პარლამენტის იურიდიულ საკითხთა კომიტეტმა პრეზიდენტის მიერ წარდგენილ უზენაესი სასამართლოს მოსამართლეობის კანდიდატებს – ლევან ბოძაშვილს, ნონა თოდუას და თამარ ლალიაშვილს მხარი დაუჭირა.
ლევან ბოძაშვილმა სხდომაზე დამსწრე შვიდი დეპუტატიდან შვიდივეს მხარდაჭერა მიიღო, ხოლო ნონა თოდუას და თამარ ლალიაშვილს ხუთ-ხუთმა დეპუტატმა დაუჭირა მხარი.
უზენაესი სასამართლოს მოსამართლეობის კანდიდატებთან დაკავშირებული საკითხი ხვალ დაგეგმილი პლენარული სხდომის დღის წესრიგში იქნება შეტანილი, თუმცა ამ დრომდე უცნობია, იქნება თუ არა კვორუმი ხვალინდელ სხდომაზე.
უზენაესი სასამართლოს მოსამართლეობის კანდიდატმა ლევან ბოძაშვილმა იურიდიულ საკითხთა კომიტეტის სხდომაზე განაცხადა, რომ არცევის შემთხვევაში ის აქტიური მოსამართლე იქნება.
მისივე შეფასებით, საქართველოს მართლმსაჯულების სისტემაში დღესდღეობით ბევრი პრობლემაა, რომელიც დროულ გამოსწორებას საჭიროებს.
"მართლმსაჯულება არის სახელმწიფოებრიობის მთავარი ქვაკუთხედი. ის არის განმსაზღვრელი იმისა, თუ რამდენად არის სახელმწიფო შემდგარი, რამდენად სრულფასოვნად ფუნქციონირებს. ასევე ის განსაზღვრავს არა მხოლოდ ქვეყანაში ადამიანის უფლებების დაცვის ეფექტურობას, არამედ საერთაშორისო ასპარეზზეც ქვეყნის წარმატებულობას, მათ შორის თუნდაც ევროატლანტიკური ინტეგრაციის თვალსაზრისით. იმ შემთხვევაში, თუ ვიქნები არჩეული საქართველოს უზენაესი სასამართლოს მოსამართლედ, მე ვიქნები აქტიური მოსამართლე, მათ შორის მოსამართლეთა კონფერენციის ფარგლებში, რადგან საქართველოს მართლმსაჯულების სისტემას დღეს აქვს საკმაოდ ბევრი პრობლემა და ეს პრობლემები არის გამოსასწორებელი, როგორც ინდივიდუალური, ასევე სისტემური თვალსაზრისით. კონკრეტულად ეს ეხება სასამართლო სისტემის ავტორიტეტის ამაღლებას – ავტორიტეტი და ნდობა არის სასამართლოს დამოუკიდებლობის ერთ-ერთი განმსაზღვრელი, თუ არა უმნიშვნელოვანესი ფაქტორი და მეორე – სისტემური საკითხები, რომლებიც ზოგადად მართლმსაჯულების სისტემას გააჩნია", _ განაცხადა ლევან ბოძაშვილმა და დასძინა, რომ მას აქვს მისეული ხედვა იმასთან დაკავშირებითაც, რომ საქართველო რაც შეიძლება მალე გახდეს იმ სისტემის ნაწილი, რომელსაც ევროპული სამართალი ჰქვია.
"მე მაქვს ჩემეული ხედვა, თუ გნებავთ დავარქვათ ოცნებაც, რომ საქართველოს მართლმსაჯულების სისტემა რაც შეიძლება მალე, უახლოეს მომავალში აუცილებლად იყოს იმ სისტემის ნაწილი, რომელიც არის ევროპული სამართალი, ევროკავშირის სამართალი, თუმცა ჩვენ გარკვეულწილად უკვე ვართ ევროკავშირის სამართლის ნაწილი ასოცირების შეთანხმებიდან გამომდინარე", _ აღნიშნა ბოძაშვილმა.
