გუშინ დაიწყო საქართველოს XXVIII საფეხბურთო ჩემპიონატი.
გარდამავალი ჩემპიონატის პირველი ტურის 6-ვე შეხვედრა გაიმართა. ლანჩხუთის ,,გურიამ’’ საკუთარ სტადიონზე ცხინვალის ,,ცხინვალს’’ უმასპინძლა და პირველ შეხვედრაში პირველი ფრეც ითამაშა.
პირველივე წუთებიდან სცადა "გურიამ" გატანა. ყველაზე მეტად ბრაზილიელი დებიუტანტი ლეგიონერები აქტიურობდნენ _ მანოელ ფილიპე და სილვა მოედანზე ერთ-ერთი საუკეთესო გახლდათ, ხოლო დინიზ ადევარდო და სილვა თავით თითქმის ყველა ორთაბრძოლას იგებდა, თუმცა თანაგუნდელები ამით ვერ სარგებლობდნენ.
ორივე ტაიმი მასპინძლების უპირატესობით მიმდინარეობდა, თუმცა სამი ქულის მოპოვება გუნდმა ვერ შესძლო. მოროზენკომ პენალტი ვერ გამოიყენა, მეკარე კი მოტყუვდა, მაგრამ ბურთი ძელს მოხვდა.
წინა სეზონისგან განსხვავებით, „ცხინვალი“ შესუსტებულად გამოიყურება და ლიგიდან გავარდნის ერთ-ერთი მთავარი კანდიდატია. ქულების დაკარგვა ასეთ გუნდთან ძვირად დაუჯდება „გურიას“. ის კი არა, სტუმრებს ბოლო წუთზე მოგებაც შეეძლოთ. შეტევაში გართულ მეტოქეს, შეცვლაზე შესული 16 წლის მორის გელაშვილი გაეპარა და მეკარესთან პირისპირ შეყრილმა სტუმართა ახალბედამ ვერ ივარგა, ბურთს უხეიროდ დაჰკრა ფეხი და იმერლიშვილმა იოლად აუღო.
გურია: იმერლიშვილი, ჭეიშვილი, ბ. ცინცაძე, ნოზაძე, მეგრელიშვილი, ზ. თევზაძე, ჭეჭელაშვილი, ფილიპე და სილვა, მოროზენკო (76. სტეფნიაშვილი), ადევარდო და სილვა, ჭედია (84. იმნაძე).
შეგახსენებთ, რომ 7-7 გუნდი ორ ჯგუფად არის გადანაწილებული. "თეთრ" და "წითელ" ჯგუფებში სამ-სამი მატჩი ჩატარდა. ლანჩხუთის ,,გურია’’ თეთრი ჯგუფის წარმომადგენელია.
"თეთრი გუნდის" შედეგები:
საჩხერის "ჩიხურასა" და თბილისის "დინამოს" შორის მატჩი უგოლო ფრედ დასრულდა.
ქუთაისის "ტორპედოსა" და ქობულეთის "შუქურას" შორის შეხვედრა წინა ორის მსგავსად 0:0 დასრულდა.
რაც შეეხება წიტელ ჯგუფს ბათუმის "დინამოსა" და "სამტრედიას" შორის შეხვედრა ფრედ ანგარიშით 1:1 დასრულდა.
ფოთის "კოლხეთმა" სტუმრად მინიმალური ანგარიშით "ზუგდიდი" დაამარცხა.
ასევე, სტუმრად იმარჯვა "საბურთალომ", რომელმაც ბოლნისის "სიონს" ანგარიშით 2:1 სძლია.
თბილისის "ლოკომოტივი" და გორის "დილა" პირველ ტურში ისვენებენ.
მეორე ტურს, ლანჩხუთის ,,გურია’’ სტუმრად 13 აგვისტოს, თბილსში, ,,დინამოსთან’’ ითამაშებს.
