ქალი პოლიტიკოსის კვირა _ ირინე საჯაია

8 აგვისტო, ორშაბათი

მეც მინდოდა დამეწყო დილას ჩაის ან ყავის დალევით ვიწყებ-მეთქი, მაგრამ არ გამომივა როცა 8 აგვისტოა და მართლაც მძიმე ორშაბათია, მთელი სიმძიმის შეგრძნებით. 08.08.08. _ 8 წლის შემდეგ აგვისტოს ომი როცა გახსენდება მშვიდად ვერ იქნები; როცა იცი, რომ შენი მეზობელი, შენი ქვეყნის ოკუპანტია, როცა ირგვლივ ყველა და ყველაფერი ამ ომს უკავშირდება. დიდება გმირებს, რომლებმაც სამშობლოს ტერიტორიული მთლიანობისათვის ბრძოლას თავი შეწირეს და იმ უბრალო მოქალაქეებს, რომლებიც ომს ემსხვერპლნენ. 

2008 წლის 7 აგვისტო მახსენდება. ამ დღეს შვებულებაში გავედი და ბათუმში გავემგზავრე. მაშინაც საკრებულოს წევრი ვიყავი. იმ დღესვე სასწრაფოდ გამომიძახეს სამსახურში. საგანგებო შტაბები ამოქმედდა  მუნიციპალიტეტებში. სამხედრო ფორმა გავამზადე… კოშმარი დაიწყო… ამის შემდეგ აგვისტოში შვებულებაში აღარ გავდივარ…

“პოლიტიკა თითქმის ისეთივე ამაღელვებელი და სახიფათოა, როგორც ომი. მათ შორის ერთადერთი განსხვავება ისაა, რომ ომში მხოლოდ ერთხელ შეიძლება მოგკლან, ხოლო პოლიტიკაში მრავალგზის“. ეს ჩერჩილის სიტყვებია. კი, პოლიტიკაში ყოფნა ძალიან ძნელია ქალი იქნები თუ კაცი. მე კი საკმაო გამოცდილება დამიგროვდა, ბვრჯერ ,,მომკლეს“, მაგრამ… მესამე მოწვევის საკრებულოს წევრი გახლავართ. ვთვლი რომ, თვითმმართველობა ჩემი პროფესიაა.

ჩემი თვითმმართველი ქალაქის საკრებულოში _ სამსახურში მოვედი. კოლეგებთან და თანამშრომლებთან ერთად ომის თემაზე და ზოგადად პოლიტიკაზე საუბრით ვიწყებთ.

 ახალი წერილიც დამეწერა საქართველოს რეგიონალური განვითარების და ინფრასტრუქტურის სამინისტროდან. შევისწავლე და კომისიის სხდომა დავგეგმე.

  9 აგვისტო, სამშაბათი

ძალიან ცხელა. მეზობლები წამოვიყვანე ქალაქამდე, მათგან ბევრ რამეს ვიგებ უბნის პრობლემებზე, უბნელების ახალი ამბების შესახებ. სამსახურში მოსვლამდე პროფილაქტიკაში შევიარე, ცოტა პრობლემა ჰქონდა ჩემს პატარა მანქანას. მასაც ყურადღება სჭირდება.

 დღეს ოზურგეთის ოლიმპიურ სახლში კრივის რინგის სექცია გაიხსნა, კრივის სექცია არსებობდა, მაგრამ რინგი არასოდეს ყოფილა. სპორტსმენებს ოლიმპიური სახლის პირველი სართული უზურფრუქტით გადაეცათ. სპეციალისტი კი იური საჯაიაა. სპორტსმენებმა მირჩიეს ადგილზე ვნახო რა სიტუაციაა.  რამდენიმე დღის წინ მე და ნინო ტაბატაძემ მოვინახულეთ ოლიმპიური სახლი და რინგიც დავათვალიერეთ. მივესალმები კარგი საქმეების კეთებას ჩემს ქალაქში, მითუმეტეს იმას რაც ჯანსაღი ცხოვრების წესს უკავშირდება. დღესვე ოფიციალურად ქალაქ ოზურგეთის მუნიციპალიტეტმა სასწრაფო სამედიცინო დახმარების ოზურგეთის რაიონულ სამსახურს გარემონტებული ადმინისტრაციული შენობა უვადო უზურფრუქტით გადასცა, სადაც სამედიცინო პერსონალისათვის და მძღოლებისთვის სამუშაო და მოსასვენებელი ოთახებია გამოყოფილი. ოზურგეთის სასწრაფო სამედიცინო დახმარების რაიონული სამსახურის 55 თანამშრომელი ამ დრომდე სამედიცინო ცენტრ ,,მედალფა“-ს კლინიკაში იყო განთავსებული. როცა სასწრაფოსათვის შენობის  და სარემონტო თანხების გამოყოფისათვის მერია საკრებულოსაგან თანხმობას ითხოვდა, საკრებულოს წევრები ერთიანად თანახმა ვიყავით. რაც სამწუხაროდ ქალაქის საკრებულოში იშვიათობაა, ხანდახან კარგი საქმეების კეთების შემთვევეაშიც, აბა შეცდომებზე ყვირილს ვერავინ დამასწრებს.

საღამოს ჩემი მეგობარი ჩამოვიდა ჩოხატაურში თბილისიდან, ჩავაკითხე და ნიაბაურში წავედით ჩვენს მეგობარ ჩხაიძესთან. რესტორანი ,,ნიაბაური“, სადაც ჩვენი სამეგობროს შეხვედრების ადგილია, სადაც მართლა სამოთხეა და უგემრიელესი კერძები. ამას რეკლამის გულისთვის არ ვწერ და იმის გამო, რომ რესტორნის მფლობელი ჩემი მეგობარი მარინა ჩხაიძეა, ეს მართლა ულამაზესი და უმშვენიერესი ადგილია მდინარე აჭის ხეობაში.

10 აგვისტო, ოთხშაბათი

პაპანაქება სიცხეებია, თან აგვისტო და შვებულებების დრო. მოახლოებული საპარლამენტო არჩევნები და პოლიტიკური დუღილი ქვეყანაში. ეს ერთადერთი არჩევნებია, სადაც მონაწილეობას არ ვიღებ… კი, არჩევნები აზარტია. მე მგონი, მომენატრა.

დილით ისევ მეზობლები დამემგზავრენ. სამსხურში, როგორც კი შემოვდივარ, საკრებულოს აპარატის თანამშრომლების ოთახს გულგრილად ვერ ჩავუვლი. ჩვეულ ამპლუაში არიან. ამ კვირაში არც ბიუროს სხდომაა და არც საკრებულოს, თორემ აპარატის უფროსს ასე მშვიდად ვერ ვნახავდი, შესაბამისად ვერც დანარჩენებს. ჩემი ქეთი (კომისიის ექსპერტ-კონსულტანტი) შვებულებაშია, თორემ აუცილებლად გამახსენებდა ან წერილს, ან ისეთ თემას, რომელიც შეიძლება გამომრჩენოდა.

ბატონ გურამ ბერძენიშვილთან შევედი, ცენტრალური სტადიონის სახელის მინიჭების თაობაზე, წინა კვირაში, ამ საკითხთან დაკავშირებით კომისიებს გაერთიანებული სხდომა გვქონდა.  მარტო ამ თემაზე არ გვისაუბრია _ ძალიან მიყვარს ბატონ გურამთან საუბარი, მრავალმხრივ ნიჭიერი და განათლებული ადამიანია.

მოქალაქეთა მიღების დღეები, როგორც საკრებულოს წევრს და კომისიის თავმჯდომარეს გამოყოფილი მაქვს  გრაფიკის  მიხედვით, მაგრამ რა მნიშვნელობა აქვს, როცა მოქალაქეები მოდიან  _ პასუხის გაცემა და დახმარება ჩვენი მოვალეობაა. ამ დღესაც ორი მოქალაქე მოვიდა ანასეულიდან ,,C” ჰეპატიტის პროგრამასთან დაკავშირებით. მუნიციპალიტეტი აფინანსებს ,,c“ ჰეპატიტით დაავადებულ პირებში მკურნალობის ტაქტიკის განსაზღვრისათვის კვლევას, რაც დიდი შეღავათია ამ ვირუსით დაავადებულ ადამიანებისათვის. 

საღამო იყო უჩვეულოდ მშვიდი და წყნარი ოჯახთან ერთად _ დედაჩემთან, ჩემს დასთან და მუდმივად სახლიდან გავარდნილ ერეკლესთან (ჩემს დისშვილთან) ერთად.

11 აგვისტო, ხუთშაბათი

დილით სამსახურში მოვედი, ელ-ფოსტას გადავხედე; განათლების სამინისტროში უნდა ვიყო 19 აგვისტოს, როგორც MSPA-ს მუშა ჯგუფის წევრი, შეხვედრაა სკოლამდელი განათლების საკითხთან დაკავშირებით. სექტემბრის დასაწყისში კი GIZ  ბორჯომში აწყობს ყოველწლიურ შეხვედრას კავკასიის რეგიონის თვითმმართველობის წევრ ქალებთან ერთად. რეგიონალური გაზეთები და  Facebook-ი აჭრებულია ოზურგეთელების ერთი ნაწილის პეტიციით, ე.წ. 9 აპრილის პარკში გზის გაჭრასთან დაკავშირებით. სამშაბათს, 16 აგვისტოს დემოკრატიული ჩართულობის ცენტრში საჯარო განხილვაზე ვართ მიწვეული. ამ საკითხთან დაკავშირებით ჩემი პოზიცია დავაფიქსირე და კიდევ ვაპირებ აზრი გამოვთქვა.

ხუთშაბათს, სრულიად მოულოდნელად სტუმრები მეწვივნენ. საკრებულოს თავმჯდომარეს ვუთხარი, რომ მივდიოდი და პარასკევსაც ვერ მოვახერხებდი სამსახურში მოსვლას. გელა _ მუდამ მშვიდი და გაწონასწორებული ადამიანი, რაც მთავარია კარგი ხელმძღვანელი, ასევე მშვიდად შეხვდა ჩემს თხოვნას. ჰოდა, გავყევი ჩემს სტუმრებს სენაკის მუნიციპალიტეტში ნოქალაქევი-არქეოპოლისის დასათვალიერებლად. ალბათ 20 წლის უკან ვიყავი ნოქალაქევში, მაშინ, როცა მუზეუმში ვმუშაობდი და ენვერ გოგუაძე გვიყვებოდა თანამშრომლებს კოლხეთის სამეფოს დიდებაზე. ჯერ მუზეუმი დავათვალიერეთ; აბა ისე როგორ იქნებოდა… ვთვლი, რომ მაინც მუზეუმელი ვარ, სანამ პოლიტიკაში მოვიდოდი, ოზურგეთის ისტორიულ მუზეუმში ლამის ოცი წელი ვიმუშავე… მერე ნოქალაქევის, ციხეგოჯის გალავანი, ეკლესია და ძველი კოლხეთის სამეფოს დიდების ნაშთები. სტუმრები კმაყოფილი დარჩნენ.

სენაკიდან ბათუმში გავემგზავრეთ. საღამო ძველი ბათუმის ერთ-ერთ კაფე-რესტორანში გავაგრძელეთ.

12 აგვისტო, პარასკევი

ბათუმი. დილა ინტერნეტში რეგიონალური გაზეთების გაცნობით იწყება, რა ხდება ახალი, რაიმე არ გამომრჩეს, თუ საჭირო იქნება მივატოვებ სტუმრებს და ჩემს უპირველეს საქმეს, რასაც საკრებულოს წევრობა და კომისიის თავმჯდომარეობა ჰქვია მივხედავ, ანუ ოზურგეთში მივბრუნდები. არ დარჩა საჭირო, ამიტომაც პარასკევი ჩემს საყვარელ ბათუმში სტუმრებთან ერთად გავატარე. საღამოს ქედაში _ ღვინის სახლში წავედით.

შაბათ-კვირისათვის მეგონა, რომ ჩემი ორი ყველაზე საყვარელი ბიჭი მესტუმრებოდა სამეგრელოდან, ჩემი ყველაფერი რომ არიან  _ იოვანე და ერეკლე, ორი და სამი წლის ბიჭები (დისშვილიშვილები), მაგრამ იმ კვირაში დაგეგმეს ჩამოსვლა.  ახლა მაინც ვერ მივიცლიდი. ვერც ჩემი საყვარელი ნათლული თომა ვნახე, რომელიც წელიწადში ერთხელ ჩამოდის ოზურგეთში ამერიკიდან  (ცუდი ნათლია ვარ, მაპატიეთ, ჩემო ძვირფასო ნათლულებო) და ვერც ჩემი ბიძაშვილი თიკო, რომელიც ავსტრიიდან ჩამოვიდა რამდენიმე დღით.

13-14 აგვისტო, შაბათი, კვირა

ბათუმი, ბათუმი, ბათუმი…

შემდეგი კვირის "ბლოგ-პოსტს" ჩემს კოლეგას, ოზურგეთის მუნიციპალიტეტის საკრებულოს დეპუტატს და გენდერული საკონსულტაციო საბჭოს თავმჯდომარეს ლელა ნაცვალაძეს ვაბარებ.

ირინე საჯაია,
ქალაქ ოზურგეთის მუნიციპალიტეტის საკრებულოს წევრი, საკრებულოს სამანდატო-საპროცედურო, იურიდიულ საკითხთა და ეთიკის კომისიის თავმჯდომარე