ოზურგეთის ზღვისპირა კურორტებზე ურეკში და შეკვეთილში კანონი მკაცრდება. ოზურგეთის მუნიციპალიტეტის საკრებულომ მხარი დაუჭირა დადგენილებას, რომელიც ეხება ოზურგეთის მუნიციპალიტეტის ადმინისტრაციულ საზღვრებში არსებულ ბულვარში, პარკში, სკვერში ან პლაჟზე წვრილფეხა ან/და მსხვილფეხა პირუტყვის მეთვალყურეობის ქვეშ ან მეთვალყურეობის გარეშე ყოლისას გასატარებელი ღონისძიებებს.
ოზურგეთის მუნიციპალიტეტის გამგებლის მერაბ ჭანუყვაძის თქმით, ამ დადგენილების შემოღება აუცილებელი გახდა, რადგან მეტად კომფორტულად დაისვენოს დამსვენებლებმა თუ ტურისტებმა.
"ეს საკითხი იმიტომ შემოვიდა საკრებულოში, რომ მოგვესმინა დეპუტატების აზრი. ეს არ არის იოლი საქმე, რადგან ამისთვის დამატებითი ხარჯების მობილიზება არის საჭირო. გვყავს რამდენიმე ადამიანი დასაქმებული, რომ პლიაჟზე და სკვერში არ შევიდეს ოთხფეხა პირუტყვი, მაგრამ ხან მაინც მოხვდა პირუტყვი პლიაჟზე. აუცილებლად უნდა მივიღოთ შესაბამისი ზომები, რადგან სკვერში, პლიაჟზე არ შევიდეს." – თქვა საკრებულოს სხდომაზე მერაბ ჭანუყვაძემ.
ოზურგეთის მუნიციპალიტეტის საკრებულოს თავმჯდომარემ დავით დარჩიას თქმით, დადგენილება აუცილებლად მისაღებია.
"გვიჭირს თუ გვილხინს ეს დადგენილება უნდა მივიღოთ. ასევე მნიშვნელოვანია ამ საკითხთან დაკავშირებით დეპუტატების აზრი." – თქვა დავით დარჩიამ.
"ერთი რამ ნათელია, რომ ჩვენ დამსვენებლებს უნდა შევთავაზოთ ევროპული კომფორტი. ურეკი არის ჩვენი სახე და თუ ძროხამ იარა პლაჟზე ან სკვერში, ამით ჩვენ დავკარგავთ დამსვენებლებს.
ეს დადგენილება, რომ მისაღებია ამაზე არავინ არ ვდაობთ. პირველ რიგში დიდი მხარდაჭერის იმედი გვაქვს ურეკის მოსახლეობიდან და ყველაზე მეტად უნდა გაგვიგონ. მეტი სიკეთე მოგვიტანს ძროხების მოვლა, ვიდრე ამ ძროხების გაშვება. თვითონ ადამიანების დაუბრუნდება მეტი სიკეთე თუ ძროხას არ გავუშვებთ. იმიტომ, რომ უფრო მეტად განვითარდება ურეკი, დამსვენებელი უფრო მეტი ჩამოვა და უფრო მეტი ფული შემოვა ბიუჯეტში". – ამბობს საკრებულოს თავმჯდომარის მოადგილე, დიმიტრი კვერღელიძე.
მანვე თქვა, რომ პირველ ეტაპზე მოხდება გაფრთხილება, ხოლო მეორე ეტაპზე პირუტყვის პატრონს მოუწევს ფულადი ჯარიმის გადახდა.
"მსგავსი კანონი მოქმედებს ქალაქში და ვიცი, რომ აქ ყველაზე მეტად ადამიანებს პროტესტი უჩნდებათ, როდესაც პირუტყვს აკავებენ. ვიდრე ფულს არ მიიტანს პირუტყვის პატრონი, მანამადე მას არ აძლევენ ძროხას. ეს მუხლი უნდა ამოვიღოთ და ჩვენ მივცეთ ადამიანს საშუალება, 30 დღის განმავლობაში გადაიხადოს ჯარიმა. მოხდება ოქმის შევსება და შემდეგ კი გადაიხდის ჯარიმას. ადამიანს არ უნდა შევუქმნათ დისკომფორტი. მოგეხსენებათ ყველა ოჯახის შვილები ვართ და შეიძლება იმ დროს ადამიანს არ ჰქონდეს ათი ლარი." – თქვა დიმიტრი კვერღელიძემ.
