“ჩაი და მოცვი, წლებია, უყურადღებოდაა”

11 ივლისს, საქართველოს სავაჭრო-სამრეწველო პალატის პრეზიდენტი ნინო ჩიქოვანი ოზურგეთში ადგილობრივ ბიზნესმენებს და მეწარმეებს შეხვდა და მათი პრობლემების შესახებ მოისმინა. განსაკუთრებული ყურადღება ჩაის, თაფლისა და თხილის სეზონთან დაკავშირებულ საკითხებს დაეთმო. შეხვედრა "დემოკრატიული ჩართულობის" ცენტრში გაიმართა.

შეხვედრაზე აღნიშნეს, რომ მცირე და საშუალო ბიზნესმენებისთვის რეგიონში პრობლემაა ის, რომ კომერციული ბანკები ბიზნესსესხებს არ იძლევიან, რაც მათი ბიზნესის განვითარებისთვის ყველაზე მნიშვნელოვანია. გარდა ამისა, არსებობს პროდუქციის გასაღების პრობლემა, რეგიონი დაჩაგრულია იმ მხრივაც, რომ არ შემოდის არც ერთი მსხვილი ინვესტორი.

მეწარმეებმა თქვეს, რომ განსაკუთრებული ყურადღება უნდა მიექცეს მოცვისა და ჩაის კულტურების გასაღებას, მიეცეს ბიზნესმენებს სტიმული, რომ მოიწიონ ეს კულტურები.

"ჩაი და მოცვი _ ეს არის კულტურები, რომელიც წლებია უყურადღებოდაა. ჩვენი ქონება არის ჩვენი მიწა, რომელსაც არავინ არაფრად აგდებს _ ბანკები არ თანამშრომლობენ ჩვენნაირ ხალხთან. ჩაის განვითარებაზე რომ გავაკეთე განაცხადი, სესხი არ მომცეს. ბინა თბილისში, რომელიც სიძემ მათხოვა, ჩავდე, მაგრამ მაინც უარი მითხრეს იმის გამო, რომ თურმე მე უკვე აღებული მქონია სესხი. ეს იყო სესხი, რომელიც ჩაის პლანტაციების რეაბილიტაციისთვის მქონდა გამოტანილი. სასაცილო მდგომარეობაა, სატირალი რომ არ იყოს! ასეთი მცდელობა ბევრ ჩვენგანს ჰქონდა. მეწარმეები, რომლებსაც კბილებით გაგვაქვს საქმე, რომელიც გვიყვარს, იმედგაცრუებულები ვართ. რასაც ამბობენ, თუ ეს შესრულდება და ამ კუთხით მიეხედება ამ სფეროს, ყველაფერი კარგად იქნება. თქვენი მხარდაჭერა ამ საკითხში იქნება მნიშვნელოვანი.

30 წლის გავერანებულ მიწას რომ კაცი ხელს მოჰკიდებს და დაამუშავებს, ნამდვილად ხელი უნდა შეუწყოს სახელმწიფომ", _ აღნიშნა შეხვედრაზე მეწარმემ, ოზურგეთის მუნიციპალიტეტის სოფელ ბახვში მცხოვრებმა დავით თენიეშვილმა.

როგორც შეხვედრაზე სავაჭრო სამრეწველო პალატის წარმომადგენელი, საერთაშორისო ურთიერთობების დეპარტამენტის ხელმძღვანელი გიორგი ვეკუა და ორგანიზაციის წარმომადგენლები მცირე მეწარმეებს უცხოელ პარტნიორებთან ურთიერთობებზე, მათთან სამომავლო კავშირზე, უცხოური კომპანიის სანდოობაზე ესაუბრნენ, რაც ორგანიზაციის მთავარ მიზანს წარმოადგენს:

"ღია დიალოგი ბიზნესთან" არის პროექტი, რომელიც ამ ეტაპზე საქართველოს სავაჭრო-სამრეწველო პალატისთვის ერთ-ერთი პრიორიტეტია. ჩვენი საქმიანობა არის რეაგირება თქვენს პრობლემებზე. ჩვენი პალატის წევრობის შემთხვევაში მოხდება ცნობადობის ამაღლება, როგორც ადგილობრივ, ასევე, უცხოურ ბიზნესის შესახებ; გაზრდით თქვენი კომპანიის სანდოობას, გახდებით საერთაშორისო ბიზნესის წევრი და გაიზრდება თქვენი ბიზნესის წარმატების შანსი. ეს არ იქნება ერთჯერადი შეხვედრა _ რასაც თქვენგან მოვისმენთ, შემდეგი შეხვედრა სწორედ ამ პრობლემების ირგვლივ გვექნება. პრეზიდენტი და პალატის გუნდი რეგიონებში ბიზნეს-სექტორს ხვდებიან და კონკრეტული პრობლემების მოსმენის შემდეგ, მათი გადაჭრის გზებზე მუშაობენ", _ აღნიშნა გიორგი ვეკუამ.