დავამზადოთ ჩვენებური კევი

გსურთ  ქართული კევის დამზადება? ეს კარგადაა მოსახერხებელი გურიაში, კერძოდ, მისთვის, ვინც ბახმაროში ყოფილა და კევის ნედლეულის შეგროვება უცდია.

გურიაში ნაძვის კევის არსებობა ძირითადად  ბახმაროს უკავშირდება. ისე კი, კევის მოძებნა ტრასიდან 200 მეტრის დაშორებით ბევრგან შეიძლება, სადაც ბევრია ნაძვი, ფიჭვი.

კევის ნედლეულის შეგროვება წელიწადის ყოველ დროს შეიძლება, თუმცა, აგვისტო მეტად ხელსაყრელია, რადგან ბახმაროს ბევრი ადამიანი სტუმრობს და ამ დროს შესაძლებელია,  ბლომად შეაგროვო.

კევის ნედლეულის ერთ სახეობას, რომელიც მოწითალოა, დაუმუშავებლადაც ღეჭავენ. ის მკვრივი და მომწაროა. მეორე სახის ნედლეული წარმოადგენს მოყვითალო მასას, რომლის დაუმუშავებლად დაღეჭვა არ შეიძლება. კევის ნედლეული დანით ისე უნდა მოვაშოროთ  ნაძვის შტამბს, რომ ქერქი არ გაჰყვეს. შეგროვება უნდა მოხდეს მინის და არა პლასტმასის ჭურჭელში.

ოზურგეთელი ეთერ ლომჯარია გვიამბობს, როგორ ახდენდა კევის მომზადებას შინაურ პირობებში:

_ როცა შვილები პატარები მყავდა და ბახმაროში დავდიოდით, ხშირად ვამზადებდი კევს. მოგროვებულ ნედლეულს ვყრიდი დაბალ ცეცხლზე დადგმულ ალუმინის ქვაბში. როცა კარგად დადნებოდა, შემდეგ ვწურავდი სქელ ან ორმაგ დოლბანდში. ცხლად  გაწურვის დროს,  მომზადებული მქონდა ქვაბი თბილი წყლით, რომელშიც პირდაპირ ვუშვებდი.  ამის შემდეგ ადვილია სასურველი ფორმის მიცემა.

ჩემი აზრით, დღეს,  როცა ბევრს საუბრობენ ბიოპროდუქციაზე, კარგი იქნება თუ ეკოლოგიურად სუფთა კევსაც  დავამზადებთ. ნაძვის კევის სასარგებლო თვისებები ძველთაგანვე ცნობილია _ ის შეიცავს ანტიმიკრობულ და ანტისეპტიკურ ნივთიერებებს. ამასთანავე საუკეთესოა დეზოდორანტადაც.