რეჟისორ გოგა ხაინდრავას ფილმის _ „ჰეროკრატია“სატელევიზიო პრემიერა 6 სექტემბერს "იმედისა" და GDS-ის ეთერში გაიმართება.
”დავპირდი საზოგადოებას, რომ სააკაშვილის ხელისუფლებას ნიურნბერგის პროცესს მოვუწყობდი და მოვუწყვე კიდეც იმ ხერხითა და საშუალებით, რაც ხელმეწიფებოდა. მე არა ვარ იურისტი, ეს კინოპროცესია, სადაც განიხილება ის დანაშაულები, რომლებიც ჩადენილი აქვს გარკვეულ ხელისუფლებას გარკვეულ ქვეყანაში. ცნობილ გვარ-სახელებს აქ ვერ გაიგონებთ, თუმცა, გასაგები იქნება, ვინ ვინ არის”, _ ამბობს ხაინდრავამ.
როგორც რეჟისორი ამბობს, ფილმში მაქსიმალურადაა აღდგენილი გლდანის ციხე.
”ფილმში მაქსიმალურად ზედმიწევნით აღვადგინეთ გლდანის ციხე, რომელიც პატიმრებისთვის ყველაზე დიდი განსაცდელი იყო. იქნება ისეთი საქმეებიც, რომლის შესახებაც ცოტა რამ გვსმენია. არჩევანის გაკეთება ძალიან რთული იყო, რადგან საშინელი ტრაგიზმის და უბედურების არაერთი საქმე გვქონდა. ფილმში მოხვდა ის დანაშაულები, როდესაც ერთ კონკრეტულ ადამიანს დაუპირისპირდა მთელი სახელმწიფო მანქანა _ დაწყებული პრეზიდენტით და დასრულებული რიგითი ბადრაგით. ჩვენ ვაჩვენებთ მაყურებელს იმ სამზარეულოს, თუ როგორ წყდებოდა ე.წ. ღამის მთავრობაში ადამიანების ბედი, ვაჩვენებთ კულუარებს, ბნელ მხარეს, ჯოჯოხეთს, სადაც ეს ავადმყოფური იდეები იბადებოდა და მერე ხორცს ისხამდა”, _ აღნიშნა ხაინდრავამ.
რეჟისორი ”ფილმის ინტრიგად“ ტოვებს მსახიობის ვინაობას, რომელმაც სააკაშვილი განასახიერა, ამბობს, რომ ის უნიჭიერესი მსახიობია, რომელმაც მის მიერ შექმნილი სახით ძალიან გააოცა.
”მომეცით უფლება, ეს ფილმის ინტრიგად დარჩეს. ერთს გეტყვით – ის უნიჭიერესი ახალგაზრდა მსახიობია, თუმცა ჩვენში დიდად არ არის ცნობილი. წარმოადგენს ერთ მეტად პროფესიონალურ პატარა თეატრს. გამაოცა, ისეთი საოცარი სახე შექმნა. თეთრაძის როლს ასრულებს სოხუმის თეატრის მსახიობი მერაბ ბრეკაშვილი, ერთ-ერთი მოსამართლე მარინა ჯანაშიამ გააცოცხლა; სანდრო გირგვლიანის დედას, ირინა ენუქიძეს მაია ზედგენიძე განასახიერებს; მარჯანიშვილის თეატრის მსახიობი ბექა გოდერძიშვილი, ასევე, მოსამართლეს თამაშობს, მიმაჩნია, რომ ბექამ ძალიან ძლიერი პერსონაჟი შექმნა. ფილმში მთავარ როლშია ზურა ინგოროყვა, ძველ გვარდიას წარმოადგენს ამირან ბუაძე, ასევე, მონაწილეობს დარეჯან ხარშილაძე”, _ განაცხადა ხაინდრავამ.
