“ეს რეგიონული შეხვედრები უკვე საერთო შეხვედრებად იქცა”

_ ქალბატონო მანანა, ამ დღეებში ხშირად საუბარი გაისმის გურიის მნიშვნელობაზე. თქვენი აზრით, რატომ კეთდება აქცენტი გურიაზე?

_ საქართველოს ყველა მუნიციპალიტეტი და რეგიონი ძალიან მნიშვნელოვანია. ამ შემთხვევაში გურიაში ჩამოვედით, რადგან გურიის ღონისძიება იგეგმება. კვირას დიდი აქცია გაიმართება. გურიის სამივე მუნიციპალიტეტიდან ხალხს ველოდებით ოზურგეთში. ახლა დამირეკა სიღნაღიდან ქალბატონმა, რომელიც ჩვენი აქტივისტია _ ის მოდის და ასევე კახეთიდანაც მოდიან. მე ვფიქრობ, რომ ეს რეგიონული შეხვედრები უკვე საერთო შეხვედრებად იქცა. ძირითადი მასა იქნება გურიის მუნიციპალიტეტებიდან. რა თქმა უნდა, გურიას ძალიან დიდი მნიშვნელობა აქვს. როგორც ცნობილია, ეს არის ოპოზიციურად განწყობილი რეგიონი, ამიტომ ძალიან მნიშვნელოვანია ჩვენი აქ ყოფნა, სწორედ ამ ძალამ უნდა აჩვენოს კვირას, რამდენი ვართ, რამდენია ჩვენი მხარდამჭერი და კიდევ ერთხელ დარწმუნდებიან ყველანი, რომ ჩვენ ვართ რეალური ძალა და რეალურად შევძლებთ ოქტომბრის არჩევნებში ამ ხელისუფლების დამარცხებას.

_ ეს კვირა ძალიან დატვირთული გამოდგა. კოალიცია “ქართული ოცნების” მხარდამჭერები და აქტივისტები გურიის სამივე მუნიციპალიტეტში შეხვედრებს მართავენ. ხომ არ ყოფილა ხელისშემშლელი ფაქტები?

_ მე, როგორც მივიღე ინფორმაცია, დავალებები აქვთ სოფლის რწმუნებულებს მიცემული, რომ მათ ზეწოლა მოახდინონ მოსახლეობაზე, დააშინონ ისინი, არ გამოუშვან შეხვედრებზე. კერძოდ, იქ სოციალური დახმარების მოხსნაზეც არის საუბარი, მაგრამ დარწმუნებული ვარ, ეს არ შეაშინებს საზოგადოებას და აუცილებლად მოვლენ აქციაზე.

_ ქალბატონო მანანა, თქვენ ხშირად ჩამოდიხართ გურიაში და როგორც ცნობილია, განსაკუთრებულად გიყვარს ეს მხარე.

_ ჩემი მეუღლე ლანჩხუთიდან იყო. სამწუხაროდ, გარდაცვლილია. ჩემი შვილები გურულები არიან. რაღაც პერიოდი მიწევდა ლანჩხუთში ყოფნა. ყოველ წელს ჩამოვდივარ ლანჩხუთში. იქ ყოველწლიურად უარესდება მდგომარეობა, ძალიან უჭირთ. მე ვიცი, ადამიანები თვიდან თვემდე ნისიად იღებენ პურს, შაქარს და ამ ნისიებიდან შემდეგ ვეღარ ამოდიან. უმუშევრობაა, ახალგაზრდებს არსად წასასვლელი არ აქვთ, სოფლები დაცლილია, ზოგი ახალგაზრდა თურქეთშია გადახვეწილი და ზოგი კიდევ თბილისშია წასული რაღაც დღიურ სამუშაოზე და ხან ისიც არ არის. სოციალური დახმარების გარეშე ბევრი ოჯახია დარჩენილი და ისინი ნამდვილად საჭიროებენ დახმარებას. ხუთი წლის წინ არ იყო ასეთი მდგომარეობა, როგორიც არის ახლა. ჩვენ გვაქვს იმის რესურსი, რომ ამ სიდუხჭირიდან ქვეყანა ამოვიყვანოთ.