სახელმწიფო აუდიტის სამსახურმა იუსტიციის სამინისტროში შრომის დაგეგმვის ნაკლოვანებები აღმოაჩინა, კერძოდ, 2015 წლის დაზუსტებული ბიუჯეტი "შრომის ანაზღაურების" მუხლით სამინისტროს სისტემაში შემავალი ორგანიზაციების მიხედვით, თავდაპირველად დამტკიცებულ გეგმასთან შედარებით შემცირებულია (გარდა, პროკურატურისა – გაზრდილია 930 ათასი ლარით) 2 538 000 ლარით, რაც იმაზე მიუთითებს, რომ აღნიშნული მუხლი დაგეგმილი იყო გაზრდილი ოდენობით.
ამის შესახებ საქართველოს იუსტიციის სამინისტროს 2014-2015 წლების ფინანსური აუდიტის ანგარიშშია აღნიშნული, რომელიც სახელმწიფო აუდიტის ვებ-გვერდზე გამოქვეყნდა.
ამავე ანგარიშის მიხედვით, სამინისტროში მთავრობის 2014 წლის 15 ივლისის #449 დადგენილებით მართალია შეიზღუდა "პრემიის" ქვემუხლით გაცემული თანხების მოცულობა, თუმცა მკვეთრად გაიზარდა "დანამატის" ქვემუხლით გაცემული საბიუჯეტო სახსრების ოდენობა.
აუდიტის ანგარიშში ნათქვამია, რომ სამინისტროს მმართველოს სფეროში შემავალი ორგანიზაციების მიხედვით 2014 წელს "შრომის ანაზღაურების" მუხლით გაწეული გადასახდელები შეადგენდა 35 659 000 ლარს, მათ შორის აპარატის – 4 068 000 ლარს. სამინისტროს, 2015 წლის ბიუჯეტის კანონით "შრომის ანაზღაურების" მუხლით დაუმტკიცდა 39 969 000 ლარის ასიგნება, მათ შორის სამინისტროს აპარატზე – 5 192 000 ლარი.
"2015 წლის განმავლობაში განხორციელებული ცვლილებებით სამინისტროს "შრომის ანაზღაურების" მუხლი შემცირებულია 1 063 000 ლარით და დაზუსტდა 4 129 000 ლარამდე. აღნიშნული მიუთითებს "შრომის ანაზღაურების" ფონდის გაზრდილი ოდენობით დაგეგმვაზე შემდგომში სხვა მუხლებსა და სამინისტროს სისტემის სხვადასხვა ორგანიზაციებზე გადასანაწილებლად, ასევე პრემიებისა და დანამატების გასაცემად. სამინისტროს 2015 წლის საბიუჯეტო ასიგნებებიდან "შრომის ანაზღაურების" (38 343 000 ლარი) მუხლით გაწეული გადასახდელები 2014 წელთან შედარებით (35 659 000 ლარი) გაზრდილია 2 683 000 ლარით. მათ შორის "სამართალშემოქმედებისა და ქვეყნის ინტერესების სამართლებრივი მხარდაჭერის მიზნით სახელმწიფო პოლიტიკის შემუშავება და მართვა, მათ შორის, სისხლის სამართლის სისტემის რეფორმის განხორციელება" პროგრამის ფარგლებში 51 100 ლარით", _ აღნიშნულია აუდიტის ანგარიშში.
აქვე ვკითხულობთ, რომ სამინისტროს აპარატი ფინანსთა სამინისტროში წარდგენილი 2015 წლის განაცხადის მიხედვით სამინისტროს აპარატის მოსამსახურეთა რიცხოვნობა ჭერის ფარგლებში განსაზღვრული იყო 250 ერთეულით 5 322 000 ლარის შრომის ანაზღაურების ფონდით.
"სახელმწიფო ბიუჯეტის კანონით დამტკიცებული იქნა 5 192 000 ლარის შრომის ანაზღაურების ფონდი 230 ერთეულზე. დამტკიცებული 230 ერთეული საშტატო ნუსხის ფარგლებში, ვაკანსიების საშუალო ოდენობა შეადგენდა 79 ერთეულს. 2014 წელს დამტკიცებული 316 ერთეული საშტატო ნუსხის ფარგლებში, ვაკანსიების საშუალო ოდენობა შეადგენდა 159 ერთეულს. პრემიის და დანამატის (ჯამური) ხელფასთან თანაფარდობა 2014-2015 წლებში მერყეობს შესაბამისად 34%-135%-ის და 34%-131%-ის ფარგლებში (დეკემბრის თვის გაუთვალისწინებლად)", _ აღნიშნულია ანგარიშში.
ამავე ანგარიშის თანახმად, 2014 წელთან შედარებით, "შრომის ანაზღაურების" მუხლით გახარჯული სახსრები 51.1 ათასი ლარით (1.26 %) არის გაზრდილი.
"სხვაობა განპირობებულია სამინისტროს დებულებაში შეტანილი ცვლილებების შესაბამისად, ახალი ფუნქციის და კომპეტენციის მქონე დეპარტამენტის დაკომპლექტებით (ევროკავშირის სამართლის დეპარტამენტი). შედეგად, 2015 წლის განმავლობაში "დანამატის" ქვემუხლი 370 ათასი ლარითაა (78.37%) გაზრდილი, ხოლო "პრემიის" ქვემუხლი შემცირებულია 325 ათას ლარით (40.13%).
2015 წელს პრემიის საშუალოთვიური ოდენობა შეადგენდა 68000 ლარს, ხოლო დანამატის -70 000 ლარს, მაშინ როდესაც, 2014 წლის ანალოგიური მაჩვენებელი შესაბამისად, 95 000 და 39 000 ლარის ტოლია.
ზემოაღნიშნულმა ანალიზმა გვიჩვენა, რომ მთავრობის 2014 წლის 15 ივლისის #449 დადგენილებით მართალია შეიზღუდა "პრემიის" ქვემუხლით გაცემული თანხების მოცულობა, თუმცა მკვეთრად გაიზარდა "დანამატის" ქვემუხლით გაცემული საბიუჯეტო სახსრების ოდენობა. წლის განმავლობაში ფულადი განაცემის (შრომის ანაზღაურება) მაქსიმალური ოდენობა შეადგენს 73 460 ლარს, მათ შორის პრემიისა და დანამატის (ჯამური) მაქსიმალური ოდენობა – 46 480 ლარს (1.7-ჯერ მეტი თ/სარგოზე). პრემიისა და დანამატის ჯამური ოდენობა 4 შემთხვევაში თანამდებობრივ სარგოზე გადამეტებულია 1.9-ჯერ.
რიგ შემთხვევებში (107) ადგილი ჰქონდა ერთჯერადად დარიცხული პრემიის გადამეტებას თანამდებობრივ სარგოზე (32 ლარიდან 800 ლარამდე). სამინისტროს აპარატში თანამშრომლებზე დანამატის დანიშვნა ხორციელდება უფლებამოსილი პირის ერთი ბრძანების საფუძველზე. აღნიშნულ ბრძანებაში საკადრო ცვლილებებიდან გამომდინარე ყოველთვიურად ხდებოდა ცვლილებების შეტანა.
დანამატების დანიშვნის საფუძვლად მითითებულია მოსამსახურეების წახალისებისა და მოტივაციის გაზრდის მიზნით, დასაქმების ბაზარზე არსებული კონკურენციის გათვალისწინებით, აგრეთვე, საქართველოს იუსტიციის სამინისტროს აპარატში კვალიფიციური კადრების შენარჩუნებისა და მოზიდვის ხელშეწყობისათვის, ზეგანაკვეთური მუშაობის ან/და განსაკუთრებით საპასუხისმგებლო ფუნქციური დატვირთვის გათვალისწინებით, მიმდინარე საფინანსო წლის განმავლობაში (2015 წლის 1 იანვრიდან 31 დეკემბრის ჩათვლით) თანამდებობრივ სარგოზე ყოველთვიური დანამატის დაწესება. გენერალური ინსპექციის მოსამსახურეთა დანამატები, მათი საქმიანობის სპეციფიკიდან და სამუშაოს ცვალებადი მოცულობიდან გამომდინარე, პირველი 9 თვის განმავლობაში განისაზღვრებოდა ყოველთვიურად, ხოლო ბოლო 3 თვის განმავლობაში – სექტემბერში გამოცემული ბრძანების შესაბამისად. ზემოაღნიშნულიდან გამომდინარე, წლის განმავლობაში ერთი და იმავე თანამშრომლებზე ერთი და იგივე ოდენობის დანამატების სისტემატიურად დაწესება, მიუთითებს იმაზე, რომ აღნიშნულ თანამშრომლებზე განსაზღვრული თანამდებობრივი სარგოს ოდენობები არარეალურია", _ ნათქვამია აუდიტის ანგარიშში.
"გურია ნიუსი" აღნიშნულთან დაკავშირებით სამინისტროს პოზიციას მოგვიანებით შემოგთავაზებთ.
ამავე თემაზე:
რა ხელფასებს იღებენ იუსტიციის სამინისტროში შემავალი სსიპ-ების ხელმძღვანელები
