2016 წლის 8 ოქტომბრის საპარლამენტო არჩევნებში გასამარჯვებლად პოლიტიკური პარტიების მიერ წარდგენილ კანდიდატებთან ერთად დამოუკიდებელი მაჟორიტარი კანდიდატებიც იბრძოლებენ. ამ დროის მონაცემებით, საინიციატივო ჯგუფების მიერ წარდგენილ კანდიდატთა საერთო რაოდენობა 79-ია, თუმცა საინიციატივო ჯგუფებს კანდიდატების წარდგენის ვადა 8 სექტემბრის ჩათვლით აქვთ.
საქართველოს საარჩევნო კოდექსის თანახმად, დამოუკიდებელი კანდიდატის წარდგენის უფლება მხოლოდ საინიციატივო ჯგუფს აქვს, აღნიშნულთან დაკავშირებით ცვლილება საარჩევნო კოდექსში 2016 წლის 12 ივილიდან ამოქმედდა.
კერძოდ, დამოუკიდებელი კანდიდატის წარმდგენი ამომრჩეველთა საინიციატივო ჯგუფი შედგება არანაკლებ 5 წევრისაგან; ამომრჩეველთა საინიციატივო ჯგუფის წევრი არ შეიძლება იმავდროულად იყოს სხვა ამომრჩეველთა საინიციატივო ჯგუფის წევრი. ჯგუფს უფლება აქვს, წარადგინოს მხოლოდ ერთი კანდიდატი.
ამავე კოდექსის თანახმად, დამოუკიდებელი კანდიდატის საარჩევნო კამპანია ამომრჩეველთა საინიციატივო ჯგუფის მიერ გახსნილი საარჩევნო ფონდიდან ფინანსდება.
საარჩევნო/სარეფერენდუმო კამპანიის ხარჯების გამჭვირვალობა უზრუნველყოფილია "მოქალაქეთა პოლიტიკური გაერთიანებების შესახებ" საქართველოს ორგანული კანონით გათვალისწინებული ნორმებით. ამ კანონის მოქმედება ვრცელდება ყველა საარჩევნო სუბიექტის კამპანიის ხარჯებზე, მათ შორის, დამოუკიდებელი კანდიდატების კამპანიის დაფინანსებაზეც.
ცესკოს მონაცემებით, ამ დროისთვის დარეგისტრირებულია 84 საინიციატივო ჯგუფი. მათ კანდიდატების წარდგენის ვადა, როგორც ზემოთ აღვნიშნეთ, საინიციატივო ჯგუფებს 8 სექტემბრის ჩათვლით აქვთ.
რაც შეეხება დამოუკიდებელ მაჟორიტარ კანდიდატებს, რომლებიც 2016 წლის 8 ოქტომბრის საქართველოს პარლამენტის არჩევნებში გამარჯვებისთვის იბრძოლებენ, ამ დროისთვის მათი საერთო ჯამი 59-ია.
ცესკოს ოფიციალურ ვებ-გვერდზე განთავსებული მონაცემების მიხედვით, ამ დროისთვის თბილისში 18 საინიციატივო ჯგუფის მიერ 18 კანდიდატია წარდგენილი.
კერძოდ, მთაწმინდაზე – სალომე ზურაბიშვილი და ლევან ჯოხაძე; ვაკეში – ზურაბ შარია, ჰამლეტ გეგია და მირიან მირიანაშვილი; საბურთალოზე კობა-კობახიძე, თამაზ კერძევაძე და ვიქტორ მეძმარიაშვილი; კრწანისში – მანანა აფხაძე და თამარ ბოყოველი; ისანში – დავით ჟრენტი და ირაკლი პეტრიაშვილი; სამგორში – ირაკლი შიხიაშვილი; დიდუბეში – გიორგი რურუა, ზურაბ ჩიქოვანი და დავით ფერაძე; ნაძალადევის ოლქებში თამარ იარაჯული და გიორგი აფციაური.
რაც შეეხება რეგიონებს, ჯერჯერობით დარეგისტრირებულ კანდიდატთა რაოდენობა 42-ია.
კერძოდ, საგარეჯოში არჩევნებში გამარჯვებისთვის კაზანფარ მამედოვი და სოლომონ პავლიაშვილი იბრძოლებენ; გურჯაანში – ელგუჯა გიორგაძე; ლაგოდეხში – ლაშა კანდელაკიშვილი, ალექსანდრე ვარდოსანიძე და მერაბ ფერაძე; თელავში – ვასილ კევლიშვილი; ბოლნისში – ნამიგ გაჯიევი; მცხეთაში – ცეზარ ჩოჩელი; კასპში – გიორგი ქვრივიშვილი; გორის ოლქებში – ირაკლი ოქრუაშვილი და ჯაბა იმერლიშვილი; ხაშურში – რამაზ ნოზაძე და პავლე ლაცაბიძე; ახალციხეში – ნუგზარ პარუნაშვილი; ახალქალაქში- არტაშეს პალანჯიანი; თერჯოლაში – ზაურ გურგენიძე და კახი კვატაია; ზესტაფონში – დავით ჭანტურია და ილია კოკაია; ჭიათურაში – ირაკლი გაბრიჭიძე; ქუთაისის ოლქებში – შორენა ჯანხოთელი, ავთანდილ გოდუაძე და ნესტან დანელია; ოზურგეთში – გოჩა ძიმისტარიშვილი; ლანჩხუთში – აკაკი ჩხაიძე და დავით ჟღენტი; მარტვილში – მარიამ კეკუტია; ხობში – ვილენ სერგია და რამაზ ტყებუჩავა; ზუგდიდში – მიმოზა ცხონდია; წალენჯიხაში – მუხრან ბურჭულაძე, ნატალია ზარქუა და ლადო კვარაცხელია; ბათუმის ოლქებში – არჩილ ფარტენაძე, ზაურ გოგიტიძე, ტარიელ კარანაძე და არმაზ ახვლედიანი.
როგორც ცესკოს სპიკერი ანა მიქელაძე "გურია ნიუსთან" საუბრისას განმარტავს, "არჩევნებში დამოუკიდებლად მონაწილე პარტია/საარჩევნო ბლოკი/ამომრჩეველთა საინიციატივო ჯგუფი საარჩევნო ოლქში მაჟორიტარ კანდიდატებს წარადგენს საარჩევნო კოდექსის 115-ე მუხლის მე-7 – მე-11 პუნქტებითა და 116-ე მუხლის შესაბამისად, პარტია/საარჩევნო ბლოკი ვალდებულია მაჟორიტარი კანდიდატის სარეგისტრაციო დოკუმენტაცია წარუდგინოს ცესკოს".
"საოლქო საარჩევნო კომისია ამოწმებს პარტიის/საარჩევნო ბლოკის მიერ წარდგენილი მაჟორიტარი კანდიდატის საბუთებს და საბუთების წარდგენიდან 10 დღის ვადაში, მაგრამ არა უგვიანეს არჩევნების დღემდე 26-ე დღისა დასკვნას წარუდგენს საოლქო საარჩევნო კომისიის თავმჯდომარეს.
ამომრჩეველთა საინიციატივო ჯგუფის მიერ წარდგენილ საქართველოს პარლამენტის წევრობის კანდიდატს განკარგულებით რეგისტრაციაში ატარებს შესაბამისი საოლქო საარჩევნო კომისიის თავმჯდომარე.
საოლქო საარჩევნო კომისიის თავმჯდომარე რეგისტრაციიდან 3 დღის ვადაში ამომრჩეველთა საინიციატივო ჯგუფის მიერ წარდგენილ საქართველოს პარლამენტის წევრობის კანდიდატს აძლევს შესაბამის მოწმობას. ამის შემდეგ, ცესკო თავის ოფიციალურ ვებგვერდზე აქვეყნებს რეგისტრირებული პარტიების/საარჩევნო ბლოკების სიას განცხადებების წარდგენის რიგის მიხედვით, აგრეთვე იმ პარტიების/საარჩევნო ბლოკების სიას, რომელთაც უარი ეთქვათ რეგისტრაციაზე ან რომელთა რეგისტრაციაც გაუქმდა თავის მიზეზებთან ერთად", _ აღნიშნავს ანა მიქელაძე.
რაც შეეხება დამოუკიდებელი კანდიდატის არჩევნებიდან მოხსნის ბოლო ვადას, ცესკოს სპიკერის განმარტებით, 28 სექტემბერია.
"საქართველოს პარლამენტის წევრობის კანდიდატს, აგრეთვე მის წარმდგენ პარტიას ან საარჩევნო ბლოკს უფლება აქვთ უარი თქვან არჩევნებში მონაწილეობაზე ან წარდგენილ კანდიდატზე, რისთვისაც განცხადებით უნდა მიმართონ შესაბამის საარჩევნო კომისიას. საარჩევნო სუბიექტის ან ცალკეული კანდიდატების არჩევნებიდან მოხსნის შესახებ ინფორმაციას ცესკო დაუყოვნებლივ აქვეყნებს თავის ოფიციალურ ვებგვერდზე", _ უთხრა მიქელაძემ "გურია ნიუსს" და დასძინა, რომ 2016 წლის არჩევნებისთვის ჯერჯერობით არცერთ საინიციატივო ჯგუფს ან დამოუკიდებელ კანდიდატს კანდიდატურა არ მოუხსნია.
