_ მე ვერ ავიღებ პასუხისმგებლობას ჩემს თავზე ამ საარჩევნოდ, ვერ შევაჩერებ ხალხის მასას აქციისთვის და უნდა გადავდგე, _ უთქვამს ილია ვაშაყმაძეს. თუმცა რამდენიმე თვის წინ, სწორედ მან გაათავისუფლა ოზურგეთის მუნიციპალიტეტის რამდენიმე სოფლის რწმუნებული იმ მიზეზით, რომ მათ სოფლებში, არჩევნებში მოგების იმედი არ ჰქონდათ. გათავისუფლებულთა შორის მისი მშობლიური სოფლის, ლიხაურის რწმუნებულიც იყო.
აღსანიშნავია, რომ “ქართული ოცნების” აქციაზე ყველაზე ხალხის მეტი რაოდენობა სწორედ ლიხაურიდან იყო, რომელიც ვაშაყმაძის სოფელია. სავარაუდოდ, სწორედ ეს გახდა მისი გადადგომის მიზეზი.
ერთი ვერსიით, ილია ვაშაყმაძის გადადგომის შესაძლო მიზეზი, მისი მხრიდან ნაციონალების მხარდასაჭერად მათ მიერ დასაქმებულთა მიერ ათი ხმის მოტანა იყო.
“გურია ნიუსი” რამდენიმე კვირის წინ წერდა “ნაციონალური მოძრაობის” გენერალური მდივნის მიხეილ მაჭავარიანისა და რეგიონული განვითარებისა და ინფრასტრუქტურის მინისტრის ფარული შეხვედრის დეტალებზე, სადაც “გურია ნიუსთან” მაჭავარიანი ამბობდა, რომ გამგებლის ამ ქმედებაში უკანონობას ვერაფერს ხედავდა.
_ მე ამ შემთხვევაში სრულიად დამაკმაყოფილა იმ პასუხმა, რომელიც ბატონმა ილია ვაშაყმაძემ გასცა კითხვებს ამ ინფორმაციის შესახებ. ამავე დროს, ოზურგეთის მუნიციპალიტეტის მოვალეობის შემსრულებელი ილია ვაშაყმაძე არის პარტიის თავმჯდომარე, _ განაცხადა მაჭავარიანმა.
_ ანუ მას სრული უფლება აქვს, ასეთი ქმედებები კვლავ გააგრძელოს?
_ ჩვენ ყველაფერს კანონის ჩარჩოში ვაკეთებთ.
ამ პასუხის მიხედვით შეიძლება ითქვას, რომ ვაშაყმაძე ამის გამო არ უნდა გაეთავისუფლებინათ.
უკვე რამდენიმე დღეა ვრცელდება ინფორმაცია, რომ ოზურგეთის მუნიციპალიტეტის გამგებლის მოვალეობის შემსრულებელი ილია ვაშაყმაძე თანამდებობიდან გადადგა. თუმცა ამ ინფორმაციას თავად ვაშაყმაძე “გურია ნიუსთან” საუბარში არ ადასტურებს.
_ შეგიძლიათ იმუშაოთ მშვიდად, მეც ჩვეულებრივ რეჟიმში ვაგრძელებ მუშაობას, ეს ინფორმაცია სიმართლეს არ შეესაბამება, _ გვითხრა ვაშაყმაძემ.
“გურია ნიუსი” რამდენიმე თვის წინ წერდა, როგორ გაათავისუფლეს ოზურგეთის მუნიციპალიტეტის სოფლების რწმუნებულები თავიანთ სოფლებში არჩევნების მოგების ნაკლები შანსის გამო. ერთ-ერთი ასეთი იყო სოფელ ლიხაურის რწმუნებული დავით ცეცხლაძე, რომელიც დაიბარეს გამგეობაში და დაავალეს, არჩევნებზე ხმების 75 პროცენტს მოიტანო, მან კი პირდაპირ უთხრა, _ 5 პროცენტის იმედიც არ მაქვსო. მაშინ, დატოვე სამსახურიო, უთხრეს”, _ გვითხრა მაშინ ჩვენმა წყარომ.
როგორც ლიხაურში ამბობდნენ, სწორედ ეს ფაქტი გახდა სოფლის რწმუნებულის გათავისუფლების მიზეზი. აქ მთელი სოფელი ოპოზიციაშია”, _ უთხრეს “გურია ნიუსს” ლიხაურელებმა.
ლიხაურში ვერც ერთ არჩევნებს ვერ მოიგებს ხელისუფლება. ჯიბრში უდგანან ხალხს, ამბობდნენ “გურია ნიუსთან” საუბარში ლიხაურელები.
“გურია ნიუსი” დღეს დაუკავშირდა სოფელ ლიხაურის რწმუნებულს სოსო ბოლქვაძეს.
_ ბატონო სოსო, გავრცელებული ინფორმაციით, ხალხის ყველაზე მეტი რაოდენობა “ქართული ოცნების” აქციაზე სოფელ ლიხაურიდან იყო…
_ მე არ გავაკეთებ მაგაზე კომენტარს. მიმართეთ პრესსამსახურს
_ თქვენ არ იცით?
_ არა, – გვითხრა და ტელეფონი გაგვითიშა.
