მეუღლისა და მცირეწლოვანი შვილის მკვლელობაში ბრალდებული მაგდა პაპიძის საქმეზე ნაფიცმა მსაჯულებმა გამამტყუნებელი ვერდიქტი გამოიტანეს.
დაახლოებით ორსაათნახევრიანი მსჯელობის შემდეგ თორმეტივე ნაფიცმა მსაჯულმა ერთხმად მიიღო გადაწყვეტილება და ბრალდებული მაგდა პაპიძე ოჯახური დანაშაულის ჩადენასა და განზრახ მკვლელობაში დამნაშავეა.
ნაფიცი მსაჯულების ვერდიქტს მოკლული ომარ ქაფიაშვილის ახლობლები და ოჯახის წევრები ტაშით შეხვდნენ. მოკლულის დედამ, დარეჯან მინდიკაურმა კი ბრალდებულს დარბაზიდან გასვლის წინ მკვლელი უწოდა.
პაპიძის საქმის პროკურორის დავით ნეფარიძის შეფასებით, ნაფიცი მსაჯულების მიერ მიღებული გადაწყვეტილება უპრეცედენტოა. როგორც ნეფარიძემ სასამართლო პროცესის დასრულების შემდეგ ჟურნალისტებთან განაცხადა, ნაფიცი მსაჯულების მიერ გამოტანილი ვერდიქტი "ღირსეული პასუხი იყო ბრალდებულის მიერ ჩადენილი სასტიკი დანაშაულის წინააღმდეგ".
"ბრალდების მხარეს ნამდვილად ჰქონდა ნაფიცი მსაჯულების რწმენა, რომ ისინი შეძლებდნენ ობიექტური და სამართლიანი გადაწყვეტილების მიღებას. ბრალდების მხარის რწმენა აბსოლუტურად გამართლდა. მათ შესაბამისი და ადეკვატური პასუხი გასცეს ბრალდებულის მიერ ჩადენილ ქმედებას, როდესაც მაგდა პაპიძემ ქმარი და 5 წლის შვილი საკუთარი ხელით გამოასალმა სიცოცხლეს. ნაფიცი მსაჯულების ეს გადაწყვეტილება, როდესაც მათ ერთხმად სცნეს დამნაშავედ ბრალდებული წარდგენილ ყველა ბრალდებაში, უპრეცედენტოა", _ აღნიშნა დავით ნეფარიძემ.
მსაჯულების ვერდიქტს არ ეთანხმებიან მაგდა პაპიძის ოჯახის წევრები. როგორც პაპიძის დამ, ლანა პაპიძემ სასამარტლო სხდომის დასრულების შემდეგ განაცხადა, პროკურატურას დაშინებული ჰყავდა საქმის მოწმეები.
"პროკურატურამ დამიშინა ყველა მეგობარი. გვემუქრებოდა ჩვენ, ჩემს ქმარს. პროკურატურას ყველა კარგად ჰყავდა დამუშავებული. თორნიკეს სისხლი ყველა ნაფიცი მსაჯულის კისერზეა", _ განაცხადა ლანა პაპიძე.
რაც შეეხება მაგდა პაპიძის სასჯელს, სასჯელის დანიშვნის სხდომა ნაფიცი მსაჯულების მონაწილეობის გარეშე ჩატარდება.
მხარეები ნაფიცი მსაჯულების მონაწილეობაზე დღევანდელ სხდომაზე ვერ შეთანხმდნენ. ბრალდების მხარე მომხრე იყო, რომ სასჯელის დანიშვნის სხდომა ნაფიცი მსაჯულების მონაწილეობით გამართულიყო. დაცვის მხარემ კი აღნიშნა, რომ მათ სურთ პაპიძეს სასჯელი მოსამართლემ დაუნიშნოს.
სასჯელის დანიშვნის სხდომა მოსამართლე ეკატერინე გაბრიჩიძემ 6 ივლისს ჩანიშნა.
წარდგენილი ბრალდების მიხედვით, მაგდა პაპიძეს 16-დან 20 წლამდე ან უვადო პატიმრობა ემუქრება. სასჯელის ზომას, ნაფიც მსაჯულთა რეკომენდაციის საფუძველზე, მოსამართლე განსაზღვრავს.
ამ მიზნით სასამართლო სხდომა 6 ივლისს, 11.00 საათზეა ჩანიშნული.
მაგდა პაპიძე მეუღლისა და შვილის მკვლელობის ბრალდებით 2015 წლის 20 დეკემბერს დააკავეს. ბრალდების თანახმად, 2015 წლის 19 დეკემბერს, ღამის საათებში, თბილისში, გ.ფერაძის ქუჩის N6-ში მდებარე საცხოვრებელი სახლის N10 ოთახში მაგდა პაპიძემ, თავის არეში მკვრივი ბლაგვი საგნის – უროს ჩარტყმით მოკლა მეუღლე ომარ ქაფიაშვილი და გაგუდა მცირეწლოვანი შვილი – 2010 წელს დაბადებული თორნიკე ქაფიაშვილი, რის შემდეგაც დანაშაულის კვალის წაშლას შეეცადა.
ამავე თემაზე:
მაგდა პაპიძის საქმეზე არასამთავრობოები განცხადებას ავრცელებენ
მაგდა პაპიძის დედასა და გარდაცვლილ ომარ ქაფიაშვილის ახლობელს შორის ფიზიკური დაპირისპირება მოხდა
მოწმეებს უნდა აეკრძალოთ მედიასთან საუბარი – ანა დოლიძე
"ეს არ გაძლევთ უფლებას თქვენც მოკლათ, თქვენ დასაჯოთ-ჩაქოლოთ" _ კობახიძე ჟურნალისტებს მიმართავს
საზოგადოებას მარტო ის აინტერესებს ქალიშვილი იყო თუ არა ცოლი
მაგდა პაპიძის საქმეზე სასამართლო განცხადებას ავრცელებს
