მაგრამ, უპირველეს ყოვლისა, მნიშვნელოვანია რომ არჩევნები იყოს და იქნება ღია, თავისუფალი და იმ სტანდარტებით, რომელიც ეკადრება ცივილიზებულ ქვეყანას. მართალია პრობლემები გვაქვს დემოკრატიაშიც, ეკონომიკაშიც, სოციალურ სფეროშიც, მაგრამ გამოიკვეთა ჩვენი სახელმწიფო, როგორც განსხვავებული ტიპის სახელმწიფო მთელს ამ რეგიონში. ამიტომ ჩვენ ყველაფერში უნდა ვიყოთ ძალიან მაგრები. ძალიან მაგრები ვართ სამხედრო რეფორმაში, ძალიან მაგრები ვართ პოლიციის რეფორმაში. ძალიან მაგრები ვართ კორუფციასთან ბრძოლაში. ძალიან მაგრები ვართ საზღვრის დაცვის სისტემის ჩამოყალიბებაში. ძალიან მაგრები ვართ მაკროეკონომიკური სტაბილურობის თვალსაზრისით გადადგმულ ნაბიჯებში. მაგარი “რეზულტატები” გვაქვს მიგრაციულ პროცესებთან დაკავშირებით, დანაშაულთან ბრძოლის თვალსაზრისით. ევროკავშირის მონაცემებით, თბილისი ევროპის კონტინენტზე ყველაზე უსაფრთხო დედაქალაქია. დაგვრჩა სასამართლო ხელისუფლება, რომელიც პროგრესს განიცდის, მაგრამ ჯერ არ ვართ იქ სადაც უნდა ვიყოთ და დაგვრჩა ეს არჩევნები”, _ ეს განცხადება საქართველოს ვიცე პრემიერმა გიორგი ბარამიძემ ნატოს კვირეულის ფარგლებში ჟურნალისტებისთვის გახსნილ საზაფხულო სკოლა-სემინარზე გააკეთა, რომელშიც 30-ზე მეტი ჟურნალისტი მონაწილეობდა.
სემინარში ასევე მონაწილეობდნენ ნატოში ლიტვის მუდმივი წარმომადგენელი კესტუტის იანკაუსკასი და ნატოს ოფიცერი კავკასიაში უილიამ ლაჰუემი
“გურია ნიუსმა” ბატონ ბარამიძეს საქართველოში არსებული ადამიანის უფლებები შეახსენა, რაზეც მინისტრმა გვიპასუხა: “რა თქმა უნდა, როცა სასამართლო ვთქვი, ეს სიტემაც იქ არის. თუ სასამართლო ხელისუფლება მოწოდების სიმაღლეზეა, შესაბამისად ადამიანის უფლებების დაცვა ბევრად უფრო ადვილია. მაგრამ, ჩემი აზრით, ადამიანის უფლებებში შედის ისიც, რომ ვაუმჯობესებთ ჯანდაცვის, განათლების სისტემას. ვიცავთ უმცირესობების უფლებებს, რაზეც უმწვავესად გაგვაკრიტიკა ამ ქვეყანაში არსებულმა ყველა ოპოზიციურმა პარტიამ და პრაქტიკულად ყველა არასამთავრობო ორგანიზაციამ. დაგვგმო თითქმის ყველა ჟურნალისტმა, ზოგიერთმა მამაომ ანათემას გადაგვცა, მაგრამ მაინც გავაკეთეთ ის, რაც იყო გასაკეთებელი და სწორი. ამით არ დაქცეულა არც საქართველო, არ ამოძირკვულა მართლმადიდებელი ეკლესია. არც აპოკალიპსი მომხდარა. ჩვენ დავხარჯეთ ჩვენი პოლიტიკური კაპიტალი არაპოპულარულ ნაბიჯში. სწორედ ადამიანის უფლებების დაცვისთვის უნდა გადაგვედგა ნაბიჯი. ჩვენ ჩვენი ქვეყნისთვის ცივილიზებული მომავალი გვინდა”.
