საქართველოს პრეზიდენტის გიორგი მარგველაშვილის ქონებრივ დეკლარაციაში ერთი წლის განმავლობაში მხოლოდ ფინანსური მდგომარეობა შეიცვალა.
როგორც პრეზიდენტის 2016 წლის აგვისტოში შევსებულ ქონებრივ დეკლარაციაშია აღნიშნული, გიორგი მარგველაშვილი ისევ ფლობს 4462 კვ.მ-ის ფართობის მიწის ნაკვეთს დუშეთში, სააკაძის 37 ნომერში, ამავე მისამართზე 200.00 კვ.მ-ისა და 40.00 კვ.მ-ის ფართობის საცხოვრებელ სახლებს და თბილისში, პაულო იაშვილის ქუჩაზე მდებარე 120.00 კვ.მ-ის ფართობის ბინას. ხოლო მისი მეუღლე, მაკა ჩიჩუა ფლობს თბილისში, ლერმონტოვი-ჯაფარიძის ქუჩების კვეთაზე არსებულ 70.00 კვ.მ-ის ფართობის ბინას. პრეზიდენტის მამის, თეიმურაზ მარგველაშვილის საკუთრებაში კი, თბილისში, პავლე ინგოროყვას ქუჩაზე მდებარე 165.00 კვ.მ-ის ფართობის ბინაა.
აქვე უნდა აღინიშნოს, რომ გიორგი მარგველაშვილის წინა წელს შევსებულ დეკლარაციაში დუშეთში მდებარე 5 მიწის ნაკვეთის ფართობი ცალ-ცალკეა მითითებული, წლევანდელ დეკლარაციაში კი, მათი გაერთიანებული ფართობი წერია.
რაც შეეხება პრეზიდენტის ფინანსურ მდგომარეობას, ქონებრივი დეკლარაციების შედარებით ირკვევა, რომ 2015 წელს შევსებული დეკლარაციის მიხედვით ოჯახის საერთო შემოსავალი 123 025 ლარი იყო, 2016 წლის დეკლარაციიდან კი ვიგებთ, რომ პრეზიდენტის ოჯახმა გასული წლის განმავლობაში 35 078 ლარით ნაკლები გამოიმუშავა, ჯამში კი ეს თანხა 87 947 ლარია.
კერძოდ, დეკლარაციის მიხედვით, გიორგი მარგველაშვილს გასული წლის განმავლობაში საქართველოს პრეზიდენტობისთვის 82 800 ლარი აქვს მიღებული, ისევე, როგორც 2014 წელს. ხოლო პრეზიდენტის დედამ, მზეანა გომელაურმა აპოლონ ქუთათელაძის სახელობის სამხატვრო აკადემიის ლექტორის პოსტისთვის 2270 ლარი; გრიგოლ რობაქიძის სახელობის უნივერსიტეტიდან, სადაც ის ასევე კითხულობს ლექციებს – 1577.50 ლარი, ხოლო საქართველოს საზოგადოებრივ საქმეთა ინსტიტუტიდან შემოსავლის სახით 1900 ლარი აქვს მიღებული.
დეკლარაციის შევსების მომენტში ოჯახის საკუთრებაში მათ საბანკო ანგარიშებზე ჯამში 378 დოლარი, 576 ევრო და 12 620 ლარი იყო. კერძოდ, გიორგი მარგველაშვილის , "თი–ბი–სი ბანკის" სახელფასო ანგარიშზე 9035 ლარი; თეიმურაზი მარგველაშვილის "ლიბერთი ბანკის" საპენსიო ანგარიშზე 180 ლარი; მზეანა გომელაურის "თი–ბი–სი ბანკის" სახელფასო ანგარიშებზე 504 და 1975 ლარი; მისივე ანგარიშზე "საქართველოს ბანკში" 600 ლარი; ხოლო მაკა ჩიჩუას მიმდინარე ანგარიშებზე "ქართუ ბანკში" 326.00; 378 დოლარი და 576 ევრო ჰქონდა.
ქონებრივი დეკლარაციის მიხედვით, პრეზიდენტის ოჯახი არ ფლობს ფასიან ქაღალდებსა და ძვირადღირებულ ნივთებს. გასული წლის განმავლობაში ოჯახს არც ფასიანი საჩუქრები მიუღია.
ამავე თემაზე:
რა ქონებას ფლობს პრეზიდენტი გიორგი მარგველაშვილი – ცვლილებები მის დეკლარაციაში
