“ქალბატონო ლელა, რომელი პარტიის სახელით გვესაუბრებით?!”

6 ივლისს, ოზურგეთის მუნიციპალიტეტის საკრებულოს სხდომაზე 7 საკითხი იყო გამოტანილი. საკრებულოს სხდომა სწრაფ ტემპში მიმდინარეობდა, თუმცა, მის სწრაფად დასრულებას მეხუთე საკითხმა შეუშალა ხელი. როგორც სხდომაზე გახდა ცნობილი, ოზურგეთის მუნიციპალიტეტის საკრებულოს ადმინისტრაციულ ერთეულებში  გამგებლის წარმომადგენლებს, პირის სამედიცინო დაწესებულების გარეთ დაბადების და გარდაცვალების შესახებ ოქმის შედგენა და ცნობის გაცემა შეეძლებათ.

საკრებულოს დეპუტატმა დავით მჟავანაძემ ამასთან დაკავშირებით თქვა, რომ ის არ დაუჭერდა ამ ცვლილებას მხარს.

"ეს საკითხი შეგეძლოთ მაშინ მოგეგვარებინათ, როდესაც მოხვედით ხელისუფლებაში. ახლა გაახსენდა იუსტიციის მინისტრს, ამ პროექტის  გახორციელება?! ახლა წინასაარჩევნო პერიოდია და ამის გამო კეთდება ეს. მე თანახმა ვარ, გავუმარტივოთ ადამიანებს ეს საკითხები, მაგრამ ეს უნდა მომხდარიყო არჩევნებამდე!" _ თქვა დავით მჟავანაძემ.

ამის შემდეგ მჟავანაძესა და დეპუტატ ლელა ნაცვალაძეს შორის დიალოგი გაიმართა:

_ "კომედი არხს" ნუ დაემსგავსებით. კარგია, რომ ოპოზიციის ხმა ისმის ოზურგეთის მუნიციპალიტეტის საკრებულოში, მაგრამ ძალიან ცუდია,  როცა აბსურდებზე საუბრობენ, _ თქვა საკრებულოს თავმჯდომარის მოადგილემ, დიმიტრი კვერღელიძემ.

დიალოგში დეპუტატი ლელა ნაცვალაძე ჩაერთო:

_ ბოდიშს გიხდით,  სხდომაზე დაგვიანებით მოვედი. სჯობს გავაგრძელოთ მუშაობა. ესენი "პრაზდნიკებზე" გამოჩნდებიან და ასე სად არის?! "ნაცმოძრაობამ" ვის რა უნდა მიუთითოს, საინტერესოა.

_ ქალბატონო ლელა, რომელი პარტიის სახელით გვესაუბრებით? _  შეეკითხა დავით მჟავანაძე ლელა ნაცვალაძეს.

_ მე ვარ დეპუტატი და აქ არაფერ შუაშია პარტია. ისე, სამი მოწვევის დეპუტატი ვარ, ეს შეხსენებისთვის, თუ არ იცით, _ იყო ნაცვალაძის პასუხი.

ამ პოლემიკის შემდეგ ოზურგეთის მუნიციპალიტეტის საკრებულოს დეპუტატებმა ერთმანეთს პოლიტიკური წარსული და გაუხსნელი საქმეები შეახსენეს.

"ჩემი თვალით მაქვს ნანახი, როგორ დათხარეს თვალები აქციის დროს სამ ადამიანს", _ უთხრა დეპუტატმა შალვა დოლიძემ კოლეგას, რასაც მჟავანაძის პასუხი მოჰყვა: "ბარბარე რაფალიანცის სისხლით მოსული პარტია ხართ. ერთი ადამიანი მანახეთ ამის გამო დასჯილი. სად არის პროკურატურის გახსნილი საქმეები?"

"თქვენ საერთოდ არ უნდა ლაპარაკობდეთ  თქვენ სულხან მოლაშვილი მოკალით", _ მიმართა "ნაცმოძრაობის" დეპუტატებს დეპუტატმა ბონდო ღლონტმა.

საბოლოო ჯამში, მეხუთე საკითხი დეპუტატებმა ხმათა უმრავლესობით დაამტკიცეს.