"დღეს ქალბატონ ნინო წილოსანს უმასპინძლა ჩვენმა სოფელმა. დიდი მხარდაჭერა და გვერდით დგომა დაპირდა მოსახლეობას, რისი იმედიც გვაქვს,“ _ ეს პოსტი შესაბამის ფოტოებთან ერთად ჩოხატაურის მუნიციპალიტეტის გამგებლის წარმომადგენელმა სოფელ შუა ამაღლებაში ბელა შათირიშვილმა 16 საათზე სოციალურ ქსელში გამოაქვეყნა.
ფოტოებზე თავად შათირიშვილიცაა წილოსანთან ერთად, რომელიც ჩვენთან საუბრისას ამბობს, რომ შეხვედრა 13 საათზე გაიმართა და მას იქ ყოფნის უფლება ჰქონდა, რადგან შვებულებაში იმყოფება.
თუმცა, „გურია ნიუსმა“ გაარკვია, რომ შეხვედრის მიმდინარეობის დროს გამგებლის წარმომადგენელი შვებულებაში არ იმყოფებოდა, რადგან მის მიერ დღეს დაწერილ განცხადებას გამგებლის რეზოლუცია არ ადევს.
ჩოხატაურის მუნიციპალიტეტის გამგეობის იურისტი ბექა შენგელია განმარტავს, რომ არა აქვს მნიშვნელობა, რომელ საათზე დაწერს გამგებელი ბრძანებას, რადგან შათირიშვილი დღეიდან შვებულებაშია (?!)
_ ეს არის ელექტრონულ პროცედურებთან დაკავშირებული, რასაც დრო სჭირდება. შეიძლება საღამოს 11 საათზეც მოაწეროს ხელი გამგებელმა ბრძანებას. ბელა შათირიშვილს დღევანდელი რიცხვით აქვს განცხადება დაწერილი და გვიანაც რომ მოაწეროს გამგებელმა ბრძანებას ხელი, შვებულებაში დღეიდან ითვლება, _ ამბობს იურისტი და გვიხსნის, რომ გამგებლის ბრძანების მომზადებას და ხელმოწერას დრო სჭირდება.
_ ბატონო ბექა, ამჟამად, როცა არ არსებობს გამგებლის ბრძანება, რომლის თანახმადაც შათირიშვილი შვებულებაში, თქვენ, როგორც იურისტი, გვიმტკიცებთ, რომ ის მაინც შვებულებაში გასულად ითვლება?
_ ხვალ ვიტყვით ჩვენ რომ 19 სექტემბერს ბელა შათირიშვილი გავიდა შვებულებაში. დაკმაყოფილდება მისი განცხადება და იქნება შვებულებაში 19-ში.
_ ამ წუთას არის?
_ ტექნიკურად მზადდება.
_ ეს ტექნიკურად მომზადება რას ნიშნავს?
_ რეზოლუცია იქნება მოგვიანებით. ახლა არ არის, _ განმარტა შენგელიამ.
როგორც იურისტები განმარტავენ, თუკი განცხადებას გამგებლის რეზოლუცია არ ადევს, პირი შვებულებაში გასულად არ ითვლება და შესაბამისად, მისი საარჩევნო კამპანიაში მონაწილეობა კანონმდებლობის დარღვევაა.
პ.ს. აღსანიშნავია, რომ მას შედმეგ, რაც „გურია ნიუსმა“ დეტალების გარკვევა მუნიციპალიტეტის გამგეობაში დაიწყო, შათირიშვილის გვერდიდან ის ფოტო წაიშალა, სადაც წილოსანთან ერთად ფიქსირდებოდა, თუმცა, ფაქტი „გურია ნიუსმა“ ფოტოს წაშლამდე დააფიქსირა.
