გურიაში სახელმწიფო რწმუნებულ–გუბერნატორის გია სალუქვაძის ოჯახის საკუთრებაში ორი ბინა, ორი მიწის ნაკვეთი და აგარაკია.
ამის შესახებ სალუქვაძის ქონებრივ დეკლარაციაშია აღნიშნული.
კერძოდ, გია სალუქვაძის მფლობელობაშია ორი ბინა თბილისში, ვაჟა-ფშაველას გამზირზე, რომელთა ფართობებიც 134.00 კვ.მ და 114.00 კვ.-ია. ხოლო სალუქვაძის მეუღლე, ქეთევან სალუქვაძე ფლობს ჩოხატაურის რაიონის კურორტ ბახმაროში 104.00 კვ.მ-ის ფართობის სახლს და 100.00 კვ.მ-ის ფართობის მიწის ნაკვეთს. ასევე, ოზურგეთის რაიონში, კაპროვანში, 300.00 კვ.მ-ის ფართობის მიწის ნაკვეთს.
გარდა ამისა, გია სალუქვაძის 100%-იან საკუთრებაშია 2006 წელს გამოშვებული მსუბუქი ავტომანქანა Mercedes GL 450.
რაც შეეხება გუბერნატორის ფინანსურ მდგომარეობას, დეკლარციის შევსების მომენტში მის საბანკო ანგარიშზე ლიბერთი ბანკში 7 ლარი იყო. მისი მეუღლის, ქეთევან სალუქვაძის მიმდინარე ანგარიშზე ამავე ბანკში 3372.05 ლარი; შვილის, რევაზ სალუქვაძის ანაბარზე პროკრედიტ ბანკში 1617.84 ლარი; გიორგი სალუქვაძის ანაბარზე ამავე ბანკში 1529.99 ლარი, ხოლო ლუკა სალუქვაძის ანაბარზე 2865.71 ლარი ირიცხებოდა.
დეკლარაციის მიხედვით, გია სალუქვაძის შემოსავალი საერთო ჯამში 66 364 ლარი იყო; კერძოდ, სალუქვაძემ რწმუნებული-გუბერნატორის პოსტიდან 48 286 ლარი, ხოლო ს.ს. საქრუსენერგოს გენერალური დირექტორის მრჩევლის პოსტიდან 18 078 ლარის შემოსავალი მიიღო.
ქონებრივი დეკლარაციის მიხედვით, გია სალუქვაძის სახელზე 2015 წელს აღებული 30 000-ლარიანი სამომხმარებლო სესხია, რომლის პროცენტის დასაფარადაც მას გასულ წელს ვითიბი ბანკისთვის 829 ლარი გადაუხდია.
ქონებრივი დეკლარაციის მიხედვით, გუბერნატორის ოჯახი არ ფლობს ფასიან ქაღალდებსა და ძვირადღირებულ ნივთებს, გასული წლის განმავლობაში ოჯახს არც ფასიანი საჩუქრები მიუღია.
რაც შეეხება სალუქვაძის წინა წლის შემოსავლებს, როგორც საჯარო სამსახურის ბიუროს ვებ-გვერდზე განთავსებული 2015 წელს შევსებული დეკლარაციიდან ირკვევა, ოჯახის ერთადერთი შემოსავალი გია სალუქვაძის მიერ ს.ს. საქრუსენერგოს გენერალური დირექტორის მრჩევლის თანამდებობიდან აღებული 34 500 ლარი ყოფილა.
ცნობისთვის, გია სალუქვაძემ გურიის რწმუნებულ-გუბერნატორის პოსტი 2015 წლის 11 მაისს დაიკავა.
