ქორწინების შესახებ რეფერენდუმის საკითხის ერთ-ერთი ინიციატორი სანდრო ბრეგაძე აცხადებს, რომ საქართველოს პრეზიდენტის მიმართ ხორციელდება ზეწოლა ჰომოსექსუალების უფლებების დამცველი ორგანიზაციებისგან, გარკვეული უცხოური ორგანიზაციებისგან და საქართველოში აკრედიტირებული ზოგიერთი დიპლომატიური უწყებისგან. სანდრო ბრეგაძის ინფორმაციით, პრეზიდენტს მოუწოდებენ, რომ ამ საკითხზე რეფერენდუმი არ ჩატარდეს.
”ისინი მოუწოდებენ საქართველოს პრეზიდენტს, რომ მან მოიგონოს მიზეზი, არავითარ შემთხვევაში არ დაუშვას ქართველი ერის ნების გამოხატულება და ამ საკითხის რეფერენდუმზე გატანა. ეს გახლავთ ჩვენს ხელთ არსებული გადამოწმებული ინფორმაცია, რომელიც ჩვენ მივიღეთ პირადად პრეზიდენტის ადმინისტრაციის საკმაოდ მაღალი ჩინის ადამიანებისგან, რომლებიც აზროვნებენ ქართულად, ეროვნულად და რომლებისთვისაც მიუღებელია ის ზეწოლა, რასაც საქართველოს პრეზიდენტი განიცდის” , _ ამბობს სანდრო ბრეგაძე.
საინიციატივო ჯგუფის წევრები ამ საკითხში ასევე აშშ-ს ელჩის, იან კელის ჩარევაზეც საუბრობენ.
”აშშ გახლავთ ჩვენი მეგობარი ქვეყანა, მან გაჭირვების ჟამს არაერთჯერ გაუწოდა დახმარების ხელი საქართველოს, ქართველ ერს, მოწადინებული ვართ, რომ აშშ-სთან საქართველოს ჰქონდეს მეგობრული, პარტნიორული ურთიერთობა, მაგრამ თუკი დადასტურდება და არსებობს სერიოზული ინფორმაციები იმის შესახებ, რომ აშშ-ის ახლანდელი ელჩი, იან კელი ერევა ამ საქმეში და ის ახდენს გარკვეული ტიპის ზეწოლას საქართველოს პრეზიდენტზე, მაშინ თავად აშშ-ს ადმინისტრაციას მოუწევს გარკვეული ტიპის გადაწყვეტილების მიღება თავის დიპლომატიურ კორპუსთან დაკავშირებით, რადგანაც ასეთი ტიპის ჩარევა და ზეწოლები არ წაადგება საქართველო აშშ-ს კეთილ, პარტნიორულ და მეგობრულ ურთიერთობას”, _ თქვა ბრეგაძემ.
