ლატვიის სოფლის მეურნეობის სამინისტრო აპირებს ირლანდიაში (სადაც ლატვიელ ემიგრანტთა დიდი რაოდენობაა) და სხვა ქვეყნებში მცხოვრებ თანამემამულეებს სამშობლოში დაბრუნებასა და ბიზნესის დაწყებაში ხელი შეუწყოს. Tvnet.lv-ის სატელევიზიო გადაცემა „900 წამში“ ლატვიის სოფლის მეურნეობის მინისტრმა განაცხადა, რომ „ნათლად ხედავს ადამიანებს, რომლებსაც შეუძლიათ, სოფელში დაბრუნდნენ და საკუთარი ბიზნესი წამოიწყონ“.
კითხვაზე _ რა ფინანსური სახსრებით უნდა დაიწყონ ფერმერობა ლატვიელმა ემიგრანტმა, სოფლის მეურნეობის მინისტრი სტრაუიუმა მიუთითებს, რომ ევროკავშირის ფონდებში გამოუყენებელი სახსრები ჯერ კიდევ არსებობს.
„ნათლად ვხედავ ადამიანებს, მათ შორის სტუდენტებს, რომლებსაც შეუძლიათ, სოფელში დაბრუნდნენ, საკუთარი ბიზნესი დაიწყონ და სამი-ოთხი ადამიანიც დაასაქმონ. მოვუწოდებ უცხოეთში მცხოვრებ ჩვენს თანამემამულეებს, რომლებსაც უკვე აქვთ გარკვეული ფინანსური დანაზოგი, ლატვიაში დაბრუნდნენ და კაპიტალი თუნდაც მცირე ბიზნესის წამოწყებაში დააბანდონ“. _ განაცხადა სტრაუიუმამ.
ლატვიის მთავრობა სოფლის მეურნეობის დარგის უფრო ფართოდ განვითარებაზე ზრუნავს. ამ მიზნით შემუშავდა პროგრამები: „ახალგაზრდა ფერმერთა მხარდაჭერა“ და „ნატურალური პროდუქტების წარმოების რესტრუქტურიზაციის მხარდაჭერა“. მინისტრის განმარტებით, ასევე, შეიძლება, იმ ახალგაზრდებმა, რომლებსაც სოფლად მუშაობა სურთ, მცირე და საშუალო ფერმერული მეურნეობა ევროკავშირის პროექტებიდან მიღებული ფინანსური მხარდაჭერით მოაწყონ.
