ოზურგეთის ალ. წუწუნავას სახელობის დრამატული თეატრი, 5 ივლისიდან 15 ივლისის ჩათვლით, ნოდარ დუმბაძის საერთაშორისო თეატრალურ ფესტივალს უმასპინძლებს, რომლის დამფუძნებლებია: ოზურგეთის თეატრი, საქართველოს კულტურის სამინისტრო და ქალაქ ოზურგეთის მერია.
" ის ფაქტი, რომ გურიაში ფუძნდება სახელოვანი მწერლის ფესტივალი, მრავლისმთქმელია. ფესტივალის ფარგლებში ოზურგეთს 20-ზე მეტი პროფესიული თეატრის დასი ეწვევა. პროექტის მიზანია, ხელი შეუწყოს ქართული კლასიკური მწერლობის პოპულარიზაციას, სახელოვანი მწერლის ნოდარ დუმბაძის სახელის უკვდავყოფას. ფესტივალის ფარგლებში დაგეგმილია ნოდარ დუმბაძის იუბილე, _ 14 ივლისი სახელოვანი მწერლის დაბადების დღეა, რომელიც ჩოხატაურში, მწერლის სახლ-მუზეუმში შედგება. ასევე მოხდება ჩოხატაურის სახალხო თეატრის სპექტაკლის ჩვენება. ფესტივალში მონაწილეობას მიიღებს ლიტვური თეატრი, რომელიც, საპატიო სტუმრის სტატუსით, მაყურებელს წარუდგენს ნოდარ დუმბაძის ნაწარმოებების მიხედვით დადგმულ სპექტაკლს "გამარჯობა, ხალხო", _ თქვა თეატრის სამხატვრო ხელმძღვანელმა ვასილ ჩიგოგიძემ პრესკონფერენციაზე, ჟურნალისტებთან და კულტურის მუშაკებთან შეხვედრისას.
რეჟისორმა გიზო ჟორდანიამ ოზურგეთის სახელმწიფო თეატრი შეაფასა, როგორც მაღალორგანიზებული მხატვრული კოლექტივი, რომელიც პროფესიონალთა გუნდითაა დაკომპლექტებული.
"ეს დასი საკუთარი ნიშით განსხვავდება სხვა თეატრებისგან. აქ მუშაობენ პროფესიონალი მსახიობები, რომლებიც არიან შესანიშნავი ადამიანები. მე მიხარია მათთან რეპეტიციაზე შესვლა," _ განაცხადა ცნობილმა მაესტრომ.
ქალაქ ოზურგეთის მერმა ბეგლარ სიორიძემ აღნიშნა, " როცა ბავშვობაში ნოდარ დუმბაძის ნაწარმოებებს ვკითხულობდით, სიცილით ვკვდებოდით, ახლა ვკითხულობთ და ვხედავთ, ვგრძნობთ, რამხელა სიბრძნე დევს თითოეულ ფრაზაში. მიხარია და ვამაყობ, რომ ოზურგეთი მასპინძლობს ასეთ ფესტივალს და მჯერა, ეს ფესტივალი გახდება საზომი ჩვენი ქალაქის ნიშანდობლიობისა. მართალია, ჩვენ ჯერ კიდევ ბევრი გზა და გაზი გვაქვს გასაყვანი, თუმცა სულიერებას მაინც უპირველესი ადგილი უჭირავს ადამიანის, ერის ცხოვრებაში. ამიტომ იდგმება ეს ნაბიჯი და ტარდება ნოდარ დუმბაძის საერთაშორისო თეატრალური ფესტივალი, რომელიც, ალბათ, არცერთ ადამიანს არ დატოვებს გულგრილს და თეატრი მუდამ იქნება სავსე ერთგული მაყურებლით," _ თქვა მერმა.
პრესკონფერენციის შემდეგ ოზურგეთის სახელმწიფო თეატრის დიდ სცენაზე "ბოშები" წარმოადგინეს, რომლის სცენური ვერსიის ავტორი რეჟისორი გიზო ჟორდანიაა. დარბაზი სავსე იყო მაყურებლით.
ნოდარ დუმბაძის საერთაშორისო ფესტივალს დახურავს ქართულ-ლიტვური პროდუქცია, ოზურგეთის და პანევეჟისის თეატრების ერთობლივი სპექტაკლი "გამარჯობა, ხალხო", სადაც ნოდარ დუმბაძის პოპულარულ და ყველასთვის საყვარელ პერსონაჟებს ლიტველი და და ქართველი მსახიობები ერთდროულად გააცოცხლებენ.
