ვანის მუნიციპალიტეტში სტიქიისგან მიყენებული ზარალის დათვლა და გაწმენდითი სამუშაოები ამ დრომდე დაწყებული არ არის. გადაუღებელი წვიმების შედეგად, მუნიციპალიტეტის თითქმის ყველა სოფელს პრობლემა შეექმნა. მოსახლეობა სახნავ-სათესი სავარგულების გარეშეა დარჩენილი, რამდენიმე სოფელში ადიდებულმა მდინარეებმა ხიდები და ბოგირებიც წაიღო.
როგორც სოფელ სულორის მკვიდრმა თათია დვალიშვილმა "გურია ნიუსს" განუცხადა, სულორში რამდენიმე ოჯახი სოფელს არის მოწყვეტილი.
"ვანის რაიონის სოფელი სულორის ცენტრის გზა მთლიანად წყალს აქვს წაღებული. ერთ-ერთი უბანი ხიდის და გზის გარეშე დატოვა საერთოდ. რამდენიმე ოჯახი მოწყდა სოფელს და ეზოებში აქვთ მდინარის წყალი. ადგილზე არიან მუნიციპალიტეტის წარმომადგენლები მოსული, თუმცა, ჯერ არანაირი სამუშაოები არ დაუწყიათ.
გუშინაც შეიძლებოდა მდინარის კალაპოტის გამაგრება, მაგრამ არაფერი გაუკეთებიათ, ელოდებიან, როდის გამოიდარებს და მდინარე დაწყნარდება. მგონი იმასაც ელოდებიან, წყალი როდის წაგვიღებს. რეაგირება დროულად არის საჭირო და ესენი არაფერს აკეთებენ. ჟურნალისტებიც იყვნენ ადგილზე, ჩვენ პირადად დავურეკეთ მედიის წარმომადგენლებს. ადგილობრივმა თვითმმართველობამ არაფერი გააკეთა ამისთვის. ყურადღება თუ მოადუნა ახლა მოსახლეობამ, საერთოდ არაფერი გაკეთდება. ამას წლები დაჭირდება, რომ აღადგინონ. სასწრაფო რომ დაჭირდეს ადამიანს, ვერანაირად ვერ მივა სოფელში. მთლიანად წაღებულია გზა. ამ ერთ უბანში 50-ზე მეტი ოჯახი ცხოვრობს და მისასვლელი გზა არ არის. სოფელთან დამაკავშირებელი გზა ჯერჯერობით არის, თუმცა ისიც ძალიან საშიშ მდგომარეობაშია. არ არის გამორიცხული, რომ წყლის დიდი ნაკადის გამო სოფლამდე მისასვლელი ხიდი ჩავარდეს. რაც კი პატარა ხიდი იყო, უბნებთან დამაკავშირებელი, მდინარემ ყველა წაიღო", _ ამბობს დვალიშვილი.
მისივე ინფორმაციით, საფრთხე ემუქრება სოფელში მდებარე საბავშვო ბაღის შენობასაც. როგორც დვალიშვილი ამბობს, მდინარე უკვე ბაღის ღობემდეა მისული და დარჩენილი მიწის ნაწილიც წყალს მიაქვს.
"მთელი მდინარის ძალა ურტყამს ბაღის ეზოს და იმასაც ცოტა ხანში გამოეცლება მიწა. ბაღის ეზოს ჭიშკართანაა წყალი მისული. თუ დროულად არ უშველეს ამ წყალს, მთელ სოფელს წაიღებს იმხელა მოდის მდინარე. ტექნიკა არ მოსულა საერთოდ სოფელში. გუშინ ჩაწყნარებული იყო მდინარე, ისე ძლიერადაც არ წვიმდა, მაგრამ ტექნიკა არავის მოუყვანია. ისიც კი გვითხრეს ადგილობრივმა ხელისუფლების წარმომადგენლებმა, არავის გააგებინოთ აქ რაც ხდება, ტელევიზიებს არ დაურეკოთო. 21-ე საუკუნეა და რატომ აწუხებთ ამ ხალხსო. ჯერ გვაცადეთ, ჩვენ თვითონ გავაკეთებთო", _ აღნიშნავს დვალიშვილი "გურია ნიუსთან" საუბრისას.
მისივე ინფორმაციითვე, წყალი, გაზი და ელექტროენერგია სოფელ სულორს არ მიეწოდება.
"წყლის მილები ყველა დახეთქა სტიქიამ და მთელ სოფელს არ მიეწოდება. ელექტროენერგია წუხელ ჩაქრა და ამ დრომდე არ მოსულა. გაზიც არ არის. ვანის რაიონს უკვე აღუდგა ელექტროენერგიის მიწოდება, ჩვენ არ გვაქვს", _ ამბობს დვალიშვილი.
"გურია ნიუსი" აღნიშნული ინფორმაციის გადასამოწმებლად ვანის მუნიციპალიტეტის გამგებელს ზაზა ხურციძეს დაუკავშირდა. ხურციძე ჩვენთან საუბარში ნაწილობრივ ადასტურებს ადგილობრივი მცხოვრების მოწოდებულ ინფორმაციას, რომ ტექნიკა ადგილზე არ მუშაობს, თუმცა ამის მიზეზებსაც ხსნის. მისი თქმით, წყლის დონე სოფლებში იმდენად მაღალია, რომ ტექნიკით შესვლა და სამუშაოების დაწყება შეუძლებელია.
"ახლა უკვე შეწყდა წვიმა და ასე თუ გაგრძელდა, სიტუაცია სტაბილიზაციისკენ წავა. გუშინ საღამოდან დაწყებული რთული ვითარება იყო, მდინარეები ადიდდა, სანიაღვრე არხებმა წყალი ვერ დაიტია და გზებზე გადმოვიდა. ათეულობით ოჯახია დატბორილი და დაზიანებულია ხიდ-ბოგირები; მწყობრიდან არის გამოსული საგზაო ინფრასტრუქტურა; მოსახლეობას თითქმის გაუნადგურდა სათესები და სავარგულები, ფაქტიურად, ყველაფერი წყალშია", _ ამბობს ხურციძე.
მისივე თქმით, ზარალის დათვლა ჯერ არ მიმდინარეობს, რადგან ამის შესაძლებლობას ადიდებული მდინარეები არ იძლევა.
"წყლის მასა საკმაოდ დიდია იმისთვის, რომ ვითარება შეფასდეს", _ ამბობს ხურციძე.
ყველაზე რთული ვითარება, გამგებლის თქმით, სოფლებში – სულორში, ფერეთაში, ბზვარში, მუქედში, უხუთში და ძულუხშია.
"ყველგან დაზიანდა საგზაო ინფრასტრუქტურა. ყველაზე დიდი ზარალი მოსახლეობას იმით მიადგათ რომ სახლებია დატბორილი", _ აღნიშნავს მინიციპალიტეტის გამგებელი.
რაც შეეხება სულორში მდებარე საბავშვო ბაღის შენობას, ხურციძის ინფორმაციით, იქ ჯერჯერობით ტექნიკის შეყვანა და მუშაობის დაწყება შეუძლებელია.
"ამ სიტუაციაში ტექნიკის შეყვანა შეუძლებელია. გასაწმენდი არაფერია, ასფალტირებული გზა იყო, სოფლის ცენტრია და ყველაფერი წაიღო მოდიდებულმა მდინარემ. გაწმენდითი სამუშაოების ჩატარება საჭირო არ არის, არაფერია დარჩენილი გასაწმენდი. ახლა წყალი თითქმის საბავშვო ბაღის ღობემდეა მისული. თუ დაიკლებს წყლის დონე, დავიწყებთ აღდგენით სამუშაოებს.
პირველ რიგში რაც გასაკეთებელი გვაქვს, წყალი უნდა მივაწოდოთ მოსახლეობას. რაც შეეხება გაზს, ეს უკვე აღდგენილია და სოფელს მიეწოდება, ხოლო ელექტროენერგიის აღსადგენად "ენერგო პრო ჯორჯიას" მიერ სამუშაოები მიმდინარეობს ", _ ამბობს ვანის გამგებელი.
ზაზა ხურციძის ინფორმაციითვე, რაიონის სასიცოცხლოდ მნიშვნელოვან ობიექტებს სტიქიის შედეგად პრობლემა არ შექმნია.
"ჯერ ისეთი ინფორმაციაც არ გვაქვს მიღებული, რომ ვინმეს საცხოვრებელი სახლი დაენგრა ან მიწა დაიძრა. დაველოდოთ ხვალინდელ დღეს და დღის განმავლობაში კიდევ გამოჩნდება თუ რაიმე პრობლემაა. რამდენიმე სოფელში მიმდინარეობს გაწმენდითი სამუშაოები, მაგრამ იმ დოზით, რა დოზითაც ადიდებული მდინარეები გვაძლევს საშუალებას. მათ შორის, ბზვანში, ძულუხში და ფერეთაში. ეს სამუშაოები ვერ იქნება მასშტაბური, რადგან ამის შესაძლებლობა ფიზიკურად არ არის. თუ წვიმა არ გაგრძელდა, რამდენიმე დღეში დაიწევს წყლის დონე და დაიწყება აღდგენითი სამუშაოები, თუმცა, რაც ყველაზე მნიშვნელოვანია, ამას მუნიციპალიტეტი საკუთარი სახსრებით ვერ შეძლებს. ზარალს ჩვენ ვერ ავანაზღაურებთ, აუცილებელია ცენტრალური ხელისუფლების, მთავრობის დახმარება. დაიწყება სტიქიით მიყენებული ზარალის ანაზღაურებისთვის თანხის გამოყოფა და სამუშაოებსაც დავიწყებთ.ამის შესახებ უკვე ვაცნობე ცენტრალურ ხელისუფლებას. საქმის კურსში არიან", _ ამბობს ზაზა ხურციძე.
შენიშვნა: მასალაზე დართული ფოტოების ავტორია თათია დვალიშვილი.
ამავე თემაზე:
