“თავისუფალი დემოკრატების“ ოზურგეთის მაჟორიტარი დეპუტატობის კანდიდატი თემურ სალუქვაძის თქმით, ხელისუფლება და ხალხი სრულიად დაშორდა ერთმანეთს.
“ამის შესახებ, მე არაერთხელ მისაუბრია. მათი ინტერესები სრულიად აცდენილია ერთმანეთს, ეს, იმას ნიშნავს, რომ ხელისუფლებამ ამოწურა თავისი შესაძლებლობები და ერთ-ერთი ამის მათვარი მიზეზი არის არასწორი საკადრო პოლიტიკა. რეალურად, საკვანძო ადგილზე მოხვდნენ ადამიანები, რომელთაც არავითარი საერთო არ ჰქონდათ "ქართულ ოცნებასთან" და სულ სხვა წიაღიდან წამოსულ კატეგორიას წარმოადგენდნენ. ეს ტენდენცია ნათლად იკვეთება თვითმმართველობებშიც.
თვითმმართველობა ხომ ნიშნავს ხალხის მმართველობას, უშუალოდ ხალხის მონაწილეობას მუნიციპალიტეტის საჭირბოროტო საკითხების გადაწყვეტაში. ქვეყნის დემოკრატიული განვითარების ფორმატი ვერ იტანს მმართველობის ავტოკრატიულ ელემენტებს, პირიქით, მოითხოვს მეტ საჯაროობას და მოსახლეობის მაქსიმალურ ჩართულობას. ამის ნათელი მაგალითია, ის რაც ხდება ოზურგეთში, სკვერის ტერიტორიაზე საავტომობილო გზის მშენებლობასთან დაკავშირებით. არ ვიხილავ, კარგია თუ ცუდია პროექტი", _ ამბობს თემურ სალუქვაძე.
მისივე თქმით, ამასთან დაკავშირებით პროფესიონალებმა და სპეციალისტებმა უნდა თქვან თავიანთი ავტორიტეტული სიტყვა.
“თვითმმართველობა, როგორც ინსტიტუცია, ვერ ასრულებს თავის მთავარ ფუნქციას _ მაქსიმალურად ჩართოს მოქალაქეები თვითმმართველობის გახორციელებაში, ამიტომაც, მიღებული გადაწყვეტილება მიუღებელი გახდა ჩვენი მოქალაქეებისათვის. მიმაჩნია, რომ პროტესტი, რომელიც საღად, თავისუფლად მოაზროვნე ახალგაზრდების მხრიდან წამოვიდა, იყო დროული და მართებული, რადგან საჯაროობის დეფიციტი და ინფორმაციის სიმცირე მუდამ იწვევს მსგავსი ტიპის დაპირისპირებებს. ამავდროულად, ეს უნდა განვიხილოთ, როგორც ჯანსაღი მოვლენა. ამით, ახალგაზრდობა გამოხატავს ნებას, რომ თავის ქალაქში მიმდინარე პროცესების თანამონაწილე იყოს. მე, ჩემს გუნდთან ერთად, სოლიდარული ვარ მათი მოსაზრებებისა და დამოკიდებულებების მიმართ.
ვფიქრობ, თითოეული ჩვენგანის მოვალეობაა, საკუთარი ქალაქის კეთილდღეობისათვის და მისი უკეთესი პერსპექტივისთვის ბრძოლა!“ _ მიიჩნევს თემურ სალუქვაძე. (R)
