ცენტრალური საარჩევნო კომისიის თავმჯდომარე პოლიტიკურ პარტია "ცენტრისტებთან" დაკავშირებით განცხადებას ავრცელებს.
განცხადებაში ნათქვამია, რომ ცესკოს არ ევალება, შეისწავლოს პარტის ხელმძღვანელ პირთა არჩევისა და უფლებამოსილების კანონიერების საკითხი. აქედან გამომდინარე, ცესკოს თავმჯდომარე უსაფუძვლოს უწოდებს პარტიის საარჩევნო რეგისტრაციის საკითხზე ცესკოსადმი გამოთქმულ შენიშვნებს,
"პ/გ „ცენტრისტების“ რეგისტრაციასთან დაკავშირებით საარჩევნო ადმინისტრაციისთვის მედიასაშუალებებით გახდა ცნობილი საჯარო რეესტრის ეროვნული სააგენტოს განცხადება, რომელშიც აღნიშნულია, რომ საჯარო რეესტრის პირველი აგვისტოს საბოლოო გადაწყვეტილების შესაბამისად, პოლიტიკურ გაერთიანება „ცენტრისტებს“ მოცემული მდგომარეობით, არ ჰყავს წარმომადგენლობაზე უფლებამოსილი ხელმძღვანელი პირი.
აღსანიშნავია, რომ ცესკოს თავმჯდომარემ, პოლიტიკური გაერთიანება „ცენტრისტები“, 2016 წლის 2 ივნისის განცხადებისა და კანონით გათვალისწინებული დოკუმენტაციის საფუძველზე (ასევე, დამატებით მათ მიერ წარმოდგენილ იქნა პარტიის 2016 წლის 29 მაისის ყრილობის ნოტარიულად დამოწმებული ოქმი, რომლის მიხედვითაც პარტიის თავმჯდომარედ არჩეულია თემურ ხაჩიშვილი), საარჩევნო კოდექსის 113-ე მუხლის მოთხოვნების შესაბამისად, გაატარა საარჩევნო რეგისტრაციაში.
ნიშანდობლივია, რომ პარტიის საარჩევნო რეგისტრაციის მიზნებისთვის, ცესკოს არ ევალება შეისწავლოს პარტიის ხელმძღვანელ პირთა არჩევისა და უფლებამოსილების კანონიერების საკითხი; აღნიშნული, სხვა შესაბამისი უწყებების კომპეტენციაა. აქედან გამომდინარე, პარტიის საარჩევნო რეგისტრაციის საკითხზე ცესკოს ქმედებასთან დაკავშირებული შენიშვნები უსაფუძვლოა და არ ემყარება კომპეტენტურ მოსაზრებებს.
იმისთვის, რომ ცესკოს თავმჯდომარემ, ახლად დადგენილი გარემოების გათვალისწინებით, იმსჯელოს „ცენტრისტების“ საარჩევნო რეგისტრაციის საკითხზე, საჯარო რეესტრის მიერ ცესკოში დროულად უნდა იქნას წარმოდგენილი შესაბამისი გადაწყვეტილება.
ty.jpg_20498.jpg)
