პარტია "ქართული ოცნება – დემოკრატიული საქართველო"-ს თავმჯდომარეს გიორგი კვირიკაშვილს და პარტიის გენერალურ მდივანს კახი კალაძეს უცხოეთში მცხოვრებმა ქართველებმა წერილი გაუგზავნეს და დეტალური ახსნა განმარტება მოითხოვეს, თუ რამ განაპირობა ლანჩხუთისა და ჩოხატაურის მაჟორიტარობის აწ უკვე ყოფილი კანდიდატის, თემურ ჭკუასელის ჩანაცვლება "სრულიად უცნობი კადრით"
"ჩვენ, უცხოეთში მცხოვრები ქართველები, ვცდილობთ არ მოვწყდეთ წინაპართა ფესვებს. სამშობლოს განცდის სიმძაფრე ჩვენში გაცილებით დიდია, ვიდრე აქ მყოფებში. პროცესები, რომლებიც საქართველოში მიმდინარეობს, ყოველთვის იწვევს ცხოველ ინტერესს.
ასეა დღესაც. მიმდინარე საპარლამენტო არჩევნები თითოეული ჩვენთაგანისთვის ძალიან მნიშვნელოვანია. ქვეყანამ უნდა აირჩიოს უმაღლესი საკანონმდებლო ორგანო, რომელიც შემდგომში განსაზღვრავს საშინაო და საგარეო პოლიტიკის კურსს.
ჩვენი სამშობლოს კეთილდღეობა, მისი სწორი გზით განვითარება ძალიან გვჭირდება ქართველ ემიგრანტ ქალებს. მათ, ვისაც მუდმივად ტკივილამდე გვენატრება ჩვენი მიწა-წყალი, ჩვენი ოჯახები.
სწორედ სამშობლოსთან დაკავშირებული ძაფების ძიებისას გავიცანით თემურ ჭკუასელი. ადამიანი, რომელმაც წარსული ცხოვრებით, მრავალმხრივი ნიჭით, შემოქმედებითა და უბრალოდ, ადამიანობით ძალიან შეგვაყვარა თავი. მისი მხარდაჭერითა და უშუალო მონაწილეობით შევძელით რამდენიმე მნიშვნელოვანი პროექტის განხორციელება. მაგალითად, „წარმატებული ემიგრანტი ქალები“, „აჩუქე შენი წიგნი დიასპორას“ და ა.შ. მათ დიდი გამოხმაურება ჰქონდათ არა მარტო საქართველოში, არამედ უცხოეთშიც.
ბატონი თემური ჩვენთვის უახლოეს ადამიანად იქცა. ჩვენ ის გვეიმედება მეგობრად და თანამოაზრედ. ის არის საქართველოს სახე უცხოეთში. ამიტომაც ვგულშემატკივრობთ მას და თვალყურს ვადევნებთ მისი საარჩევნო კამპანიის მიმდინარეობას ლანჩხუთსა და ჩოხატაურის მაჟორიტარობის კანდიდატის რანგში. ბევრ ჩვენთაგანს პროექტში აქტიურად ჩართვის სურვილიც გაუჩნდა.
ეს მის პიროვნულ დამსახურებად უნდა ჩაითვალოს. ნათლად ვხედავდით მისდამი მოსახლეობის დიდ სიყვარულს და მხარდაჭერას. ჩვენი უშუალო კონტაქტებით მიღებული ინფორმაციებიც მის მაღალ რეიტინგს ადასტურებდა.
აქიდან გამომდინარე, ძალიან გვაშფოთებს მისი სახელის ირგვლივ ბოლო დროს ატეხილი აჟიოტაჟი. გვინდა ვიცოდეთ, რამ განაპირობა მისი, როგორც ლანჩხუთისა და ჩოხატაურის მაჟორიტარობის კანდიდატის ჩანაცვლება სრულიად უცნობი კადრით.
ვითხოვთ, პარტია „ქართულმა ოცნებამ“, დაგვისაბუთოს რატომ თქვა უარი წარმატების მომტან, ყველასთვის საყვარელ და პატივსაცემ სახეზე?!
ასეთ საკითხებში პასუხგაუცემელი კითხვები, როგორც წესი, უარყოფითად ისახება არჩევნების შედეგებზე უცხოეთში.
მოუთმენლად ველით დამაჯერებელ განმარტებას გადაწყვეტილების მიმღებ პირთაგან, რათა ჩამოვყალიბდეთ და ყოყმანის გარეშე მივიდეთ საარჩევნო ყუთებთან ის ქართველი ქალები, რომლებიც უცხოეთიდან ვზრუნავთ ჩვენი სამშობლოს კეთიდღეობასა და სწრაფ განვითარებაზე," _ აღნიშნულია წერილში, რომელსაც ხელს აწერენ: ინა ასანიძე (აშშ), ლიკა ზახაროვა (რუსეთი), სესილი ბინიაშვილი (ისრაელი), დალი დე გრაფი (ჰოლანდია), ანა ბალამწარაშვილი (ბელგია), ლელა კუხიანიძე (შვედეთი), ირინა მიქაბერიძე (აშშ), მაია სასწრაფოშვილი-ლორელი (ავსტრია), რუსკა მაკოვსკი (გერმანია), ნუნუ გელაძე (იტალია), ირა სოფრომაძე (იტალია), ეკა ჭვრიტიძე (აშშ), ნინა ბაჯელიძე (საბერძნეთი), ქეთევან სირბილაძე (საბერძნეთი), თინა ყენია (აშშ), ხათუნა იოსელიანი (აშშ) და ლეილა სოლოღაშვილი (საბერძნეთი).
აღნიშნულ წერილზე კომენტარს არ აკეთებენ "ქართულ ოცნებაში". როგორც პარტიის პრესსამსახურში "გურია ნიუსს" უთხრეს, ამ საკითხზე განმარტებები კახი კალაძემ უკვე გააკეთა და დამატებითი კომენტარი არ გაკეთდება.
შეგახსენებთ, რომ „ქართულმა ოცნებამ" ლანჩხუთისა და ჩოხატაურის საარჩევნო ოლქში წარდგენილი დეპუტატობის კანდიდატი თემურ ჭკუასელი ახალი კანდიდატით _ ნინო წილოსანით, 6 სექტემბერს, ღამის 12 საათზე, პოლიტსაბჭოს საგანგებო სხდომაზე ჩაანაცვლა.
ამავე თემაზე იხილეთ: ექსკლუზივი: რატომ მოხსნეს თემურ ჭკუასელის კანდიდატურა _ "ფაქტობრივად, მე მოვევლინე მხსნელად"
