ოზურგეთის სოფელ ლიხაურის წისქვილში პარლამენტის ეროვნული ბიბლიოთეკის ხელმძღვანელის გიორგი კეკელიძის თაოსნობით მცირე ბიბლიოთეკა მოეწყო. გიორგი კეკელიძე ჩვენთან საუბრის დროს ამბობს, რომ ეს არის სახალისო იდეა, რომელიც გულისხმობს ბიბლიოთეკების განახლების პროექტს.
ერთ-ერთი პროექტის- ეკვილიბრიუმის ფარგლებში მოხდება სხვადასხვა სოფლის მოქმედ და ჯერჯერობით შეჩერებულ წისქვილში წიგნების შეტანა.
"ეს არის ერთგვარი ოაზისი სადაც ადამიანს შეეძლებათ წიგნების წაკითხვა და შემდეგ შეუძლია თავისი აზრი გაუზიაროს სხვებს" – გვითხრა გიორგი კეკელიძემ.
ამ ფაქტს სოციალურ ქსელში უკვე დიდი გამოხმაურება მოყვა.
"ცნობილია, რომ სოფლის მკვიდრნი წისქვილში დიდ დროს ატარებენ. აი, ამ დროს მათ წიგნები ნამდვილად გამოადგებათ. ლიხაური განსაკუთრებული სოფელია – აქედან იყო დიდი ქართველი ექვთიმე თაყაიშვილი და ასევე, აქაურმა მკვიდრმა ალექსანდრე წუწუნავამ აქ გადაიღო 1ლი ქართული მხატვრული ფილმი "ქრისტინე". შემდეგ მან აქვე მეორე ფილმი "ჯანყი გურიაში" გადაიღო. სოფელი ისტორიულია. გორაკიდან ძველი ტაძარი გადმოჰყურებს. კიდევ 1 შემთხვევა – 1912 წელს ლიხაურში ქართველთა შორის წერა-კითხვის გამავრცელებელი საზოგადოების ფილიალი გაიხსნა და მისი ხელმძღვანელი სწორედ ამ ტაძრის წინამძღვარი ნესტორ კონტრიძე იყო. ლიხაურელები განათლებისკენ სულ მიისწრაფვოდნენ. წისქვილის ბიბლიოთეკა მათ ძალიან გამოადგებათ." – წერს "ფეისბუქზე" ფოტოგრაფი გოგა ჩანადირი.
