარის მედიაწიგნიერების ცენტრის ხელმძღვანელი, ფიქრია ბეღელაძე კმაყოფილია მოსახლეობის აქტიურობით. მეზობლები ხშირად იკრიბებიან _ ზოგი ავღანეთში მყოფ შვილს ეკონტაქტება სკაიპით, სხვას დოკუმენტების ქსეროასლები ესაჭიროება, ზოგი განცხადების დაწერაში ითხოვს დახმარებას, ზოგიერთს კი, უბრალოდ, ტელევიზორის ყურება სურს.
სასიამოვნოა, რომ პირველივე პრეზენტაციას ხელისუფლების წარმომადგენლები ესწრებოდნენ; ჩოხატაურის გამგებელი ლელა იმედაშვილი, საკრებულოს თავმჯდომარე ანტონ ხუნდაძე წიფნარის მედია წიგნიერების ცენტრის პირველი სტუმრები იყვნენ და საკუთარი დადებითი შეფასებაც გამოთქვეს ამგვარი პროექტების მიმართ. ლელა იმედაშვილის თქმით, მსგავსი პროექტის _ “იუსტიციის სახლები სოფლებში”, გახორციელებას ხელისუფლებაც გეგმავს.
“Post-ალიონის” ხელმძღვანელი ია მამალაძე: _ რაც უფრო მეტ შესაძლებლობას მივცემთ მოსახლეობას მიიღოს ინფორმაცია და იაფი სერვისი ადგილებზე, ეს ქვეყნის განვითარების პროცესს მით უფრო დააჩქარებს; ამიტომ, ამ იდეის ნებისმიერი მიმართულებით გაფართოება მხოლოდ მისასალმებელია, ნებისმიერ პოლიტიკურ თვალსაზრისზე მაღლა უნდა დავაყენოთ და სახელმწიფოებრივ ჭრილში შევხედოთ.
მოგვიანებით, ცენტრის სტუმრები იყვნენ საქართველოს განვითარების ინსტიტუტის საბჭოს თავმჯდომარე თეონა აქუბარდია, ინსტიტუტის თანამშრომლები, ექსპერტები, მედიაწიგნიერების სხვა ცენტრების ხელმძღვანელები.
წიფნარის შემდეგ, ორგანიზატორებმა და სტუმრებმა ლანჩხუთის რაიონის სოფელ აკეთში გადაინაცვლეს, სადაც კიდევ ერთი მედიაწიგნიერების ცენტრის პრეზენტაცია მოეწყო, რომელსაც აკეთელი ახალგაზრდა, შალვა ღლონტი ხელმძღვანელობს. მოწვეული სტუმრებიდან პრეზენტაციას ლანჩხუთის მუნიციპალიტეტის საკრებულოს თავმჯდომარის მოადგილე, ზვიად აფხაზავა ესწრებოდა, რომელმაც მონაწილეობა მიიღო ექსპერტების _ თენგიზ შერგელაშვილისა და ლევან იზორიას მიერ წარმოდგენილი ადგილობრივი თვითმმართველობის და სახელმწიფო უსაფრთხოების კონცეფციების განხილვაში. შეხვედრის მონაწილეებმა ისაუბრეს, თუ როგორ უნდა მოხდეს თვითმმართველობის ინსტიტუციური გაძლიერება, როგორ ხედავენ შინაგან საქმეთა სამინისტროს დეპოლიტიზაციის, სახელმწიფო უსაფრთხოების განმტკიცების და მოქალაქეთა სამსახურში ჩაყენების შესაძლებლობებს.
