ლანჩხუთის მუნიციპალიტეტის მთავარ საფინანსო დოკუმენტში მორიგი ცვლილების გასახორციელებლად საკრებულომ ადმინისტრაციული წარმოების დაწყებას დასტური მისცა. თუმცა, ერთ-ერთი, ვინც, საკითხს მხარი არ დაუჭირა, ნიგოითის ადმინისტრაციული ერთეულის მაჟორიტარი დეპუტატი თემურ ალექსაია იყო, რომელიც საკრებულოში "ქართულ ოცნებას" წარმოადგენს.
როგორც გაირკვა, თემურ ალექსაია ადმინისტრაციულ ერთეულებს შორის სტიქიის სალიკვიდაციო თანხის გადანაწილების პრინციპმა გაანაწყენა _ მან კენჭისყრამდე განაცხადი გააკეთა და საკუთარი პოზიცია დააფიქსირა.
გამგეობის საფინანსო-საბიუჯეტო სამსახურის უფროსის, როლანდ ლაშხიას ინფორმაციით, საქართველოს მთავრობის განკარგულებით, რომელიც 27 მაისითაა დათარიღებული, სტიქიის შედეგის სალიკვიდაციო ღონისძიებების გახორციელების მიზნით, ლანჩხუთის მუნიციპალიტეტს გამოეყო 85 0000 ლარი. აქედან, გზებისა და ხიდების რეაბილიტაციისთვის 307 209 ლარია მიმართული, ხოლო 542 791 ლარი ნაპირსამაგრების მოწყობას მოხმარდება.
აღნიშნული თანხიდან ჯურუყვეთის ადმინისტრაციულ ერთეულში მდინარე ღვეისწყალზე ორ ადგილზე ნაპირსამაგრი სამუშაოების გასახორციელებლად 70 671 ლარია მიმართული. ჯურუყვეთშივე, კერძო პირის საცხოვრებელ სახლთან მისასვლელი გზისა და ხიდის აღსადგენად 43 393 ლარია გათვალისწინებული. ნაპირსამაგრი სამუშაოები ჩოჩხათშიც ორ ადგილზეა შესასრულებელი, რისთვისაც 31 411 ლარია გამოყოფილი. აქვე, დაზიანებული გზების აღდგენას 9 889 ლარი მოხმარდება, მილხიდისა და ხიდის აღდგენით სამუშაოებს _ 20 755 ლარი, რაც სამ ობიექტზე გადანაწილდება.
ნაპირსამაგრი სამუშაოებისთვის განკუთვნილი თანხიდან, ქალაქ ლანჩხუთს 150 521 ლარი ერგო, რაც შვიდ ობიექტზე გადანაწილდა. ასევე, მდინარის ნაპირისა და გზის გამაგრება იგეგმება ნიგვზიანშიც, რისთვისაც 82 945 ლარის გახარჯვაა გამიზნული. ამავე ადმინისტრაციულ ერთეულში დაზიანებული ხიდების მოსაწყობად სულ 72 727 ლარია გამოყოფილი, რითაც ხუთ ობიექტზე უნდა შესრულდეს სამუშაოები.
ჩიბათის ადმინისტრაციაში მდინარის ნაპირის გამაგრება სამ ადგილზე მოხდება და საამისოდ 131 717 ლარი გაიხარჯება. ნაპირსამაგრი სამუშაოების შესასრულებლად გამოყოფილი თანხამ ლესის ადმინისტრაციულ ერთეულში 13 577 ლარი შეადგინა, დაზიანებული გზების აღდგენითი სამუშაოების შესასრულებლად კი ლესაში 10 710 ლარია გათვალისწინებული.
აცანის ადმინისტრაციაში სტიქიის სალიკვიდაციო თანხიდან, 15 714 ლარი კერძო პირის ეზოსთან კედლის მოწყობას მოხმარდება, ხოლო 24 823 ლარი ორ ადგილზე ხიდის მოსაწყობად გაიხარჯება. შუხუთს ზემონახსენები თანხიდან 19 503 ლარი ერგება, რაც ორ ობიექტზე ნაპირსამაგრის მოწყობას მოხმარდება. მაჩხვარეთში მხოლოდ ნაპირსამაგრების მოწყობა იგეგმება, რისთვისაც 20 412 გამოყოფილი.
ღრმაღელეში გზების აღდგენას 31 858 ლარი მოხმარდება, ხოლო 3923 ლარად დაზიანებული ხიდს აღადგენენ. გვიმბალაურის ადმინისტრაციული ერთეულისთვის გამიზნული 32 153 ლარი კი გვიმბალაური-ორაგვის დამაკავშირებელი გზის მოწყობას მოხმარდება.
სტიქიის სალიკვიდაციო თანხიდან აკეთის ადმინისტრაციაში 11 528 ლარად ხიდისა და მილხიდის რეაბილიტაცია გახორციელდება.
როგორც ირკვევა, სტიქიის თანხებიდან ყველაზე ნაკლები თანხა სწორედ ნიგოითის ადმინისტრაციას ერგო. აქ 6320 ლარად სოფელ ჯაპანაში, დაწყებითი სკოლის მიმდებარედ, მდინარის ნაპირის გამაგრება მოხდება, ხოლო ჩოლობარგში 3 923 ლარად სასაფლაოსთან მისასვლელი ხიდი შეკეთდება. მთლიანობაში კი ორივე სამუშაოს შესასრულებლად 10 982 ლარია გამოყოფილი. სწორედ, ეს გახდა ნიგოითის მაჟორიტარის უკმაყოფილების მიზეზი, რის გამოც ბიუჯეტში გასახორციელებელ ცვლილებას ხელი არ აუწია.
გარდა სტიქიის თანხებისა, ბიუჯეტში უნდა აისახოს ის 4 000 ლარიც, რომელიც ცენტრალური საავადმყოფოს ეზოს ტერიტორიის კეთილმოწყობისთვის უნდა მიიმართოს. ამ თანხის მოძიება კი გამგეობის ტრანსპორტის ტექნიკის და ექსპლუატაციის მოვლა-შენახვის ხარჯების შემცირებით მოხდება.
