როგორც სამართლის სპეციალისტები ამბობენ, მსგავს ფაქტს ქართული სამართლის ისტორიაში ადგილი არ ჰქონია.
ამ თემაზე, 17 ივნისს, ოზურგეთში დაგეგმილ აქციასა და მომავალ პოლიტიკურ გეგმებზე “ქართული ოცნების” ლანჩხუთის შტაბის ხელმძღვანელს, სოსო ბოლქვაძეს ვესაუბრეთ.
_ ბატონო სოსო, როგორია ივანიშვილის წინააღმდეგ გახორციელებული ბოლოდროინდელი სადამსჯელო სანქციების თქვენეული შეფასება?
_ როცა სახელმწიფოში არ არსებობს დამოუკიდებელი და თავისუფალი სასამართლო, ასეთი გადაწყვეტილებების გამოტანა არავისთვის არ უნდა იყოს გასაკვირი. “მენეჯმენტ სერვისი” ივანიშვილის სახელთან მხოლოდ იმიტომაა დაკავშირებული, რომ მას მმართველობაში გადაეცა ურეკის გასართობი პარკი “ციცინათელა” და ბათუმის დელფინარიუმი. თავის დროზე “ციცინათელაც” ივანიშვილმა ააშენა და დელფინარიუმიც მან გაარემონტა. სარემონტო სამუშაოების შემდეგ, დელფინარიუმი ბათუმის მერიას გადასცეს, მაგრამ მან ვერ უზრუნველყო ობიექტის მომსახურება, რაც დიდ ხარჯებთან იყო დაკავშირებული. ამიტომ ბათუმის დელფინარიუმი მართვაში “მენეჯმენტ სერვისს” გადაეცა.
კომპანიას დაეკისრა 6 მილიონი ლარის გადახდა, მისი ქონება ამჟამად დაყადაღებულია. ახლა შუა ზაფხულია, ტურისტული სეზონი ნელ-ნელა შედის ძალაში, არსებობს დელფინარიუმისა და “ციცინათელას” გაჩერების საფრთხე. როგორ შეიძლება, სახელმწიფო ასე მიუდგეს მისთვის მნიშვნელოვან და სტრატეგიულ საკითხებს? ესენი ხომ გამუდმებით ლაპარაკობენ ტურიზმის განვითარებაზე!
დელფინარიუმში რამდენიმე თვით ადრე ხდება ბილეთების დაჯავშნა, ბილეთებს წინასწარ იძენენ ტურისტები თურქეთიდან, უკრაინიდან, სომხეთიდან, მაგრამ ამათ არც სეზონის ჩაგდება ედარდებათ, ოღონდაც ივანიშვილი გაანადგურონ!
კომპანია “ელიტა ბურჯი”, რომელიც ავტოტრანსპორტით უწევდა მომსახურებას “გლობალ ტვ”-ს, 23 მილიონი ლარით დააჯარიმეს.
ამ შემთხვევაშიც მოტივი აბსურდული იყო _ თითქოს “ელიტა ბურჯი” საბაზრო ღირებულებაზე ნაკლებს იხდიდა მომსახურებაში.
მაგრამ ყველაზე მთავარი იცით, რა არის? არავინ იცის, რის საფუძველზე დააჯარიმეს ეს კომპანიები. ვერც ერთი იურისტი ვერ აგიხსნით ამას. მაგრამ ჩვენს სასამართლოს ხომ არანაირი სამართლებრივი საფუძველი არ სჭირდება განაჩენის გამოსატანად?
_ ერთი და იგივე ქმედება ზოგჯერ ამომრჩევლის მოსყიდვად ითვლება, ზოგჯერ კი ხალხზე ზრუნვად…
_ როცა რუსთავის საკრებულოს თავმჯდომარის მოადგილემ ცხვარი და ღვინო დაურიგა ხალხს სააღდგომოდ, ამაზე ხელისუფლებას რეაქცია არ ჰქონდა. სამი თვის შემდეგ გაახსენდათ, რომ ეს შეიძლება, ამომრჩევლის მოსყიდვად შეფასდეს. ის მხოლოდ იმიტომ შეიძლება, დააჯარიმონ, რომ მანამდე ივანიშვილი დააჯარიმეს კოლოსალური თანხით.
ახლა ლანჩხუთის გამგეობის ინფრასტრუქტურის სამსახური ღობის შესაღობ მავთულს ურიგებს მოსახლეობას. მაქვს ინფორმაცია, რომ მოსახლეობამ საკუთარი სახსრებით უნდა შეღობოს ფართობები, ამ საქმისთვის კი ინფრასტრუქტურის სამსახურს 220 ათასი ლარი აქვს გამოყოფილი. ამ შემთხვევაში რამდენიმე კითხვა ჩნდება. ითვლება თუ არა მავთულის დარიგება მოსყიდვად? თუ მოსახლეობამ საკუთარი ხარჯით უნდა შეღობოს ტერიტორია, რაში იხარჯება ინფრასტრუქტურის სამსახურისთვის გამოყოფილი ფული?
_ “ქართული ოცნების” ადგილობრივი შტაბი ცნობილ საზოგადო მოღვაწეებთან ერთად მოსახლეობასთან შეხვედრებს იწყებს. ვის უნდა ველოდოთ სტუმრად ლანჩხუთში?
_ ჯერ დანამდვილებით არ ვიცი, მაგრამ ჩამოვლენ ცნობილი ადამიანები, საზოგადოებისთვის კარგად ნაცნობი სახეები, რომლებიც “ქართული ოცნების” მხარდამჭერები არიან. ხვალისთვის ველოდებით (საუბარი ჩაწერილია 12 ივნისს) დავით უგრელიძეს, რომელსაც კარგად იცნობენ “გურიის” გულშემატკივრები, თემურ ნანეიშვილს, რომელსაც ლანჩხუთური ფესვები აქვს რეჟისორ ნუკრი ქანთარიას. შეხვედრები გვექნება ლანჩხუთის ყველა სოფელში. ბიძინა ივანიშვილს სურს, კარგად იცნობდეს მოსახლეობის განწყობას. ეს შეხვედრები 17 ივნისამდე გაგრძელდება. 17-ში ოზურგეთში იგეგმება დიდი აქცია, ისეთის, როგორიც იყო თბილისსა და ქუთაისში.
_ ოზურგეთში, ალბათ, მოხდება გურიის სამივე მუნიციპალიტეტის საპარლამენტო კანდიდატების წარდგენა.
_ ამაზე დიდი აჟიოტაჟია ატეხილი. ჩვენც 17-ში გავიგებთ კანდიდატების ვინაობას. უამრავ ვარიანტზე იყო ლაპარაკი. მაგალითად, თემურ მახარაძეზე. იგი ქუთაისში გამოჩნდა მიტინგზე და ამის შემდეგ გავრცელდა ეს ხმები. თემურ მახარაძე ცნობილი ექიმია და ლანჩხუთში კარგად იცნობენ.
საუბარში ჩაერთო “ქართული ოცნების” შტაბის წევრი ელგუჯა ჩხაიძე: _ ყველაზე რეალური კანდიდატურა თემურ ჩხაიძის და თავად სოსო ბოლქვაძის კანდიდატურებია. ირაკლი მენაღარიშვილის და მერაბ ჟორდანიას ვარიანტები აღარ არის აქტუალური. ამ ეტაპზე ამ ორზეა საუბარი.
თავად სოსო ბოლქვაძე კატეგორიულად არ ეთანხმება აზრს, რომ “ქართული ოცნების” მთავარ ოფისში მისი კანდიდატურა განიხილებოდეს მომავალ საპარლამენტო არჩევნებში წარსადგენად _ იგი მიიჩნევს, რომ ოქტომბერში ხელისუფლების შეცვლის შემდეგ, საერთოდ დატოვებს პოლიტიკას და თავის პროფესიას დაუბრუნდება.
