შეფასებისა და გამოცდების ეროვნული ცენტრის ხელმძღვანელმა მაია მიმინოშვილმა გასულ წელს 158 177 ლარის შემოსავალი მიიღო, რაც წინა წელთან შედარებით 48 210 ლარით მეტია.
აღნიშნულთან დაკავშირებით, მიმინოშვილის ქონებრივ დეკლარაციაში წერია, რომელიც მან 2016 წლის 9 აგვისტოს შეავსო.
ქონებრივი დეკლარაციის მიხედვით, მაია მიმინოშვილს 2015 წელს შემოსავლის სახით 158 177.79 ლარი აქვს მიღებული, ხოლო 2014 წელს მისმა შემოსავალმა 109 967.48 ლარი შეადგინა.
აღსანიშნავია, რომ მაია მიმინოშვილის შემოსავალი გასულ წლებშიც 100 ათასი ლარის ფარგლებში მერყეობდა.
საჯარო სამსახურის ბიუროს ვებ-გვერდზე განთავსებული დეკლარაციებიდან ირკვევა, რომ 2013 წელს მიმინოშვილის შემოსავალი 105 629.98 ლარი იყო, 2012 წელს – 62 627 ლარი, 2011 წელს – 103 500 ლარი, 2010 წელს – 83 502 ლარი, ხოლო 2009 წელს – 96 000 ლარი.
რაც შეეხება ოჯახის ქონებას, 2016 წელს შევსებულ დეკლარაციაში აღნიშნულია, რომ მაია მიმინოშვილის 100%-იან საკუთრებაშია თბილისში, ქოშიგორაზე, დიღმის სასწავლო მეურნეობის ტერიტორიაზე არსებული 340.00 კვ.მ.-ის ფართობის საცხოვრებელი სახლი და 900.00 კვ.მ.-ის ფართობის მიწის ნაკვეთი.
ხოლო მაია მიმინშვილის შვილი, ალექსანდრე ყანჩაველი ფლობს თბილისში, დიდი დიღომში პეტრე იბერის ქუჩა არსებულ 63.00 კვ.მ-ის ფართობის ბინას. მის საკუთრებაშია ასევე მსუბუქი ავტომანქანა TOYOTA Land Cruiser.
ქონებრივი დეკლარაციის შევსებისას მაია მიმინოშვილის სახელფასო ანგარიშზე "ბაზის ბანკში" 2000 ლარი იყო, ხოლო "საქართველოს ბანკის" სახელფასო ანგარიშზე 9000 ლარი.
დედის, დარეჯანი მახარაძის საპენსიო ანგარიშზე "ლიბერთი ბანკში" 63 ლარი, ხოლო შვილის, ალექსანდრე ყანჩაველის სახელფასო ანგარიშზე 100 ლარი ირიცხებოდა.
რაც შეეხება ოჯახის შემოსავლებს, დეკლარაციაში აღნიშნულია, რომ ალექსანდრე ყანჩაველმა საქართველოს ეკონომიკისა და მდგრადი განვითარების სამინისტროს სსიპ-საქართველოს ტურიზმის ეროვნული ადმინისტრაციიდან 29 400 ლარის შემოსავალი აქვს მიღებული, სადაც ის საინფორმაციო მომსახურების სამმართველოს უფროსია. ხოლო ბათუმის საგამოცდო ცენტრის კოორდინატორის პოზიციისთვის 2 864 ლარი აქვს მიღებული. დეკლარაციის მიხედვით, მაია მიმინოშვილის სახელზე ორი ფულადი სესხია.
252 000-ლარიანი სესხი "ბაზის ბანკიდან" 2013 წელს აუღია და ვადა 2016 წლის მარტის ბოლოს ამოეწურა. სესხის დასაფარად კი გასულ წელს 31 308.93 ლარი აქვს გადახდილი.
რაც შეეხება 122 500-ევროიან სესხს, მიმინოშვილს თანხა საქართველოს ბანკიდან 2016 წლის 22 მარტს აუღია და ვადა 2031 წელს ეწურება. სესხის პროცენტის დასაფარად მას თანხა ჯერჯერობით გადახდილი არ აქვს.
დეკლარაციის თანახმად, მაია მიმინოშვილს გასულ წელს რბილი ავეჯის შესაძენად 4 693 ლარი გადაუხდია.
ცნობისთვის, მაია მიმინოშვილი 1960 წლის 1 აგვისტოს დაიბადა. დაამთავრა კომაროვის სახელობის ფიზიკა-მათემატიკის სკოლა, რის შემდეგაც მიიღო თბილისის ივანე ჯავახიშვილის სახელობის სახელმწიფო უნივერსიტეტის უმაღლესი განათლება, მექანიკა-მათემატიკის სპეციალობით. 1982-1985 წლებში დაამთვარა ა.რაზმაძის სახელობის მათემატიკის ინსტიტუტის ასპირანტურა. მინიჭებული აქვს ფიზიკა-მათემატიკის მეცნიერებათა კანდიდატის სტატუსი. 2008 წლიდან მაია მიმინოშვილი შეფასებისა და გამოცდების ეროვნულ ცენტრს ხელმძღვანელობს.
ამავე თემაზე:
