გურიის „გაერთიანებული დემოკრატიული მოძრაობის“ წარმომადგენლები ავრცელებენ ინფორმაციას, რომ გომისმთის სახალხო დღესასწაულზე ადგილი ჰქონდა ადმინისტრაციული რესურსის გამოყენებას.
“07.08.2016 წელს ოზურგეთის მუნიციპალიტეტის საბიუჯეტო სახსრებით მოწყობილ ღონისძიებაზე _ გომისმთობაზე, ოზურგეთის გამგებელმა და გურიის მხარის გუბერნატორმა დამსწრე საზოგადოებას წარუდგინეს „ქართული ოცნების“ ოზურგეთის მაჟორიტარი დეპუტატობის კანდიდატი, რომელმაც ამავე ღონისძიებაზე ისაუბრა ქართული ოცნებისა და მის სამომავლო გეგმებზე.
მედიის საშუალებით გავრცელდა შეხვედრასთან დაკავშირებული ფოტო, ვიდეო და ბეჭდური მასალა, საიდანაც აშკარად იკვეთება საბიუჯეტო სახსრებით დაფინანსებულ ღონისძიებაზე წინასაარჩევნო აგიტაციისა და ამ მიზნით ადმინისტრაციული რესურსის გამოყენების ნიშნები. კერძოდ, მოცემულ შემთხვევაში მიგვაჩნია, რომ დარღვეულია საარჩევნო კოდექსის 45-ე მუხლის მე-7 ნაწილი, ასევე, ამავე კოდექსის 48-ე მუხლის პირველი ნაწილი.
მიგვაჩნია, რომ აღნიშნული შემთხვევა საჭიროებს სპეციალური კომპეტენციის მქონე ორგანოს მხრიდან დეტალურ შესწავლას, დარღვევის დადასტურების შემთხვევაში კი, ასევე აუცილებლად მიგვაჩნია, შესაბამისი სანქციების დაკისრება დამრღვევ პირებზე. ხსენებულიდან გამომდინარე, მივმართავთ უწყებათაშორის კომისიას ხსენებული ფაქტის შესწავლისა და მასზე შემდგომი რეაგირების მოთხოვნით.
რომელიმე სუბიექტის მხრიდან ხალხის ფულით დაფინანსებული კულტურული ღონისძიებების გამოყენება წინასაარჩევნო კამპანიის ფარგლებში, დაუშვებლად მიგვაჩნია. აქვე მოვუწოდებთ „ქართულ ოცნებას“ და ყველა ადმინისტრაციულ ორგანოს წინასაარჩევნო პერიოდში თავი შეიკავონ საარჩევნო სუბიექტებს შორის არათანაბარი წინასაარჩევნო გარემოს შექმნისა და საარჩევნო კანონმდებლობის დარღვევისაგან“, _ აცხადებენ გურიის გაერთიანებული დემოკრატიული მოძრაობის ოზურგეთის ოფისში.
თავად არჩილ თალაკვაძე ამ საკითხს აბსურდულს უწოდებს და ვრცელ კომენტარს არ აკეთებს.
გავრცელებული ინფორმაციით, არჩილ თალაკვაძე გურიის გუბერნატორმა გია სალუქვაძემ წარადგინა.
გია სალუქვაძე “გურია ნიუსთან“ სატელეფონო საუბრის დროს ამბობს, რომ არჩილ თალაკვაძე იმყოფებოდა სტუმარის სტატუსით.
“ნამდვილად კარგად ვიცნობთ კანონმდებლობას და არანაირ დარღვევას იქ არ ჰქონია ადგილი. არჩილი იყო შინაგან საქმეთა მინისტრის მოადგილის რანგში და ასევე, სტუმარის სტატუსით. ნებისმიერ ადამიანს შეეძლო იქ ამოსვლა და ღონისძიებაზე დასწრება. ასევე, მინდა გითხრათ, რომ არანაირ საარჩევნო დაპირებებზე იქ საუბარი არ ყოფილა. როდესაც არჩილ თალაკვაძემ ისაუბრა კურორტის მნიშვნელობაზე და სიტყვა არ უთქვამს პარტიულ ღონისძიებებზე. არსებობს ამის ვიდეო კადრები და ეს არის მოგონილი, შეთითხნილი ბრალდება“, _ გვითხრა გია სალუქვაძემ.
“საერთაშორისო გამჭვირვალობა-საქართველოს“ პროგრამის მენეჯერი, ლევან ნატროშვილი ამბობს, რომ საარჩევნო კოდექსით აკრძალულია სახელმწიფო ბიუჯეტით ან ადგილობრივი ბიუჯეტიდან დაფინანსებულ ღონისძიებებზე აგიტაციის წარმართვა ორგანიზატორის მიერ.
“თუ ნამდვილად ჰქონდა ადგილი, რომ ღონისძიების დროს წარადგინეს კანდიდატი, მაშინ ორგანიზატორის მიერ ექნებოდა ადგილი. ვიდეოკადრებში, რომელიც გავრცელდა, მსგავს საკითხს ადგილი არ ჰქონია და შესაბამისად, აქ რთული სათქმელია, დაირღვა თუ არა კანონი“, _ თქვა ჩვენთან სატელეფონო საუბრის დროს ლევან ნატროშვილმა.
