ცნობილმა ტერორისტმა ლუკა ღლონტმა (მეტსახელად ,,ჩორნა”) 1947 წელს დაწერილ მოგონებებში დაწვრილებით აღწერა, თუ როგორ მოკლეს 1905 წლის დასაწყისში ,,ჯაშუშობაში” ეჭვმიტანილი მომრიგებელი შუამავალი (,,მიროვოი პასრედნიკი”) თავადი ტიფო ნაკაშიძე.
,,…რევოლუციონური გლეხობის კომიტეტმა გადასწყვიტეს მოწყობილიყო ჯაშუშ თავადის ტიფო ნაკაშიძის მკვლელობა, რომელიც დაგვევალა რევოლუციონერი გლეხობის ერთ ჯგუფს, პეტრე მჟავიას (გურიანთიდან), კალენიკე მამულაიშვილს და გიორგი გაგუას (ოზურგეთიდან) შემადგენლობით…”
ერთ დილას, ოზურგეთის ცენტრში, რევოლვერებით და გადაჭრილი ბერდენათი შეიარაღებული და ნაბად წამოსხმული ,,ჩორნა” და პეტრე მჟავაია თავის მსხვერპლს ჩაუსაფრდნენ.
გიორგი გაგუა ქუჩის თავში იდგა, რათა გასროლის შემდეგ შეეჩერებინა იქვე ყაზარმებში მყოფი სამხედროები, ხოლო გურიელის სახლის წინ მდგომ კალენიკე მამულაიშვილს ნიშანი უნდა მიეცა თავად ნაკაშიძის გადაადგილების შესახებ. დიდი ხნის ლოდინის შემდეგ …
ვხედავთ, რომ ტიფო ნაკაშიძე გამოდის ფოსტის შენობიდან და მის სახლისაკენ მოემართება ე. ი. იქითკენ, სადაც ჩვენ, მე და მჟავია ვდგევართ, ნაკაშიძეს თან ახლავს მემამულე გრ. ქარცივაძე და გლეხი თეოფილე ქვეითაია…
ტიფო ნაკაშიძე რამდენიმე ფეხის ნაბიჯით დაგვიახლოვდა, მე დავწინაურდი, ნაბადში დამალული ბერდენის გადმოღება და სროლა ერთი იყო. ჯალათი ნაკაშიძე იქვე უსულოთ დაეცა.
ჩვენ სასწრაფოთ გავრბივართ წყლით ექადიისაკენ. ქალაქში დიდი ჩოჩქოლი ატყდა, გამოგვიდგა სამხედრო ნაწილები და ურადნიკი დურსუნ კვესიოღლი თავისი რაზმით, მაგრამ ჩვენ უკვე იქვე ახლოს ამხანაგები სპეციალური ცხენებით შეკაზმულნი გველოდებოდნენ. მადევარმა ქოფაკმა ურიადნიკმა და მისმა რაზმმა ჩვენ გზაკვალს ვერ მიაგნო.”
ოზურგეთში არ აღმოჩნდა ხელოსანი, რომელიც დათანხმდა კუბოს მიყიდვაზე – კუბოს შოვნა მხოლოდ ძალის გამოყენებით მოხერხდა, მას შემდეგ რაც მეკუბოვეს მაღაზიის კარი შეამტვრიეს; ჭირისუფლების გადასაყვანად მეეტლეს დაქირავებაც კი გაჭირდა.
პანაშვიდზე მიწვეული სამი მღვდელიდან დიდი ხვეწნისა და მუდარის შემდეგ მხოლოდ ერთი გამოცხადდა, მაგრამ ბოლოს შეშინებულმა მიატოვა ცერემონია.
შეიარაღებულმა ტერორისტებმა სასაფლაოზე მისულ კაზაკებს არ მისცეს საფლავის გათხრის საშუალება.
ნიკო ლესელიძე (მეორე მსოფლიო ომის გმირის, გენერალ ლესელიძის მამა) ,,მოკლე პალტოთი სახე აუკონელი”, გადაჭრილი ბერდენათი რუს ჯარისკაცებთან მიიჭრა და რუსულად შესძახა: ,,არც ერთ თქვენგანს თავი კისერზე არ შერჩება, თუ ამ ძაღლის საფლავს ეხლავე არ განშორდებითო.”
საფლავის გათხრა მხოლოდ კაზაკთა როტის ჩარევის შემდეგ მოხერხდა.
ამონარიდი ირაკლი მახარაძისი წიგნიდან ,,გურიის რესპუბლიკა":
ფოტოზე ნიკო ლესელიძე, wikipedia.
