„რესპუბლიკურმა პარტიის“ ოფისში გამართულ პრესკონფერენციაზე დეპუტატმა ლევან ბერძენიშვილმა მაჟორიტარი დეპუტატობის ქალი კანდიდატები წარადგინა.
როგორც ბერძენიშვილმა ჟურნალისტებთან საუბრისას აღნიშნა, ქართველი ხალხი, პირველ რიგში, უნდა გათავისუფლდეს მოძველებული აზროვნებისგან.
„ჩვენი სლოგანი საარჩევნოდ გახლავთ „გავთავისუფლდეთ“. უნდა გავთავისუფლდეთ ბევრი რამისაგან, უპირველეს ყოვლისა, სტერეოტიპებისგან, მოძველებული აზროვნებისგან. ერთ-ერთი სტერეოტიპი გვეუბნება, რომ ქალის ადგილი პოლიტიკაში არ არის, რომ მისი ადგილი არის სამზარეულოში, რაც ღრმად არასწორი აზრი გახლავთ.
მეტი ქალი პოლიტიკაში _ ეს არის ლოზუნგი, დევიზი, რომლითაც ჩვენ დღეს გამოვდივართ. რას ნიშნავს მეტი ქალი _ ეს ნიშნავს მეტ სიმტკიცეს, მეტ სირბილეს ამავე დროს მოპყრობაში, მეტ სოლიდარობას, ეს ნიშნავს მშვიდობას, ბავშვებისა და ახალგაზრდების პრობლემების უკეთეს დანახვას, მრავალფეროვნებას, ბოლოს და ბოლოს, ეს ნიშნავს კონკურენციას მამაკაცებსა და ქალებს შორის, რომლის დროსაც იზრდება ხარისხი პოლიტიკაში“, _ განაცხადა ლევან ბერძენიშვილმა და „რესპუბლიკური პარტიის“ ცხრა მაჟორიტარი დეპუტატობის კანდიდატი დაასახელა: ხათუნა სამნიძე, ლელა ებრალიძე, ნინო გოგუაძე, ნატო ქათამაძე, თინა ხიდაშელი, ირინა გელაშვილი, ლია როინიშვილი თამარ ხიდაშელი, თამარ კორძაია.
„მე უბედნიერესი კაცი ვარ, რომ შემიძლია ეს ცხრა ადამიანი წარმოვადგინო. თავს ვგრძნობ აპოლონის მდგომარეობაში, რომელმაც 9 მუზა წარმოადგინა. ამ მუზების ადგილი არის პოლიტიკაში, ისინი იქნებიან პოლიტიკაში“, _ თქვა პრესკონფერენციაზე ლევან ბერძენიშვილმა.
