დღეს ფოთში საჭადრაკო ტურნირი გაიხსნა, რომელიც უკვე 11 წელია ყოველწლიურად ტარდება 12-დან 20 ივლისის ჩათვლით. ტურნირი წლევანდლამდე ნანა ალექსანდრიას სახელს ატარებდა, თუმცა დღეს ცნობილი გახდა, რომ ორგანიზატორებმა მას სახელი შეუცვალეს და ფოთის საერთაშორისო საჭადრაკო ფესტივალი დაარქვეს. ამის შესახებ ინფორმაცია "ნაციონალური მოძრაობის" ფოთის საქალაქო ორგანიზაციის წევრებმა გაავრცელეს.
პარლამენტის თავმჯდომარის დავით უსუფაშვილის თანაშემწე ზვიად კირტავა სოციალურ ქსელში ეხმიანება ამ მოვლენას. ის მიიჩნევს, რომ ეს ფაქტი აზარალებს ქართულ ჭადრაკს, საზოგადოებას და მთლიანად სახელმწიფოს.
"ნანა ალექსანდრიას ტურნირისათვის სახელის გადარქმევა ნამდვილად მიუღებელი საქციელი მგონია.
მსგავსი რამ სწორედაც რომ მისი შვილის და მისი შვილის პოლიტიკური ამფსონების სტილია და ამ სტილს აუცილებლად უნდა გავემიჯნოთ! რადგან ასეთი საქციელით ზარალდება ნანა ალექსანდრია, ქართული ჭადრაკი, ჩვენი მენტალიტეტი, დღევანდელი ხელისუფლება და ზოგადად – საქართველო!
ერთადერთი, ვინც ამ საქციელით არამცთუ არ ზარალდება, არამედ მოგებულია – ეს არის, რაოდენ უცნაურად არ უნდა ჟღერდეს – სწორედ გიგა ბოკერია"– წერს ზვიად კირტავა.
