ოზურგეთის მუნიციპალიტეტის სკოლამდელი სააღმზრდელო-საგანმანათლებლო ცენტრი ახალჩამოყალიბებული სამსახურია. იგი 2010 წლის 4 აგვისტოს შეიქმნა და მისი არსებობის ფუნქცია და მთავარი მიზანი ოზურგეთის მუნიციპალიტეტის ტერიტორიაზე არსებული 35 საბავშვო ბაღის ცენტრალიზებული მართვაა. ცენტრის დირექტორი მაკა ჭყონია, პროფესიით ისტორიკოსი, აქამდე ოზურგეთის #1 საჯარო სკოლაში მუშაობდა. თვითონ ამბობს, რომ ახალშექმნილ თანამდებობაზე მუშაობის პირველ ეტაპზე პრობლემებიც არსებობს და ნაკლიც არაერთგან აღმოაჩინა, რეაგირებაც მოახდინა, თუმცა არა _ რადიკალური, რადგან, მიიჩნევს, რომ სამსახურში “ახალი ცოცხის” იმიჯით არ მისულა. ამბობს, რომ საბავშვო ბაღებში საქმე იდეალურად არ არის და სურს, თანამედროვე მოთხოვნების კვალდაკვალ, ისე წარმართოს მუშაობა, რომ სკოლამდელ დაწესებულებებში პატარებისა და მათი მშობლების მოსაწონი და სასურველი გარემო შექმნას.
_ ქალბატონო მაკა, რას გულისხმობს საბავშვო ბაღების ცენტრალიზებული მართვა?
_ ცენტრალიზებულ მართვაში იგულისხმება, როგორც სასწავლო-სააღმზრდელო პროცესების ეფექტურად მართვა, ასევე ფინანსების მიზნობრივი ხარჯვა. უნდა მოხდეს ხელფასის სწორი განაწილება და საჭიროების მიხედვით შტატების განლაგება. არსებობს როგორც ერთი და ორი, ასევე რამდენიმეჯგუფიანი საბავშვო ბაღები. რა თქმა უნდა, ეს ჯგუფები კონტიგენტის მიხედვით ივსება. სადაც მცირეა, იქ ერთი ჯგუფია, მატების მიხედვით იზრდება ჯგუფების რაოდენობაც. გვყავს, როგორც ერთჯგუფიანი, ისე ორი, სამი, ოთხი, ხუთი და ექვსჯგუფიანი საბავშვო ბაღები.
_ რომელი კატეგორიის ოჯახების ბავშვებს არ აქვთ გადასახადი?
_ სოციალურად დაუცველი, მრავალშვილიანი და ლტოლვილთა ოჯახების შვილები გათავისუფლებულნი არიან გადასახადისგან, დანარჩენ ბავშვებს კი აქვთ შეღავათიანი გადასახადი _ ქალაქის ბაღებში, თვიურად 15 ლარია გადასახადი, სოფელში კი _ 10 ლარი. თუ მოვიშველიებთ მარტივ არითმეტიკას და დღიური კვების ხარჯს _ 1.15 ლარს გავამრავლებთ 22 სამუშაო დღის რაოდენობაზე, ვნახავთ, რომ ერთი ბავშვის კვება თვეში 25 ლარი და 50 თეთრი ჯდება.
_ შემოწმების რა მექანიზმი გაქვთ, რომ ვინმეს ხელი ბავშვის ჯამში ჩასაყოფად არ წაცდეს?
_ ჩვენ მთავარი ყურადღება აქეთ გვაქვს მიმართული _ გვყავს მონიტორინგის ორი ჯგუფი და სისტემატურად ვატარებთ კიდეც მონიტორინგს. როცა შემოწმებაზე გავდივართ, მხოლოდ მანქანაში ჩაჯდომის შემდეგ ვეუბნები თანამშრომლებს, სად მივდივართ. უნდობლობის პრობლემა არ მაქვს, ძალიან მიზანსწრაფული გუნდი მყავს, მაგრამ “ენდე და შეამოწმეს” პრინციპი, ვისი მოგონილიც არ უნდა იყოს, მომწონს. მაქვს დიდი სურვილი, ძლიერი რგოლი ჩამოყალიბდეს ჩვენი საგანმანათლებლო ცენტრის სახით.
_ როგორი სახის დარღვევა აღმოაჩინეთ და რა ღონისძიება გაატარეთ?
_ დარღვევა არ არის, როცა აღმზრდელი მასწავლებელი ან მზარეული ადგილზე არ დაგხვდება? მერე რა, რომ იქ იყო სხვა რომელიმე თანამშრომელი. ასეთი ქცევა მე აღმაშფოთებლად მიმაჩნია. გარკვეულ პირებს გამოვუცხადე სასტიკი საყვედური, გავაფრთხილეთ, რომ სამუშაო საათებში, თუნდაც მცირე დროით, სამსახურის დატოვების გამო, რა თქმა უნდა, წინასწარი განცხადების გარეშე, გათავისუფლდებიან სამსახურიდან.
_ როგორი დასწრებაა მუნიციპალიტეტის საბავშვო ბაღებში? გაცდენები თუ აღირიცხება?
_ამ საკითხს საგანგებოდ ვაქცევ ყურადღებას. დღემდე არსებობს ტერმინი “მოსიარულე”, რაც მაღიზიანებს და ყველანაირად ვცდილობ, ეს ტერმინი გაქრეს ჩვენი სისტემის მუშაკთა მეტყველებიდან. ე.წ. “მოსიარულე” ნიშნავს ბაღში არასისტემატურად დამსწრე ბავშვის ჩამნაცვლებელ ბავშვს, რომელიც შესაბამისად ჯამში სხვაობას იძლევა, რადგან სრული დასწრების შემთხვევაში, ჩვენ აღმოვჩნდებით სერიოზული პრობლემის წინაშე.
_ ამ შემთხვევაში რა ემართება ბავშვის ულუფას _ “ხალტურა” ხომ არ ხდება? ან ასეთი ბავშვების მშობლები თუ იხდიან გადასახადს?
_ რა თქმა უნდა, გადასახადს მშობლები იხდიან. რაც შეეხება დარჩენილ ულუფას, იგი მზა სახით ნაშთში გადადის და მაცივარშივე კონტროლდება. აღრიცხვის ჟურნალის მიხედვით, მნეს მასწავლებელი მიუთითებს, რამდენი ბავშვისთვის სჭირდებათ პროდუქტი. ყოველ მეორე ორშაბათს, მენეჯერები ახდენენ ნაშთის კონტროლს, შემდეგ იმ ნაშთს მიემატება იმდენი, რამდენიც სჭირდებათ მომდევნო კვირისთვის და ორ დღეში ხდება მარაგის შევსება.
_ მე მინახავს თქვენს სისტემაში განახლებული მუშაობით კმაყოფილი მშობლები, თუმცა უკმაყოფილოებიც შემხვედრია, რომლებსაც გადასახადის, თქვენი გათვლით თუნდაც მინიმალურის, გადახდა უჭირთ.
_ ბუნებრივია, კარგი იქნება, ყველა სრულად იყოს გათავისუფლებული გადასახადისგან, მაგრამ ეს ფუფუნება არ გვაქვს. როცა რამდენიმე კატეგორიის ოჯახია გათავისუფლებული გადასახადისგან, სხვაც ფიქრობს, იგივე მდგომარეობაში აღმოჩნდეს. თუმცა, ვიმეორებ, გადასახადი, რომელიც დღეისთვის არსებობს, შეღავათიანია და ხელმისაწვდომი ასეთი მშობლებისთვის.
_ ადრე სკოლამდელი დაწესებულებები განათლების სამინისტროს ექვემდებარებოდა, ახლა მუნიციპალიტეტი მფარველობს. მიიჩნევთ თუ არა, რომ როგორც განათლების სისტემაში, თქვენთანაც რეფორმაა საჭირო? ვთქვათ, აღმზრდელების გადამზადება…
_ გარკვეული სახის რეფორმა ჩვენთან უკვე მოხდა, რაზეც ზემოთ გესაუბრეთ, თუმცა ეს არ არის საკმარისი. გვინდა, აღმზრდელებმა აუცილებლად გაიარონ ტრენინგები, მოხდეს გადამზადება, მიღებული გვაქვს ახალი სასწავლო სტანდარტები, რომლის მიხედვითაც უნდა ვიმოქმედოთ. ვაკვირდებით ინკლუზიურ ბავშვებს, ასეთები ცოტა გვყავს, სულ ორი-სამი _ მათ მიმართ გვაქვს ინდივიდუალური მიდგომა. აღმზრდელებმა ისინი ძალიან კარგად ჩართეს საახალწლო ღონისძიებაში. მაქვს უდიდესი სურვილი, უახლოეს მომავალში ჩვენი ცენტრი გაძლიერდეს, რაშიც დარწმუნებული ვარ, დამეხმარება ყველა იმ შენიშვნისა თუ უკმაყოფილების მიზეზებში ჩაძიება, რაც მშობლებს თუ ნებისმიერ დაინტერესებულ პირს გაუჩნდება.
