იუსტიციის სამინისტროს სისტემაში მოქმედი ორგანიზაციის ხელმძღვანელების თანამდებობრივი სარგოები მნიშვნელოვნად აღემატება არა მხოლოდ მინისტრის პირველი მოადგილის თანამდებობრივ სარგოს (2 950 ლარს), არამედ მინისტრის თანამდებობრივ სარგოსაც, _ ამის შესახებ საქართველოს იუსტიციის სამინისტროს 2014-2015 წლების ფინანსური აუდიტის ანგარიშშია აღნიშნული, რომელიც სახელმწიფო აუდიტის ვებ-გვერდზე გამოქვეყნდა.
აუდიტის ანგარიშის მიხედვით, ეს არ ეხება სსიპ "იუსტიციის სასწავლო ცენტრისა" და სსიპ "საკანონმდებლო მაცნეს" თანამდებობრივ სარგოებს.
"2015 წლის სახელმწიფო ბიუჯეტის შესახებ" კანონით გათვალისწინებული შეზღუდვები სამინისტროს მმართველობის სფეროში შემავალი 10 სსიპ–დან, ვრცელდება 6 საჯარო სამართლის იურიდიულ პირზე: სსიპ "საქართველოს ეროვნულ არქივზე", სსიპ "მონაცემთა გაცვლის სააგენტოზე", სსიპ "სმართ ლოჯიქზე", სსიპ "დანაშაულის პრევენციის ცენტრზე", სსიპ "საკანონმდებლო მაცნესა" და სსიპ "იუსტიციის სასწავლო ცენტრზე", რომლებზედაც დაშვებულია გამონაკლისები საქართველოს მთავრობის განკარგულებებით.
ასევე, გამონაკლისები დაშვებულია სამინისტროს აპარატსა და საქართველოს პროკურატურაზე. წარმოდგენილი მონაცემების მიხედვით, სამინისტროს სისტემაში მოქმედი ორგანიზაციის ხელმძღვანელების თანამდებობრივი სარგოები მნიშვნელოვნად აღემატება არა მხოლოდ მინისტრის პირველი მოადგილის თანამდებობრივ სარგოს (2 950 ლარს), არამედ მინისტრის თანამდებობრივ სარგოსაც (გარდა სსიპ "იუსტიციის სასწავლო ცენტრისა" და სსიპ "საკანონმდებლო მაცნეს")", _ ვკითხულობთ აუდიტის ანგარიში.
"გურია ნიუსი" უცვლელად გთავაზობთ აუდიტის ანარიშში გამოქვეყნებულ ცხრილს, საიდანაც ირკვევა, რომ იუსტიციის სამინისტროს აპარატის უფროსის თანამდებობრივი სარგო შეადგენს – 3540 ლარს; საქართველოს პროკურატრურა – 3910 ლარი; სსიპ – საქ. ეროვნული არქივი – 3840 ლარი; სსიპ – საქ.იუსტიციის სასწავლო ცენტრი – 3400 ლარი; სსიპ – მონაცემთა გაცვლის სააგენტო – 5800 ლარი; სსიპ – სმართ ლოჯიქი – 5800 ლარი; სსიპ – დანაშაულის პრევენციის ცენტრი – 3800 ლარი; სსიპ – საქ. საკანონმდებლო მაცნე- 3500 ლარი; სსიპ – აღსრულების ეროვნული ბიურო – 5800 ლარი; სსიპ – იუსტიციის სახლი – 4550 ლარი; სსიპ – საჯარო რეესტ ერ. სააგენტო – 4700 ლარი; სსიპ – სახელმწიფო სერვისების განვითარების სააგენტო – 5800 ლარი.
