“გურია ნიუსის“ მიერ მოპოვებული ინფორმაციით, ოზურგეთის მუნიციპალიტეტის საჯარო სკოლის ოთხმა კურსდამთავრებულმა უმაღლეს სასწავლებელში 100%-იანი გრანტი მოიპოვა.
ამ ეტაპზე ცნობილი ხდება, რომ სოფელ შემოქმედში ანა საბაშვილმა, სოფელ მერიაში ცისი მოისწრაფიშვილმა, სოფელ ლიხაურში დალი რუსიეშვილმა და დათო ქავჟარაძემ მოიპოვეს სახელმწიფოსგან 100%-იანი დაფინანსება.
შემოქმედის საჯარო სკოლის დირექტორი, ნინო სადრაძე ჩვენთან საუბრის დროს ამ ინფორმაციას ადასტურებს.
“დიდი სიხარულით და სიამაყით გიდასტურებთ, რომ ანი საბაშვილმა, რომელიც სწავლობდა შემოქმედის საჯარო სკოლაში, სახელმწიფოსგან მიიღო 100-იანი დაფინანსება. ანი არის ვერცხლის მედალოსანი ოქროს გოგო", _ გვითხრა ნინო სადრაძემ.
მერიის საჯარო სკოლის დირექტორი, ავთანდილ კეჭაყმაძე ამბობს, რომ ცისი მოისწრაფიშვილი ძალიან აქტიური და განათლებული ახალგაზრდაა.
“ცისი ძალიან ბევრი და მნიშვნელოვანი საქმით იყო დაინტერესებული. მისი წარმატება ძალიან მიხარია და ჩვენი სკოლისთვის ნამდვილად სასიხარულო ამბავია", _ თქვა ავთანდილ კეჭაყმაძემ.
სოფელ ლიხაურის საჯარო სკოლის დირექტორმა, ირმა მენაბდემ “გურია ნიუსთან“ სატელეფონო საუბრის დროს თქვა, რომ სკოლის ორმა კურსდამთავრებულმა 100%-იანი გრანტი მოიპოვა.
“ველოდები მესამე კურსდამთავრებულის პასუხს. დარწმუნებული ვარ, რომ აკაკი გორდელაძის შესახებაც კარგ ინფორმაციას გავიგებ. სამივე მათგანი არის ნიჭიერი და შრომისმოყვარე ახალგაზრდა“, _ გვითხრა ირმა მენაბდემ.
სწორედ, ეს ახალგაზრდები და სკოლები მიიღებენ ოზურგეთის მუნიციპალიტეტის გამგეობიდან და საკრებულოდან ფულად საჩუქარს.
ოზურგეთის მუნიციპალიტეტის საკრებულოს პრესსამსახურის ხელმძღვანელის, ნათია ზედგინიძის თქმით, ოზურგეთის მუნიციპალიტეტის განათლების ხელშეწყობის პროგრამიდან ერთიანი ეროვნული გამოცდების შედეგების მიხედვით 100% გრანტის მფლობელი ახალგაზრდა ოზურგეთის მუნიციპალიტეტისგან ჯილდოს _ 3000 ლარს, ხოლო აღმზრდელი სკოლა _1000 ლარს მიიღებს.
ოზურგეთის მუნიციპალიტეტის გამგეობის მიერ მხარდაჭერილი _ წარმატებული აბიტურიენტის წახალისებისა და სტიმულირების პროექტის ინიციატორი, ოზურგეთის მუნიციპალიტეტის საკრებულოა. პროექტი პირველად 2015 წელს განხორციელდა.
ნატა ბაჯლიძე და სალომე მიქატაძე კი ის წარმატებული სტუდენტები არიან, რომლებმაც მშობლიური მუნიციპალიტეტისგან, გასულ წელს საჩუქრად 3000-3000 ლარი მიიღეს.
“გურია ნიუსი“, ასევე, ელოდება ოზურგეთის საგანმანათლებლო რესურსცენტრისგან ინფორმაციას, რომელსაც მიღებისთანავე შემოგთავაზებთ.
